ވަގަށް ނަގައި މަރާލާފައިވާ ނޫސްވެރިޔާ އަހުމަދު ރިލްވާން އަބްދުﷲގެ މަރުގެ މައްސަލައިގައި އިއްޔެ ރިޔާސީ ކޮމިޝަނަށް ހާޒިރު ކުރުމުން ސުވާލުތަކަށް ޖަވާބުނުދެއްވީ ކުރާ ތުހުމަތުތައް ސާފުކޮށް ނުދެއްވުމުން ކަމަށް އެމަނިކުފާނުގެ ވަކީލު ޑރ. މުހައްމަދު ޖަމީލް އަހުމަދު ވިދާޅުވެއްޖެ އެވެ.
ގެއްލުވާލާފައިވާ މީހުންނާއި ގޮތް ނޭނގޭ މަރުތައް ތަހުގީގު ކުރާ ކޮމިޝަނުން އިއްޔެ ބުނެފައި ވަނީ މުހިންމު ކަންތައްތަކެއް އޮޅުންފިލުވުމަށް އިއްޔެ ޔާމީން ހާޒިރުކުރި ނަމަވެސް "ތަކުރާރުކޮށް ފުރުސަތު ދިނުމުން ވެސް" އެމަނިކުފާނު ހުންނެވީ ހަނު ކަމަށެވެ.
އެކަމަކު، ގާނޫނު އަސާސީން ލިބިދޭ ހަނު ހުރުމުގެ ހައްގުގެ ބޭނުން ޔާމީން ކުރެއްވިތޯ އެމަނިކުފާނުގެ ގާނޫނީ ވަކީލު އަދި ކުރީގެ ނައިބު ރައީސް ޖަމީލް އާ "އަދަދު" އިން ސުވާލު ކުރުމުން ވިދާޅުވީ "އެމަނިކުފާނަށް ކުރާ ތުހުމަތުތަކަށް އިންކާރު ކުރެއްވި" ކަމަށެވެ. ނަމަވެސް ޔާމީންގެ މައްޗަށް "ކުރާ ތުހުމަތު ކޮމިޝަނަށް ސާފުނުކޮށްދެވުމުން، އިތުރަށް ޖަވާބުނުދެއްވީ" ކަމަށް ޖަމީލް ވިދާޅުވި އެވެ.
ކުރީގެ ރައީސް ޔާމީންގެ ތަހުގީގު މަރު ކޮމިޝަނުން ގެންދާ ގޮތާ ގުޅޭ ގޮތުން ޖަމީލް ވަނީ ވަރަށް ބޮޑަށް ފާޑުވިދާޅުވެފަ އެވެ. އެގޮތުން ކޮމިޝަނުގެ މެމްބަރަކު ރައީސް ޔާމީންއާ މުއާމަލާތް ކުރެއްވުމުގައި ހަޅޭއްލަވައި ހެއްދެވި ކަމަށް ވިދާޅުވެ މެމްބަރުންގެ މުސްތަގިއްލުކަމާ މެދު ވެސް ޖަމީލް ސުވާލު އުފެއްދެވި އެވެ.
"ކޮމިޝަން މަސައްކަތް ކުރަނީ ސަރުކާރުގެ އޯޑަރަށް ކަމަށާއި އެއީ މިނިވަން މުސްތަގިއްލު ބައެއް ނޫން ކަމަށް އަޅުގަނޑުމެން މި ބުނާ ބުނުމަށް ބާރު ލިބެނީ މި ގޮތަށް [ކޮމިޝަނުން] އަމަލު ކުރީމަ،" ޖަމީލް ވިދާޅުވި އެވެ.
މަރުގެ ކޮމިޝަނުގެ މެމްބަރު މިސްބާހު އައްބާސް މި ނޫހާ ވާހަކަ ދައްކަވަމުން އިއްޔެ ވިދާޅުވެފައި ވަނީ ރައީސް ޔާމީން ކޮމިޝަނަށް ހާޒިރު ކުރީ "އެމަނިކުފާނުގެ މައްޗަށް ކުރެވިފައިވާ ތުހުމަތުތަކާ ގުޅިގެން ސުވާލުކޮށް އޮޅުންފިލުވަންޖެހޭ މުހިންމު ކަންތައްތަކެއް ހުރުމުން" ކަމަށެވެ.
"ރިލްވާންގެ އާއިލާ އާއި އެހެންނިހެން ރައްޔިތުން ވެސް ބޭނުންވާނެ ގޮތަކީ ކޮމިޝަނުން ކޮށްފައިވާ ތުހުމަތުތަކަށް ކުރީގެ ރައީސް އަބްދުﷲ ޔާމީން ފުރިހަމައަށް ޖަވާބުދާރީވެވަޑައިގަތުން. ނަމަވެސް ކޮމިޝަނަށް ހާޒިރުކޮށް ތަކުރާރުކޮށް ފުރުސަތު އެރުވުމުން ވެސް ދައުލަތުގެ އެންމެ މަތީ މަގާމް އަދާ ކުރައްވާފައިވާ އެފަދަ ބޭފުޅަކު އެއްބާރުލުން ނުދެއްވާ ހަނު ހުންނަވާފައިވާތީ ކޮމިޝަނުން ހިތާމަ ކުރަން،" އޭނާ ވިދާޅުވި އެވެ.
މަރުތައް ތަހުގީގު ކުރާ ކޮމިޝަނުން މިއަދު ކުރީގެ ރައީސް ޔާމީންއާ ސުވާލު ކުރާއިރު، ސެޕްޓެމްބަރު، 2019 ގައި ބޭއްވި ނޫސްވެރިންގެ ބައްދަލުވުމެއްގައި އެ ކޮމިޝަނުގެ އޭރުގެ ރައީސް ހުސްނުއްސުއޫދު ވިދާޅުވެފައި ވަނީ ރިލްވާން މައްސަލައިގައި ޔާމީންއަށް ދައުވާ ކުރެވޭނެ ހެކި ލިބިފައި ނެތް ކަމަށެވެ.
މިނިވަން ނިއުސްގައި މަސައްކަތް ކުރި ނޫސްވެރިޔާ ރިލްވާން ގެއްލުވާލާފައި ވަނީ އޯގަސްޓް 7، 2014 ގަ އެވެ. ޓެރަރިސްޓު ޖަމާއަތް އަލް-ގައިދާ އަށް ނިސްބަތްވާ ދިވެހި ބަޔަކު ރިލްވާން މަރާލުމަށްފަހު ކަނޑު ފެއްތި ކަމަށް މަރު ކޮމިޝަނުން ބުނެފައި ވަނީ ވެސް ސެޕްޓެމްބަރު، 2019، ގައި ބޭއްވި ނޫސްވެރިންގެ ބައްދަލުވުމުގަ އެވެ.
ރިލްވާން މަރާލީ އޭނާއަކީ މުރުތައްދެއް ކަމަށް ކަނޑައަޅައި އެ ޖަމާއަތް ތެރޭގައި ހުކުމް ކުރުމަށްފަހު ދީނުގެ ނަމުގައި ކަމަށް ވެސް މަރު ކޮމިޝަނުން ބުންޏެވެ. އަދި ރިލްވާން މަރާލީ ޝަހާދަތުގެ ދެކަލިމަ އޭނާ ކިޔައި ކިޔައި އޮއްވާ ކަމަށް ވެސް ކޮމިޝަނުން ހާމަ ކުރި އެވެ.
ރައީސް އިބްރާހިމް މުހައްމަދު ސޯލިހު ވެރިކަމަށް ވަޑައިގެންނެވި ފުރަތަމަ ދުވަހު އުފެއްދެވި މަރުތައް ތަހުގީގު ކުރާ ކޮމިޝަނުން ބުނެފައި ވަނީ ރިލްވާން މަރާލި މީހުންނަކީ ހަނގުރާމައަށް ދިޔުމަށް ރާއްޖެއިން މީހުން ރެކްރޫޓު ކުރުމުގެ އިތުރުން މަސްތުވާތަކެތި ވިއްކުމާއި މި ބާވަތުގެ ކުށްތަކަށް ވެސް އަރައިގަންނަ ބައެއް ކަމަށެވެ.
