ޒުވާން މަސްވެރިޔާ ނުވަތަ ހަސަން ސާޖިން ފޮންޏަކަށް ނޫނެވެ. ކުރިއަށް އޮތް ދޮޅު އަހަރަށް ކޮއްތު ހަރަދު ހިސާބުކޮށް، ފޮށި ތަންމަތި ބަނދެ ރިޔާ ހެޔޮވަރުކޮށް އޭނާ ތައްޔާރުވަމުން އެދަނީ ތާރީހީ ދަތުރަކަށެވެ. އެ ދަތުރުގައި ރާއްޖޭގެ މީހުން ދިރިއުޅޭ ކޮންމެ ރަށަކަށް އޭނާ އަރާނެ އެވެ. ރީތި ފަޅެއް ގިރި އެއް އޮތަސް ފީނާނެ އެވެ. ރަށްރަށުގެ މަސްވެރިންނާ އެކު މަހަށް ދާނެ އެވެ. ދަނޑުވެރިންނާ އެކު ދަނޑަށް ދާނެ އެވެ. އެއިން ކޮންމެ ރަށަކުން ނާއުންމީދާއި އުންމީދުގެ މަންޒަރުތަކާއި ވާހަކަތައް ކެމެރާއަށް ނަގައި އެ ތަކެތި މިލިއަނުން މީހުން ބަލާ އޭނާގެ ސޯޝަލް މީޑިއާ ފީޑުތަކަށް އަޅާނެ އެވެ. "ޑިސްކަވާ މޯލްޑިވްސް ވިތު ޒުވާން މަސްވެރިޔާ" ގެ މި ދަތުރެއްގައި މުޅި ރާއްޖެ އޭނާ "ޑިސްކަވާ" ކުރާނެ އެވެ.
އުމުރުން ތޭވީހަކަށް އަހަރު ވީ އިރު، ހިތުލި ހުރިހާ ކަމެއް ހާސިލުކޮށް، ފުޅާ މަސްވެރިކަމުގެ ދާއިރާގައި ބްރޭންޑެއްގެ ގޮތުގައި ފައި ހަރުކޮށްގެން ހުރި މި ޗެމްޕިއަނެއް މި ދައްކާ ވާހަކަ އަކީ "ފޮންޏެ"ކޭ ހީވިޔަސް، އޭގައި ބަރުދަން ހުރިކަން މިހާތަނަށް ވެސް އޭނާ ވަނީ ސާބިތުކޮށްދީފަ އެވެ. އެހެންވީމާ މި ދަތުރެއް ހަގީގަތަކަށް ހަދަން ހިފާފައި ސާޖިން ބުނާ ބަހަކާމެދު ޝައްކެއް ނެތެވެ.
ސާޖިން މޫދު އަޑީގައި ދިވެހި ދިދަ އާއި އެކު: އޭނާ ދަނީ ރާއްޖޭގެ އެެއްކޮޅުން އަނެއްކޮޅަށް ދަތުރެއް ކުރަން ތައްޔާރުވަމުން
"އޭގައި އޮތީ މިހާރު މިނިސްޓްރީ އާއި އެމްއެމްޕީއާރްސީ އާއި މިކަހަލަ ތަންތަނަށް ފޮނުވާފައި ހުރި ޕްރޮޕޯސަލްތަކަށް ޖަވާބު ލިބުނު އަވަހެއް. އަހަރެން މި މަސައްކަތް ކުރަނީ އަހަރެންނަށް ލިބިފައި އޮތް ޕްލެޓްފޯމް މެދުވެރިކޮށް ރަށްތަކާއި މީހުންގެ ދިރިއުޅުމުގެ ހާލަތަށް ކުޑަ ވިޔަސް ހެޔޮ ބަދަލެއް ގެނެވޭތޯ،" ސާޖިންގެ މި ދަތުރެއްގެ ވާހަކަ ފަށައިގަނެފައި މިހާރު ދަތުރުގެ ތައްޔާރީ އޮތް ހިސާބުގައި ރޮނގު އަޅައިދިނެވެ.
"ބޮޑު ދަތުރެއް ވީމަ، ހުރުމާއި ކެއުމާއި ދަތުރުމައްޗަށް އެކަނި ދާނެ ހަރަދު އަންދާޒާކޮށްޕަ ޕްރޮޕޯސަލް ފޮނުވަމުން މި ދަނީ."
ދާ ބާރު މިނުގައި ރަށަކަށް ފަހު ރަށެއް ނަގައިގެން ފޭބުމަށްވުރެ އޭނާގެ މި ދަތުރާ ގުޅިފައިވާ ޕްލޭންތައް މާ ވަރުގަދަ ކަމަށް ސާޖިން ބުންޏެވެ. ރަށް ތަކަށް އޭނާ ދަތުރު ކުރަނީ އެރަށްރަށުގެ މީހުންނާ އެކު އެމީހުންގެ ދިރިއުޅުން އުޅެ ތަޖުރިބާ ކުރުމަށެވެ. މީހުންނަށް ދިމާވެފައިވާ އުނދަގޫތަކާއި ރަށްރަށުގައި ހުރި ދަތި ކަންކަން ފާހަގަކޮށް އެކަންކަން ފެންނަ ފަށަށް ތިލަކޮށްދިނުމަށެވެ. ފޮރުވިފައިވާ ރީތި ދިރިއުޅުންތަކާއި ހިތްގައިމު ރާއްޖޭގެ ރީތި ކުލަތައް އޭނާގެ "ވާޗުއަލް" އަތް ފޯރި ހިސާބަކަށް ގެންގޮސް ދިނުމަށެވެ.
"އަހަރެން ގަބޫލުކުރަނީ، ރަށަކަށް އަރާލާ އެންމެ ދުވަހަކުން ދެ ދުވަހަކުން މިކަހަލަ ކަންކަން ނޭނގޭނެ ކަމަށް. އެހެންވީމާ ބޭނުންވަނީ މަސްވެރި ރަށެއް ވެއްޖިއްޔާ އެރަށެއްގެ މަސްވެރިންނާއެކު މަހަށް ވެސް ދާން. އެރަށުގެ ދަނޑުވެރިންނާ އެކު ދަނޑަށް ވެސް ދާން. ފީނާނެ ރީތި ސްޕޮޓެއް އޮވެއްޖިއްޔާ ފީނާ ހަދާލަން. އޭރުން މީހުންނާއި ވެއްޓާއި ދިރިއުޅުމާ ކަނެކްޓް ވާން،" ސާޖިން ބުންޏެވެ.
