ޕެރިސް، ފްރާންސް (އޯގަސްޓު 4) - ފްރާންސްގެ ވައި ތަގައްޔަރުވުމުގެ މައްސަލައަށް ހައްލެއް ގެނެވިފައި ނުވާތީ އެ ގައުމުގެ އެންމެ މަތީ އިދާރީ ކޯޓުން ރިކޯޑު އަދަދަކުން ސަރުކާރު ޖޫރިމަނާކޮށްފި އެވެ.
ކައުންސިލް އޮފް ސްޓޭޓުން ރައީސް އިމޭނުއެލް މެކްރޯންގެ ސަރުކާރު ޖޫރިމަނާ ކުރީ 12 މިލިއަން ޑޮލަރުންނެވެ. ވައި ތަގައްޔަރުވުމުގެ މައްސަލަ ހައްލު ކުރަން އަވަސް ފިޔަވަޅު ނާޅައިފި ނަމަ ވަރަށް އަވަހަށް އަނެއްކާވެސް ޖޫރިމަނާ ކުރާނެ ކަމުގެ އިންޒާރު ކޯޓުން ދިނެވެ.
ތިމާވެށީގެ ކަންކަމާ ގުޅޭ ގޮތުން ސަރުކާރުގެ އަމަލުތައް އެ ކޯޓުން ދަނީ ވަރަށް ގާތުން ބަލަމުންނެވެ. ބުދަ ދުވަހު ޖޫރިމަނާ ކުރިކަން އިއުލާނު ކުރުމަށް ފަހު ކޯޓުން ބުނީ ވައި ތަގައްޔަރުވުން ކޮންޓްރޯލް ކުރަން ސަރުކާރުން އެޅި މަދު ފިޔަވަޅުތައް ތަންފީޒު ކުރި ކަމާ މެދު ޝައްކު ކަމަށާއި އެއްވެސް އެދެވޭ ބަދަލެއް އައިތޯ ވެސް ބަލާފައި ނުވާ ކަމަށެވެ.
މިދިޔަ އަހަރު، އެ ކޯޓުން ބުނީ ވައި ތަގައްޔަރުވުމުގެ މައްސަލަ ހައްލު ކުރަން ސަރުކާރަށް އެންގީ 2017 ވަނަ އަހަރު ނަމަވެސް އޭގެ ފަހުން އެއްވެސް ކަމެއް ކޮށްފައި ނުވާ ކަމަށެވެ. އެހެންވެ، ކޯޓުގެ އެންގުމާ އެއް ގޮތަށް އަމަލު ކުރަން ހަ މަހުގެ މުއްދަތެއް ސަރުކާރަށް ދިނެވެ. އެ މުއްދަތުގައި އެކަށީގެންވާ ފިޔަވަޅު ނާޅައިފި ނަމަ، ވައިގެ ކޮލިޓީ ރަނގަޅު ވަންދެން ކޮންމެ ހަ މަހަކުން 12 މިލިއަން ޑޮލަރުން ޖޫރިމަނާ ކުރާނެ ކަމުގެ އިންޒާރު ވެސް ދިނެވެ.
އޭރު ދިން ހަ މަހުގެ މުއްދަތު ހަމަވުމާއެކު ބުދަ ދުވަހު ވަނީ 12 މިލިއަން ޑޮލަރުން ސަރުކާރުން ޖޫރިމަނާކޮށްފަ އެވެ.
ކޯޓުން ބުނީ ފޮސިލް ފިޔުލް އެންދުމުން ނުކުންނަ ނައިޓްރޮޖަން އޮކްސައިޑް ގޭސް ފަސް އާބަން ސަރަހައްދެއްގެ ވައިގެ ތެރޭގައި ވަރަށް ގިނައިން ހިމެނޭ ކަމަށެވެ. އެ ސަރަހައްދުތަކަކީ ޕެރިސް، ލިޔޯން، މާސޭ، ޓޫލޫ އަދި ގްރެނޮލްބް އެވެ. އާއްމު ގޮތެއްގައި އެ ގޭސް ބޭރު ކުރަނީ ކާރުތަކުންނެވެ.
އޭގެ އިތުރުން ޕެރިސްގެ ވައިގެ ތެރޭގައި ވަރަށް މަތި މިންވަރަކަށް ޕީއެމް10 މައިކްރޯ ޕާޓިކަލް ހިމެނޭ ކަމަށް ބުންޏެވެ.
ދެހާސް ބާވީސް ވަނަ އަހަރު ފެށުމުން ވައި ތަގައްޔަރުވެފައިވާ މިންވަރު އަލުން ބަލާނެ ކަމަށާއި އޭގެ ފަހުން އަނެއްކާ ވެސް ޖޫރިމަނާ ކުރަން ޖެހިދާނެ ކަމުގެ އިންޒާރު ކޯޓުން ދިނެވެ.
ކައުންސިލް އޮފް ސްޓޭޓުން ބުނީ ބުދަ ދުވަހު ކުރި ޖޫރިމަނާގެ ފައިސާ ސަރުކާރުން ދެއްކުމުން އެ އަދަދު ބަހާލާނީ ވައި ތަގައްޔަރުވުމާ ދެކޮޅަށް މަސައްކަތް ކުރާ އެކި އެޖެންސީތަކަށް ކަމަށެވެ.
އެގޮތުން މި މައްސަލަ އެންމެ ފުރަތަމަ ކޯޓަށް ވެއްދި ފްރެންޑްސް އޮފް ދަ އާތު ޖަމިއްޔާއަށް 100،000 ޔޫރޯ ދޭން ފަނޑިޔާރުން ކަނޑައެޅި އެވެ.
