ޓޯކިޔޯ (ޖުލައި 29) - ޖަޕާނުގެ ޓޯކިޔޯގައި ކުރިއަށްދާ އޮލިމްޕިކްސްގެ ޝޫޓިން އިވެންޓުން ސެން މެރީނޯގެ އަލެސަންދްރޯ ޕެރީލީ، މިއަދު ހޯދި ލޯ މެޑަލާ އެކު އޮލިމްޕިކްސްގެ ތާރީހުގައި މެޑަލެއް ހޯދި އެންމެ ކުޑަ ގައުމުގެ ޝަރަފް އެ ގައުމަށް ލިބިއްޖެ އެވެ.
މީގެ ހަފްތާއެއްހާ ދުވަސް ކުރިން މި ފަހަރުގެ އޮލިމްޕިކްސްގެ ޓްރައެތްލޯން އިވެންޓުން އަންހެން އެތުލީޓު ފްލޯރާ ޑަފީ ވަނީ ރަން މެޑަލެއް ހޯދައި އޮލިމްޕިކްސްގެ ތާރީހުގައި މެޑަލެއް ހޯދި އެންމެ ކުޑަ ގައުމުގެ ރެކޯޑް ބާމިއުޑާ އަށް ހޯދައިދީފަ އެވެ.
ބާމިއުޑާގެ އާބާދީ އަކީ 63,918 މީހުންނެވެ. ބާމިއުޑާގެ ރެކޯޑް މިއަދު މުގުރާލީ 33,860 މީހުންގެ އާބާދީ އެއް އޮންނަ ސެން މެރީނޯ އިންނެވެ. އެންމެ މަދު މީހުން ދިރިއުޅޭ ގައުމަކުން އޮލިމްޕިކްސްގައި ރަން މެޑަލް ހޯދުމުގެ ރެކޯޑް އަދިވެސް އޮތީ ބާމިއުޑާ އަތުގަ އެވެ. އެއީ ސެން މެރީނޯ އިން ރެކޯޑް ހެދީ ލޯ މެޑަލެއް ހޯދައިގެން ކަމަށްވާތީ އެވެ.
ސެން މެރީނޯގެ އެންމެ މޮޅު އެތުލީޓުގެ މަގާމު ހަތަރު ފަހަރެއްގެ މަތިން ހޯދާފައިވާ ޕެރިލީ ވަނީ 2012 ވަަނަ އަހަރުގެ ލަންޑަން އޮލިމްޕިކްސްގައި ވެސް މެޑަލެއް ހޯދުމާ ގާތަށް ޖެހިލައިފަ އެވެ. އެކަމަކު އެ ފަހަރު އޭނާ ދިޔައީ ހަތަރު ވަނަ އެވެ. މި ފަހަރު ވެސް ހަތަރު ވަނަ އަށް ދިއުމާ ގާތުގައިވަނިކޮށް ފަހު ވަގުތު ހިތްވަރުކޮށްގެން ޕެރިލީ ތިން ވަނަ ހޯދީ އެވެ.
ޕެރީލީ (ވ) އޭނާގެ ކޯޗާ އެކު ސެން މެރީނޯގެ ދިދަ ހިފައިގެން.-- ފޮޓޯ: އޭއެފްޕީ
"އަނެއްކާ ހަތަރު ވަނައިން ފަރުޖައްސާލަން ހިތެއް ބޭނުމެއް ނުވި. ވަރަށް ހިތްވަރުކޮށްގެން މެޑަލް މި ހޯދުނީ. މިއީ އަހަރެންގެ ފުރަތަމަ އޮލިމްޕިކްސް އެއް ނޫން. އެކަމަކު މިއީ އަހަރެންގެ ގައުމަށް ލިބުނު ފުރަތަމަ މެޑަލް. އެހެންވީމަ ހުރިހާ ގޮތަކުން ވެސް މި ހާއްސަވާނެ،" ރޮވިފައި ހުރެ ދިން އިންޓަވިއުގައި ޕެރިލީ ބުންޏެވެ.
"އަހަރެމެންގެ ކުޑަކުޑަ ގައުމު ވަރަށް ފަހުރުވެރިވާނެ ކަމެއް މި ކޮށްދެވުނީ،"
އުމުރުން 33 އަހަރުގެ ޕެރިލީ ބުނީ ކިތަންމެ އުނދަގޫ ހާލަތެއްގައި ވެސް މި ފަހަރުގެ އޮލިމްޕިކްސްގައި ބައިވެރިވާން ނިންމީ މެޑަލެއް ހޯދުމުގެ އުއްމީދުގައި ކަމަށާއި އެކަން ހާސިލް ކުރެވުމުން ވަރަށް ހިތްހަަމަޖެހޭ ކަމަށެެވެ.
މިއީ ސެން މެރީނޯގެ 61 އަހަރުވީ އޮލިމްޕިކްސް ތާރީހުގައި ލިބުނު ފުރަތަމަ މެޑަލެވެ. ސެން މެރީނޯ އެންމެ ފުރަތަމަ އޮލިމްޕިކްސް އެއްގައި ބައިވެރިވީ 1960 ވަނަ އަހަރު އެވެ. އޭގެ ފަހުން 14 ސަމާ އޮލިމްޕިކްސް އާއި 10 ވިންޓަ އޮލިމްޕިކްސްގައި 93 އެތުލީޓުން ބައިވެރިކުރި އެވެ. އެތައް ފަހަރެއްގެ މަތިން ހުއްޓާނުލައި ކުރި މަސައްކަތުން އެންމެ ފަހުން މި ފަހަރުގެ އޮލިމްޕިކްސްގައި މެޑަލެއްގެ ނަސީބު ލިބުނީ އެވެ.
