ބެންކޮކް، ތައިލޭންޑް (އޯގަސްޓު 4) - ތައިލޭންޑުގެ މެރީން ނޭޝަނަލް ޕާކުތަކުގައި ހުންނަ މުރަކައަށް ގެއްލުން ލިބޭ ކެމިކަލް އެކުލެވޭ ސަންސްކްރީން ބޭނުން ކުރުން މަނާކޮށްފި އެވެ.
ތައިލޭންޑުގެ ބީޗުތަކަކީ އެތައް މިލިއަން ފަތުރުވެރިންގެ މަގްބޫލުކަން ލިބިފައިވާ ތަނެކެވެ. ނަމަވެސް އިރުގެ ނުރައްކާތެރި ދޯދިތަކުން ރައްކާތެރިވުމަށް ފަތުރުވެރިން ބޭނުން ކުރާ ލޯޝަންގެ ސަބަބުން މުރަކަތަކުގެ ނިޒާމަށް ގެއްލުން ލިބި، މުރަކަ އާލާވުން މަޑުޖެހެމުންދާ ކަމުގެ ކަންބޮޑުވުން އޮވެ އެވެ.
ބުދަ ދުވަހު އަމަލު ކުރަން ފެށި ގަވާއިދުގެ ދަށުން ވަކި ކެމިކަލްތަކެއް ހިމެނޭ ސަންސްކްރީން ބޭނުން ކުރުން މަނާވާނެ އެވެ. އެއީ އޮކްސިބެންޒޯން، އޮކްޓިނޮކްސޭޓް، 4-މެތިލްބެންޒިލިޑީން ކެމްފޯ އަދި ބިޔުޓިލްޕެރެބެން ކެމިކްލްތަކެވެ.
ތައިލޭންޑުން ބުނީ އެ ކެމިކަލްތަކުގެ ސަބަބުން މުރަކަ އާއި ފަރުތައް އާލާވުމަށް ހުރަސް އެޅޭ ކަމަށާއި ބޮޑެތި ގެއްލުންތަކެއްވާ ކަމަށާއި ފަރުތައް ހުދުވުން ނުވަތަ ބްލީޗްވުމުގެ މައްސަލައަށް މަގުފަހި ކުރުވާ ކަމަށް ސައިންސްގެ ހެކިތަކުން ސާބިތުވާ ކަމަށެވެ.
މީގެ ކުރިން މިފަދަ ސަންސްކްރީން ބޭނުން ކުރުން މަނާކޮށްފައިވާ ތަންތަނަކީ ޕެސިފިކް ކަނޑުގައި އޮންނަ ޖަޒީރާ ގައުމެއް ކަމަށްވާ ޕަލާއޫ އާއި އެމެރިކާ އައިލެންޑް ސްޓޭޓް ހަވާއީ އެވެ.
ތައިލޭންޑުގައި އަލަށް އަމަލު ކުރަން ފެށި ގަވާއިދާ ހިލާފުވާ ފަރާތްތަކަށް 3،000 ޑޮލަރުގެ ޖޫރިމަނާއެއް އައުން އެކަށީގެންވެ އެވެ. އެ ގަވާއިދު ތަންފީޒު ކުރާނެ ގޮތެއް ހާމަކޮށްފައެއް ނުވެ އެވެ.
