ތުރުކީގައި މި މަހު ކުރިއަށްގެންދާ ބެޑްމިންޓަން ދުނިޔޭގެ ފެޑެރޭޝަން (ބީޑަބްލިއުއެފް) އިން ބަލައިގަންނަ މުބާރާތެއް ކަމަށްވާ ތުރުކީ ޖޫނިއާ އޯޕަންގައި ވާދަކުރުމުގެ ފުރުސަތު ޒުވާން ބެޑްމިންޓަން ކުޅުންތެރިޔާ ހައިޝަމް އިބްރާހިމް އަލީ އަށް ރިވައިވަލް ސްޕޯޓްސް ކްލަބް އިން ހޯދައިދީފި އެވެ.
ވ. ކެޔޮދޫ އަށް އުފަން ހައިޝަމް، 17، އަކީ މިދިޔަ އަހަރު ސްކޫލް ނިމުނު ގޮތަށް ރިވައިވަލް ސްޕޯޓްސް ކްލަބާ ގުޅުނު ކުޅުންތެރިއެކެވެ. ރިވައިވަލް އިން ޒުވާން ބެޑްމިންޓަން ކުޅުންތެރިންނަށް ރަނގަޅު ފުރުސަތުތަކެއް ތަނަވަސްކޮށްދޭން ފެށި ސްކޮލަޝިޕް ޕްރޮގްރާމްގައި ބައިވެރިވެ، ހައިޝަމް އަންނަނީ ފުލް ޓައިމް ކުޅުންތެރިއެއްގެ ގޮތުގައި ރިވައިވަލްގެ ހައި ޕާފޯމަންސް ޓީމާ އެކު ފަރިތަކުރަމުންނެވެ.
ރިވައިވަލް އިން ދިން ފުރުސަތެއްގައި ތުރުކީ މުބާރާތުގައި ވާދަކުރަން ހައިޝަމް ރޭ ވަނީ ތުރުކީ އަށް ފުރައިފަ އެވެ.
ރިވައިވަލް ސްޕޯޓްސް ކްލަބްގެ ކޯޗު ނަޝްފާން މުހައްމަދު ބުނީ ރިވައިވަލްއާ އެކު ހައިޝަމް ފަރިތަކުރަމުން އައި މި މަދު ދުވަސްކޮޅުގެ ތެރޭގައި ދެއްކި ރަނގަޅު ކުޅުމަށް ބަލާފައި ކްލަބުން ނިންމީ ތުރުކީ މުބާރާތުން ހައިޝަމް އަށް ފުރުސަތު ދިނުމަށް ކަމަށެވެ.
ގައުމީ ޓީމުގެ ކުރީގެ ކުޅުންތެރިޔާ ނަޝްފާން ބުނީ މިއީ ހައިޝަމް ބައިނަލްއަގުވާމީ މުބާރާތެއްގައި ވާދަކުރާ ފުރަތަމަ ފަހަރު ކަމަަށް ވުމުން އުއްމީދު ކުރަނީ މި މުބާރާތުން އޭނާ އަށް ވަރަށް ގިނަ ކަންތައްތަކެއް ދަސްވެގެންދާނެ ކަމަށެވެ.
"ކުރިއަށް މި ހުރި އިތުރު މުބާރާތްތަކަށް ދިއުމަށް ލިބޭނެ އިތުރު ހިތްވަރެއް މިއީ ހައިޝަމް އަށް،" ނަޝްފާން ބުންޏެވެ.
އޭނާ ބުނީ ބެޑްމިންޓަން އިން ކުރިއަށްދާން ބޭނުންވާ ކުދިންނަށް ރިވައިވަލް އިން ފުރުސަތު ހުޅުވާލެވިފައިވާ ކަމަށެވެ.
ރިވައިވަލްގެ އެސިސްޓަންޓް ކޯޗު އަފްޝީން (ވ) ޕްރެކްޓިހުގެ ތެރެއިން ހައިޝަމް އަށް ކިޔައިދެނީ.-- ފޮޓޯ: ހުސެއިން ޝަޔާހު/ އަދަދު
ތުރުކީ އަށް ފުރުމުގެ ކުރިން ހައިޝަމް "އަދަދު" އަށް ބުނީ މިއީ ކެރިއަރެއް ގޮތަށް ބެޑްމިންޓަން ނަގައިގެން މުސްތަގުބަލެއް ހޯދަން ލިބުނު ވަރަށް ރަނގަޅު ފުރުސަތެއް ކަމަށެވެ.
"ރާއްޖެ އަށް. ރަށަށް (ކޮޔެދޫ އަށް) ދެން ފެމިލީ (އާއިލާ) އަށް ވަނައެއް ހޯދައިދޭން ބޭނުންވަނީ. ޓީމު (ރިވައިވަލް) އާއި ކޯޗު ވެސް ހިމެނޭ ގޮތަށް ކާމިޔާބު ހޯދަން ބޭނުމީ،" ހައިޝަމް ބުންޏެވެ.
ތުރުކީގެ މުބާރާތް ކުރިއަށްދާނީ މި މަހު 9-12 އަށެވެ. މި މުބާރާތުގައި ހައިޝަމް ކުޅޭ ފުރަތަމަ މެޗުގައި މި މަހު ނުވަ ވަނަ ދުވަހު ބައްދަލުކުރާނީ ތުރުކީގެ ކުޅުންތެރިއެއް ކަމަށްވާ ހަނީފީ މުޓްލޫއާ އެވެ.
މި މުބާރާތުގައި ހައިޝަމްގެ ކޯޗެއްގެ ގޮތުގައި އޭނާއާ އެކު މަސައްކަތް ކުރާނީ ރިވައިވަލްގެ އެސިސްޓަންޓް ކޯޗު ހަސަން އަފްޝީން އެވެ.
ޕްރޮފެޝަނަލް ބެޑްމިންޓަން ކްލަބެއް ގޮތުގައި ހިންގަމުން އަންނަ ރިވައިވަލްގެ އެންމެ އިސް އެއް މަގުސަދަކީ ފެންވަރު ރަނގަޅު ބެޑްމިންޓަން ކުޅުންތެރިންތަކެއް އުފައްދައި ރަނގަޅު ފުރުސަތުތަކެއް އެ ކުޅުންތެރިންނަށް ހޯދައިދިނުމެވެ.
އެގޮތުން އެ ކްލަބަށް ދެ އަހަރު ފުރުމާ އެކު ހާއްސަ އަހައްމިއްޔަތެއް ދީގެން ފެށި އެއް މަސައްކަތަކީ ރަނގަޅު ކުޅުންތެރިން ހޯދައި ސްކޮލަޝިޕް ދީގެން ކުޅުންތެރިން ތަމްރިން ކުރުމުގެ މަސައްކަތެވެ. ރިވައިވަލްގެ ވިސްނުމަކީ ހައިޝަމް ފަދަ އިތުރު ހުނަރުވެރި ކުޅުންތެރިންތަކެއް ހޯދައި، ބެޑްމިންޓަނުން ކުރިއަށްދާން މަގުކޮށައިދިނުމެވެ.
