ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުالله ޖާބިރުގެ ޕާސްޕޯޓް ދޫކޮށްލުމާ އެކު ރާއްޖެ އިން ބޭރަށް މިއަދު ފުރާވަޑައިގެންފި އެވެ.
ވިޔަފާރިވެރިޔާ ޖާބިރުގެ ޕާސްޕޯޓް ހިފެހެއްޓީ އޭނާއާ ދެކޮޅަށް ސިވިލް ކޯޓަށް ހުށަހަޅާފައިވާ, މުވައްޒަފަކަށް ދޭން ޖެހޭ ފައިސާގެ މައްސަލައެއްގަ އެވެ.
ޖާބިރު "އަދަދު"އަށް ވިދާޅުވީ އޭނާގެ ޕާސްޕޯޓް ދޫކޮށްލީ މީހަކަށް ދައްކަން އޮތް ފައިސާކޮޅު ދައްކައި މައްސަލަ ހައްލުވުމުން ކަމަށެވެ. އޭނާ ވަޑައިގަންނަވަނީ އެމެރިކާގެ ނިއު ޔޯކަށް ކަމަށް ވެސް ވިދާޅުވި އެވެ.
"މާބޮޑު މައްސަލައެއް ނޫން [ކޯޓުގައި] އެއީ, އަޅުގަނޑުގެ ޕާސްޕޯޓް ލިބިއްޖެ," ޖާބިރު ވިދާޅުވި އެވެ.
ޖާބިރުގެ ޕާސްޕޯޓް ދޫކޮށްފައިވާ ކަން އިމިގްރޭޝަން ކޮންޓްރޯލަރު މުހައްމަދު އަހްމަދު (ހަނަފީ) ކަށަވަރުކޮށްދެއްވި އެވެ. ކޯޓުން ޖާބިރުގެ ޕާސްޕޯޓް ދޫކޮށްލީ ވަކި މުއްދަތަކަށް ކަމަށް ވެސް ވިދާޅުވި އެވެ.
ޖާބިރު މި ފަހުން ވަނީ ރައްޔިތުންގެ މަޖިލީހުގެ އިދާރާ ކުރިމަތީގައި އޮށޯވެ އޮންނަވައި އަދި ކުރީގެ ރައީސް މައުމޫން އަބްދުލްގައްޔޫމްގެ ގެކޮޅު ކިނބިގަސްދޮށުގެ ކައިރީގައި ހިތްހަމަނުޖެހުންފާޅުކުރައްވައިފަ އެވެ. މަޖިލިސް ކައިރިއަށް ވަޑައިގަތީ ރައްޔިތުންނަށް ފައިދާވާގޮތަށް ކަންކަން ނުހިނގާތީ ކަމަަށާއި މައުމޫނާ މެދު ނުރުހުން އޮތީ އޭނާގެ އަތުން ނެންގެވި ލޯނެއް އަނބުރާ ނުދައްކަވާ މައްސަލައިގައި ކަމަށް ވިދާޅުވި އެވެ.
ޖާބިރު ތުހުމަތު ކުރައްވާ އަދި ފުލުހަށް ވެސް މައްސަލަ ހުށަހެޅި ލޯނެއް ނަންގަވާފައި ނުވާނެ ކަމަށް ވިދާޅުވެ ޖާބިރުގެ ވާހަކަ މައުމޫންގެ ފަރާތްޕުޅުން ވަނީ ދޮގުކޮށްފަ އެވެ.
މަޖިލީސް ޖަލްސާތަކުގައި ވެސް އަޑުގަދަކުރައްވައި ބައެއް ފަހަރު އިހްތިޖާޖްކުރައްވާ ޖާބިރުގެ އަމަލުތަކުން މަޖިލީހުގެ ގަދަރަށް އުނިކަން ލިބޭ ކަމުގެ ކަންބޮޑުވުން ސުލޫކީ ކޮމިޓީގެ މުގައްރިރު ޔާސިރު އަބްދުއްލަތީފް ވަނީ ފާޅުކުރައްވައިފަ އެވެ.
އެކަމަކު މެމްބަރެއްގެ މައްސަލަ ކޮމިޓީއަށް ބެލޭނީ ހުށަހެޅުމުން ކަަމަށާއި މިހާތަނަށް މައްސަލަ ހުށަހަޅާފައި ނުވާ ކަަމަށް ވިދާޅުވި އެވެ.
