"މިނިވަންކަމުގެ ދިފާއުގައި ދިވެހީން"ގެ ނަމުގައި އިދިކޮޅު ޕްރޮގްރެސިވް ޕާޓީ އޮފް މޯލިޑިވްސް (ޕީޕީއެމް) އިން ފަށާފައިވާ ކެމްޕެއިނާ ގުޅުމަށް އެމްޑީޕީ ފިޔަވާ އެހެން ހުރިހާ ސިޔާސީ ޕާޓީތަކަކަށް އެ ކޯލިޝަނުން ދައުވަތު ދީފި އެވެ.
އެ ކެމްޕޭނަކީ ރައީސް އަބްދުﷲ ޔާމީން އަބްދުލްގައްޔޫމްގެ އިސްނެންގެވުމާއެކު މިނިވަންކަން ދިފާއު ކުރުމަށް ކަމަށް ބުނެ މިިދިޔަ ހުކުރު ދުވަހު ފެށި ކެމްޕެއިނެކެވެ.
އިދިކޮޅު ކޯލިޝަންގެ ތަރުޖަމާން ހީނާ ވަލީދު "އަދަދު" އަށް ވިދާޅުވީ އެ ކެމްޕެއިނާ ގުޅުމަށް ޖުމްހޫރީ ޕާޓީ، އަދާލަތު ޕާޓީ، އެމްއާރުއެމް، އެމްޑީއޭ އަދި އެ ޕާޓީތަކުގެ ލީޑަރުންނަށް ރަސްމީކޮށް މިއަދު ސިޓީ ފޮނުވާފައިވާ ކަމަށެވެ.
އިދިކޮޅުން މިއަދު ދައުވަތު ފޮނުވި ޕާޓީތަކުގެ ތެރެއިން އެމްޑީއޭ ފިޔަވައި ދެން ތިބި ތިން ޕާޓީއަކީ ސަރުކާރު ހިންގާ ކޯލިޝަންގެ ހިއްސާ އޮތް ޕާޓީތަކެވެ.
ކެމްޕެއިން ފެށުމަށް ޕީޕީއެމުން ބޭއްވި ޖަލްސާގައި، އިދިކޮޅު ކޯލިޝަންގެ ވަގުތީ ލީޑަރު އަބްދުއްރަހީމް އަބްދުﷲ ވަނީ އެމްޑީޕީގެ ރައީސް މުހައްމަދު ނަޝީދު ވެސް އެ ކެމްޕެއިންގައި ބައިވެރިވުމަށް ދައުވަތު އަރުވާ ކަމަށް ވިދާޅުވެފަ އެވެ. ނަމަވެސް ރަސްމީކޮށް ސިޓީ ފޮނުވިއިރު އެމްޑީޕީ ނުހިމެނެ އެވެ.
އަބްދުއްރަހީމް ވިދާޅުވީ، ދިވެހިންގެ މިނިވަންކަން ދިވެހިންގެ އަތުން ބީވެގެން ދާތަން މިހާރު ފެންނަ ކަމަށެވެ. އަދި ގައުމު ސަލާމަތް ކުރަން އެ ޕާޓީ އާއި އެހެން ޕާޓީތަކުގެ ހުރިހާ އެންމެން ވެސް ގުޅިގެން މަސައްކަތް ކުރަން ޖެހޭ ކަމަށް ވިދާޅުވި އެވެ.
މީގެއިތުރުން ކުރީގެ ހޯމް މިނިސްޓަރު އުމަރު ނަސީރާއި އެމްއެންޕީގެ ނަމުގައި އާ ސިޔާސީ ޕާޓީއެއް އުފެއްދެވުމަށް މަސައްކަތްކުރައްވާ ދަނގެތީ ދާއިރާގެ މެމްބަރު މުހައްމަދު ނާޒިމަށް ވެސް އެ ހަރަކާތުގައި ބައިވެރިވުމަށް އަބްދުއްރަހީމް ވަނީ ދައުވަތު އަރުވާފަ އެވެ.
ރައީސް އިބްރާހިމް މުހައްމަދު ސޯލިހްއާ ސިޔާސީ ގޮތުން ހިޔާލު ތަފާތުވެފައިވާ ނަޝީދު މިފަހުން ވަނީ އިދިކޮޅު ކޯލިޝަނާ ގުޅިގެން މަސައްކަތް ކުރުމުގެ ޝައުގުވެރިކަން ފާޅު ކުރައްވައިފަ އެވެ. ނަމަވެސް އިދިކޮޅު ކޯލިޝަނުން އެކަމަށް މަރުހަބާ ކިޔާފައެއް ނުވެ އެވެ.
އިދިކޮޅު ކޯލިޝަނުން ބުނީ އެއީ ނަޝީދާއި ރައީސް ސޯލިހާ ދެމެދު ޖެހިގެން އުޅޭ މައްސަލައެއް ކަމަށާއި އެކަމުގެ ތެރެއަށް ވަންނަން ބޭނުން ނުވާ ކަމަށެވެ.
