ރައްޔިތުންގެ މަޖިލީހުގެ އިހަވަންދޫ ދާއިރާގެ ކުރީގެ މެމްބަރު މުހައްމަދު އަބްދުﷲ (މުހަންމާ) އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އާ އަލުން ގުޅިއްޖެ އެވެ.
މުހަންމާ ޕީޕީއެމާ ދެވަނަ ފަހަރަށް ގުޅުނީ އެ ޕާޓީއަށް އާ މެމްބަރުންތަކެއް ސޮއި ކުރުމަށް މިރޭ އެ ޕާޓީގެ މައި އޮފީހުގައި ބޭއްވި ރަސްމިއްޔާތެއްގަ އެވެ.
ޖުމްހޫރީ ޕާޓީގެ ޓިކެޓުގައި މަޖިލީހަށް އިންތިހާބުވިތާ މަދު ދުވަސް ކޮޅެއްގެ ތެރޭގައި އޭނާ ވަނީ އެ ޕާޓީ ދޫކުރައްވައި ޕީޕީއެމްއާ ގުޅިވަޑައިގެންފަ އެވެ.
ނަމަވެސް، އޭގެ ފަހުން އޭރުގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި މަޖިލީހުގެ ތެރެއިން ސަރުކާރާ ދެކޮޅަށް ނުކުންނެވި 12 މެމްބަރުންގެ ތެރޭގައި ހިމެނިގެން، އޭނާ ޕާޓީން ވަކިކޮށް މަޖިލީހުގެ ގޮނޑި ވެސް ސުޕްރީމް ކޯޓުގެ ތެރެއިން ގެއްލުނެވެ.
އޭގެ ފަހުން މި ސަރުކާރު އައި ފަހުން މުހަންމާ ވަނީ 2018 ވަނަ އަހަރު އެމްޑީޕީއަށް ވެސް ސޮއި ކުރައްވައިފަ އެވެ.
ޕީޕީއެމާ ގުޅުމަށްފަހު މިރޭގެ ޖަލްސާގައި ވާހަކަ ދައްކަވަމުން މުހަންމާ ވަނީ ރައީސް ޔާމީނާއި ދެކޮޅަށް މަސައްކަތް ކުރެވުނީތީ ހިތާމަކުރައްވާ ކަމަށް ވިދާޅުވެ، އެކަމަށްޓަކައި މާފަށް ވެސް އެދިވަޑައިގެންފަ އެވެ.
"އަޅުގަނޑަށް ހެދުނު ގޯހާމެދު އަދިވެސް ދެރަވޭ. ރައީސް ޔާމީނާ ވަކިވެވުނީތީ ވަރަށް ހިތާމަކުރަން. އަޅުގަނޑަށް މި ހެދުނީ ވަރަށް ބޮޑު ގޯހެއް،" މުހަންމާ ވިދާޅުވި އެވެ.
އަދި ޔާމީން އަލުން ވެރިކަމަށް ގެނައުމަށް އިދިކޮޅު ކޯލިޝަނުން ފަށާފައިވާ މަސައްކަތުގައި ފުރިހަމައަށް ބައިވެރިވާނެކަމުގެ ޔަގީންކަން ވެސް އޭނާ މިރޭ ވަނީ ދެއްވައިފަ އެވެ.
އިދިކޮޅު ޕީޕީއެމް/ޕީއެންސީ ކޯލިޝަނަށް މެމްބަރުން އިތުރުކުރުމުގެ ކެމްޕޭނެއް ފަށާފައިވާއިރު، މުހަންމާގެ އިތުރުން މިސަރުކާރުގެ ސައިންސް އެންޑް ޓެކްނޮލޮޖީ ކުރީގެ މިނިސްޓަރު މުހައްމަދު މަލީހް ޖަމާލާއި ތުލުސްދޫ ދާއިރާގެ ކުރީގެ މެންބަރު މުހައްމަދު ވަހީދު އިބްރާހީމް (ލޯޔަރު ވައްޑޭ) ވެސް ވަނީ ޕީޕީއެމްއާ އަލުން ގުޅިވަޑައިގެންފަ އެވެ.
އަދި ހެންވޭރު ދެކުނު ދާއިރާގެ ކުރީގެ މެމްބަރު އަހްމަދު އަބްދުލްކަރީމް (ރުކުމާ) ވެސް މިފަހުން ޕީޕީއެމަށް ވަނީ ސޮއި ކުރައްވައިފަ އެވެ.
