ޔޫތު އެންޑް ސްޕޯޓްސް މިނިސްޓަރު އަހުމަދު މަހްލޫފުގެ މައްޗަށް ކޮރަޕްޝަނުގެ ދައުވާކުރުމުގެ މައްސަލަ، މި ވަގުތު ފޯކަސްގައި ނެތް ކަމަށާއި އެކަމަކު އަންނަ ހަފްތާ ގޮތެއް ނިންމޭނެ ކަމަށް އުއްމީދު ކުރައްވާ ކަމަށް ޕްރޮސެކިއުޓާ ޖެނެރަލް (ޕީޖީ) އަލްއުސްތާޒް ހުސެއިން ޝަމީމް ވިދާޅުވެއްޖެ އެވެ.
އެމްއެމްޕީއާރްސީގެ މައްސަލައިގައި މަހުލޫފުގެ މައްޗަށް ކޮރަޕްޝަނުގެ ދައުވާކޮށްދިނުމަށް އެދި އެންޓި ކޮރަޕްޝަން ކޮމިޝަން (އޭސީސީ) އިން ޕީޖީ އޮފީހަށް ފޮނުވީ މިދިޔަ ޖޫން 9 ވަނަ ދުވަހު އެވެ. އަދި އެ ދުވަހުން ފެށިގެން ރައީސް އިބްރާހިމް މުހައްމަދު ސޯލިހު ވަނީ މަހުލޫފު ވަޒީފާ އިން ސަސްޕެންޑްކުރައްވައިފަ އެވެ.
ފުލުހުންނާއި ޕީޖީ އޮފީހާއި އޭސީސީ އަދި އެސެޓް ރިކަވަރީ ކޮމިޝަން ގުޅިގެން ހިންގާ އެމްއެމްޕީއާރްސީގެ ހިޔާނާތުގެ ތަހުގީގުގެ ތެރެއިން ފެބްރުއަރީ މަހު ތަހުގީގު ނިންމި މި މައްސަލައިގައި ދައުވާކުރާނެތޯ ހަފުތާއެއްގެ ތެރޭ ނިންމާނެ ކަމަށް ޕީޖީން އެންމެ ފުރަތަމަ ބުންޏެވެ. އެކަމަކު ނުނިމި އޭގެ ފަހުން ވެސް އެތައް ތާރީހެއް ދިނެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަ ކޮށްލުމަށް ދިން ބޮމުގެ ހަމަލާއާ ގުޅޭގޮތުން އިއްޔެ ބޭއްވި ނޫސްވެރިންގެ ބައްދަލުވުމުގައި، މަހުލޫފްގެ މައްސަލައާ ގުޅޭގޮތުން ސުވާލު ކުރުމުން ޝަމީމް ވިދާޅުވީ މިވަގުތު ޕީޖީ އޮފީހުގެ ފޯކަސް އޮތީ ނަޝީދަށް ދިން ހަމަލާގެ ބައިވެރިންނަށް ދައުވާކުރުމުގެ މައްސަލަ އަށް ކަމަށެވެ.
"އަޅުގަނޑު މި އުއްމީދު ކުރަނީ އަންނަ ހަފްތާގެ ތެރޭގައި ތި ވިދާޅުވި [މަހްލޫފް މައްސަލައިގައި] ކަންތައްތަކާ ގުޅޭގޮތުން ޖަވާބެއް އެރުވޭނެ ކަމަށް،" ޝަމީމް ވިދާޅުވި އެވެ.
ޝަމީމް ވިދާޅުވީ ޕީޖީ އޮފީހުން މައްސަލައެއް ކޯޓަށް ފޮނުވަން އާއްމުކޮށް ނަގަނީ ހަ ދުވަސް ކަމަށެވެ. ނަމަވެސް ބައެއް މައްސަލަތަށް ތަފާތު ސަބަބުތަކާ ގުޅިގެން ލަސްވާ ކަމަށް އޭނާ ވިދާޅުވި އެވެ.
މަހްލޫފް ސަސްޕެންޑް ކޮށްފައި ވަނީ މުސާރަ އާއި އިނާޔަތްތައް ލިބޭ ގޮތަށެވެ. މިނިސްޓްރީ ހިންގުން ވަގުތީ ގޮތުން ހަވާލުކޮށްފައި ވަނީ ޓޫރިޒަމް މިނިސްޓަރު ޑރ. އަބްދުﷲ މައުސޫމާ އެވެ. އެނގިފައިވާ ގޮތުގައި ސީދާ މިނިސްޓަރެއް ނެތުމުން އެތަނުގެ ކަންކަން ނިންމުމުގައި ކޮންމެވެސް ވަރެއްގެ ލަސްތަކެއް ވަނީ ކުރިމަތިވެފަ އެވެ.
މަހްލޫފުގެ މައްސަލަ ޕްރެޒިޑެންޝަލް ކޮމިޝަން އޮން ކޮރަޕްޝަން އެންޑް އެސެޓް ރިކަވަރީ (ޕީސީސީއާރް) އިން ފުލުހުންނަށް ފޮނުވުމުން ވެސް ގިނަ ދުވަސްތަކެއް ވަންދެން ވަކި ގޮތެއް ނުނިމި އޮތެވެ.
ޔޫތު މިނިސްޓަރު އަހުމަދު މަހްލޫގެ މައްޗަށް ކުރަނީ ރިޝްވަތު ހިފި ކަމުގެ ތުހުމަތު: މައްސަލަ ޕީޖީގައި އޮންނަތާ ދެ މަސް ވާއިރު އެކަމާ ގުޅިގެން ގޮތެއް ނުނިންމާ-- އާޓް ވޯކް: އަބްދުﷲ ޝަފީއު(އަބޯ)
މަހުލޫފްގެ މައްޗަށް ބޮޑެތި ތުހުމަތުތަކެއް
މަހްލޫފްގެ މައްޗަށް ހިޔާނާތުގެ ދައުވާ އުފުލައިދޭން އޭސީސީން އެދުނީ، އެމްއެމްޕީއާރްސީ މެދުވެރިކޮށް ހިންގި ހިޔާނާތުގައި، 33،000 ޑޮލަރު ރިޝްވަތުގެ ގޮތުގައި ނެގި ކަމަށް ތުހުމަތުކުރާ މައްސަލައިގަ އެވެ.
މަހްލޫފްގެ މައްޗަށް ދައުވާކޮށްދޭން އެދި ޕީޖީއަށް ފޮނުވުމަށް ފަހު އޭސީސީން ނެރުނު ބަޔާނުގައި ބުނީ އެމްއެމްޕީއާރްސީގެ ފައިސާ އިން މަނީ ލޯންޑްރިން ހިންގި ކުންފުނި އެސްއޯއެފުން މަހްލޫފަށް ޖަމާކޮށްދިން 33000 ޑޮލަރަކީ ސިޔާސީ ގޮތުން ބޭނުންވި ވަކި މަގްސަދުތަކެއް ހާސިލްކުރުމުގެ މުގާބިލްގައި ދީފައިވާ ފައިސާއެއްކަން ތަހުގީގަށް އެނގިފައިވާ ކަަމަށެވެ.
އޭގެ ތެރޭގައި ރައްޔިތުންގެ މަޖިލީހުގެ މެމްބަރެއްގެ ގޮތުގައި ހުންނަވައި ސްޕެޝަލް އިކޮނޮމިކް ޒޯން (އެސްއީޒެޑް)ގެ ބިލަށް ވޯޓު ދިނުމާއި ޕީޕީއެމްގައި ދެމިހުރުމުގެ މުގާބިލްގައި ލިބިފައިިވާ ފައިސާ ކަމަށް ވަނީ ތުހުމަތުކޮށްފަ އެވެ.
އޭސީސީން ބުނިގޮތުގައި މެލޭޝިއާގައި ހުންނެވުމަށް ފަހު މަހްލޫފް ރާއްޖެ ވަޑައިގަތީ އެސްއީޒެޑް ބިލް ފާސްކުރަން އޮތް ދުވަހު ސީދާ ވޯޓަށެވެ. އެ ބިލް ފާސްކުރީ އޮގަސްޓް 27، 2014، ގަ އެވެ.
އެމްއެމްޕީއާރްސީގެ ބޮޑު ހިޔާނާތުގައި އިސްކޮށް އުޅުއްވި ކުރީގެ ނައިބު ރައީސް އަހްމަދު އަދީބު، މަހްލޫފަށް ޗެކަކުން ފައިސާ ޖަމާކުރެއްވީ ސަރުކާރާ އެއްކޮޅަށް އެ ބިލް ފާސްކުރަން ވޯޓު ދެއްވުމަށް ކަމަށް ތަހުގީގުން އެނގެން އޮތް ކަމަށް އޭސީސީން ބުންޏެވެ.
ކޮމިޝަނުން ބުނިގޮތުގައި އެ ފައިސާ އަކީ ޑޮލަރު ގަނެ ވިއްކުމުގެ މުއާމަލާތެއް ކަން ދެއްކުމުގެ ގޮތުން އެސްއޯއެފްގެ ނަމުގައި ތައްޔާރުކޮށްފައިވާ ޕޭމަންޓް ރިސީވްޑް ލިއުމެއް މަހްލޫފްގެ ފަރާތުން ހުށަހަޅާފައިވެ އެވެ. އެކަމަކު އެ ފައިސާ އަކީ ޑޮލަރު ގަތުމަށް ދިން ފައިސާކަން އެނގެން ނެތް ކަމަށް އޭސީސީން ބުންޏެވެ.
މަހްލޫފްގެ މައްޗަށް ހިޔާނާތުގެ ދައުވާކުރަން ފޮނުވީ އޭނާ އަށް ލިބިފައި ވަނީ ރިޝްވަތުގެ ފައިސާކަން ހެކިންގެ ބަހުންނާއި ތަހުގީގުން ލިބިފައިވާ ހެއްކާއި ގަރީނާއިން އެނގެން އޮތުމުން ކަމަށް އޭސީސީން ބުންޏެވެ.
މަހްލޫފް އޭސީސީއަށް ދީފައިވާ ސިޓީ އާއި ބަޔާނަކީ ޑޮލަރު ގަނެ ވިއްކުމުގެ މުއާލަމާތަކީ ސައްހަ މުއާމާލަތެއްކަން ދައްކައި އޮޅުވާލަން ދީފައިވާ ލިއުންތަކެއް ކަމަށް ކޮމިޝަނުން ބުންޏެވެ. އެހެންވެ އޭނާގެ މައްޗަށް ވަނީ ރަސްމީ އިދާރާއަކަށް ދޮގު މައުލޫމާތު ދީފައިވާ މައްސަލައިގައި ވެސް ދައުވާ އުފުލައިފަ އެވެ.
މި ތުހުމަތު މަހްލޫފް ދޮގު ކުރައްވަ އެވެ.
އޭނާ ވިދާޅުވި ގޮތުގައި އެމްއެމްޕީއާރުސީ މައްސަލައިގައި ފެށުނީއްސުރެން އޭނާއާ މެދު އަމަލުކުރަމުން އައީ ޒާތީކޮށް ސިޔާސީ ގޮތުން ކަތިލާ ކަންބަޅިއެއްގެ ގޮތަށެވެ. އެކަން އެގޮތަށް ކުރަނީ ވެސް ސިޔާސީ ބަޔަކު އަޑީގައި ތިބެގެންކަން އެންމެ އިސްވެރިންނަށް އެނގިވަޑައިގަންނަވާ ކަމަށާއި ބޭނުމަކީ ހަމައެކަނި މަގާމުން ވަކިކުރުން ކަމަށް ވިދާޅުވި އެވެ.
މި މައްސަލައިގައި އެންމެ ފަހުން މަހްލޫފް ފޭސްބުކްގައި ވިދާޅުވެފައި ވަނީ އެމްއެމްޕީއާރްސީގެ ހިޔާނާތަށް ތުހުމަތުކޮށް އޭނާގެ މައްޗަށް ދައުވާކުރަން ފޮނުވާފައިވާ މައްސަލައިގައި ހެކި ހޯދާފައި ވަނީ ގާނޫނާ ހިލާފަށް ކަމަށެވެ. އެހެންކަމުން އެ ދައުވާ ފުރިހަމަ ނުކުރެވޭނެ ކަމަށް ވިދާޅުވި އެވެ.
