ގުދުސް (ޖުލައި 29) - އިޒްރޭލުން ވެރިވެގަނެފައިވާ ފަލަސްތީނުގެ ހުޅަނގު އައްސޭރީގައި އިޒްރޭލް ސިފައިން ބަޑި ޖަހައި ޒަހަމްކޮށްލި ފަލަސްތީނުގެ ކުޑަ ކުއްޖަކު މަރުވެއްޖެ އެވެ.
ފަލަސްތީނުގެ ހެލްތު މިނިސްޓްރީން ބުނީ އުމުރުން 12 އަހަރުގެ މުހައްމަދު އަލް އަލާމީ މަރުވީ ހިބްރޫން ސިޓީގެ ހުޅަނގު އުތުރުން އޮންނަ ބެއިތު އުމަރު އަވަށުގައި ކަމަށެވެ.
ހެލްތު މިނިސްޓްރީން ނެރުނު ބަޔާނެއްގައި ބުނީ އެ ކުއްޖާގެ މެޔަށް އިޒްރޭލް ސިފައިން ބަޑި ޖެހީ ބައްޕައާ އެކު ކާރެއްގައި ދަތުރު ކުރަމުން ދަނިކޮށް ކަމަށެވެ.
އިޒްރޭލް ސިފައިން ނެރުނު ބަޔާނެއްގައި ބުނީ ޗެކްޕޮއިންޓެއް ކައިރިން ކާރެއްގެ ތެރެއިން ފިރިހެނަކު ފައިބާ ބިންމަތި ކޮންނަން ފެށި ކަމަށާއި ސިފައިން ކައިރިވެ ކާރު ތެރެ ބެލި ކަމަށެވެ.
"ސިފައިން ވަރަށް ސަމާލުވެ ތިބި ކާރު ކައިރިއަށް ގޮސް ބެލިއިރު އޭގެ ތެރެއިން ދެ ދަބަސް ފެނުނު. އެއް ދަބަހުގައި އޮތީ މަރުވެފައިވާ ތުއްތު ކުއްޖެއްގެ ހަށިގަނޑު،" ބަޔާނުގައި ބުންޏެވެ.
އެ ކާރު އެ ތަނުން ފޮނުވާލުމުން ފަހުން ވެސް އައި ކަމަށާއި އިންޒާރު ދީގެން އެ ތަނުން ނުދިނުމުން ކާރުގެ ފުރޮޅަށް ބަޑި ޖެހި ކަމަށް ބަޔާނުގައި ވެ އެވެ.
"ބަޑި ޖެހުމުގެ ސަބަބުން ފަލަސްތީނުގެ ކުއްޖަކު މަރުވި ކަމަށް ބުނާ ބުނުން ބަލާނެ،" އިޒްރޭލް ސިފައިން ބުންޏެވެ.
މައްސަލަ ބަލާނީ ސިފައިންނާއި އަސްކަރީ ފުލުހުން ވަކިވަކިންނެވެ.
މިއީ މި ހަފްތާގައި އިޒްރޭލް ސިފައިން ބަޑި ޖަހައި މަރާލި ފަލަސްތީނުގެ ދެ ވަނަ ކުއްޖާ އެވެ. މިދިޔަ ހޮނިހިރު ދުވަހު 17 އަހަރުގެ މުހައްމަދު މުނީރް އަލް ތަމީމީ ވެސް މަރުވީ ލިބުނު ޒަހަމްތަކަށް ފަރުވާ ކުރަނިކޮށެވެ.
އޭގެ އިތުރުން މިދިޔަ އަންގާރަ ދުވަހު އުމުރުން 41 އަހަރުގެ ފަލަސްތީނު މީހެއްގެ ގަޔަށް ބަޑި ޖަހައި މަރާލި ކަމަށް ހެލްތު މިނިސްޓްރީން ބުނެ އެވެ.
ހުޅަނގު އައްސޭރީގައި އަނެއްކާވެސް ހަމަނުޖެހުން ބޮޑުވެފައި ވަނީ ބައިނަލްއަގްވާމީ ގާނޫނާ ހިލާފަށް ފަލަސްތީނުގެ ބިމުގައި ޔަހޫދީން އާބާދު ކުރަމުން ދާތީ އެވެ.
ރެޑް ކްރެސެންޓުން ބުނީ މިދިޔަ ހުކުރު ދުވަހު ފަލަސްތީނު ރައްޔިތުން އެކަމާ ދެކޮޅަށް ބޭއްވި އެއްވުމެއްގައި އެ ގައުމުގެ 320 މީހުންނަށް އަނިޔާވި ކަމަށެވެ.
