ޕެރިސް، ފްރާންސް (ޖުލައި 29) - އިޒްރޭލުގެ ކުންފުންޏަކުން އުފެއްދި ސްޕައިވެއާ ބޭނުންކޮށްގެން ގިނަ އެކްޓިވިސްޓުންނާއި، ނޫސްވެރިން އަދި ސިޔާސީ ވެރިންނަށް ޖާސޫސް ކުރި ކަމަށް ކުރާ ތުހުމަތުތަކާ މެދު ކަންބޮޑުވާ ކަމަށް އިޒްރޭލުން ބުނެފި އެވެ.
ޑިފެންސް މިނިސްޓަރު ބެނީ ގާންޓްޒް ފްރާންސަށް ކުރައްވަމުން ގެންދަވާ ދަތުރުގައި ވިދާޅުވީ އެ ތުހުމަތުތަކާ މެދު ކަންބޮޑުވާ ކަމަށާއި އެއީ ސީރިއަސް ކަމެއްގެ ގޮތުގައި އިޒްރޭލުން ދެކޭ ކަމަށެވެ. ގާންޓްޒް ވަނީ ފްރާންސްގެ ޑިފެންސް މިނިސްޓަރު ފްލޮރެންސް ޕާލީއާ ބައްދަލުކުރައްވާފަ އެވެ.
އެ ބައްދަލުވުމުގައި މަޝްވަރާ ކުރި ކަންކަމުގެ ތެރޭގައި ޕެގަސޫސް ސްޕައިވެއާ އުފައްދައިގެން ވިއްކާ އެންއެސްއޯ ގްރޫޕުން ފްރާންސަށް އެކްސްޕޯޓް ކުރި ހިދުމަތްތަކާ ގުޅޭ ގޮތުން އިޒްރޭލް ސަރުކާރުން ހެދި އެސެސްމަންޓެއް ހިމެނެ އެވެ.
ފްރާންސް ސަރުކާރުގެ ތަރުޖަމާނަކު ވިދާޅުވީ އެންއެސްއޯގެ ހަރަކާތްތަކާ ގުޅޭ ގޮތުން އިޒްރޭލުގެ ސަރުކާރަށް އިނގެނީ ކިހާ މިންވަރެއްތޯ ސާފުކުރަން މި ފުރުސަތުގެ ބޭނުން ޕާލީ ހިފާނެ ކަމަށެވެ.
"ޕާލީގެ އެދުމުގެ މަތިން ގާންޓްޒް ވަނީ މިކަމާ މެދު އިޒްރޭލުން ދެކޭ ގޮތް ހާމަކޮށްދެއްވާފައި. މި ތުހުމަތުތައް ސީރިއަސްކޮށް ނަގާ ކަމަށް ވިދާޅުވި،" ގާންޓްޒްގެ އޮފީހުން ނެރުނު ބަޔާނެއްގައި ބުންޏެވެ.
"އިޒްރޭލުން ސައިބާ ލައިސެންސް ދޫކުރަނީ ހަމައެކަނި ވަކިވަކި ގައުމުތަކަށް އަދި ދޫކުރަނީ ހަމައެކަނި ޓެރަރިޒަމާއި ބޮޑެތި ކުށްތަކާ ގުޅޭ މައްސަލަތަކުގައި ބޭނުން ކުރުމަށް،" އެ ބަޔާނުގައި ބުންޏެވެ.
އިޒްރޭލުގެ އެންއެސްއޯ ގްރޫޕުގެ ސްޕައިވެއާ ބޭނުންކޮށްގެން ގިނަ އަދަދެއްގެ ނޫސްވެރިންނާއި، އެކްޓިވިސްޓުން އަދި ސިޔާސީ ވެރިންނަށް ފާރަލަމުންދާކަން ފަޅާ އެރީ ދުނިޔޭގެ 10 ގައުމެއްގެ 17 މީޑިއާ އޯގަނައިޒޭޝަނަށް ނިސްބަތްވާ 80 އަށް ވުރެ ގިނަ ނޫސްވެރިން ގުޅިގެން ހިންގި ޕެގަސޫސް ޕްރޮޖްކެޓުގެ ދަށުންނެވެ.
އެ ޕްރޮޖެކްޓު ހިންގާފައި ވަނީ ފްރާންސްގެ އެންޖީއޯ ފޯބިޑަން ސްޓޯރީޒްގެ އެހީތެރިކަމާއެކު އެމްނެސްޓީ އިންޓަނޭޝަނަލްގެ ޓެކްނިކަލް އެހީތެރިކަން ހޯދައިގެންނެވެ.
ޓާގެޓް ކުރަން އަމާޒު ކުރި ބައެއް ފޯނުތަކުގެ ލިސްޓު ވެސް ހާމަކޮށްފައި ވާއިރު، އޭގެ ތެރޭގައި ފްރާންސްގެ ރައީސް އިމޭނުއެލް މެކްރޯން ވެސް ހިމެނިވަޑައިގަންނަވަ އެވެ. އެމަނިކުފާނަށް ފާރަލާން އެދުނީ މޮރޮކޯ އިންނެވެ. މެކްރޯން ވަނީ އެކަން ތަހުގީގު ކުރުމަށް އަންގަވާފަ އެވެ.
އެންއެސްއޯ ގްރޫޕާ މެދު ކުރާ ތުހުމަތުތައް ބެލުމަށް އިޒްރޭލުން ވަނީ އިސް އިންޓަ މިނިސްޓީރިއަލް ޓީމެއް އުފައްދާފަ އެވެ.
އޭއެފްޕީން ރިޕޯޓު ކުރި ގޮތުގައި މައްސަލަ ބަލަމުންދާ ފަރާތްތަކުން ވަނީ އެންއެސްއޯގެ އޮފީހަށް ވެސް ގޮސްފަ އެވެ. އެންއެސްއޯއިން ވަނީ އެ ކުންފުންޏާ ދެކޮޅަށް ކުރާ ހުރިހާ ތުހުމަތުތަކެއް ދޮގުކޮށްފަ އެވެ.
އެ ގްރޫޕާ ގުޅޭ ގޮތުން ހާމަވި ކަންކަން ދޮގުކޮށް ނެރުނު ބަޔާނެއްގައި އެންއެސްއޯއިން ބުނީ "ރިޕޯޓުގައިވާ ދޮގު ވާހަކަތަކާ ދެކޮޅު" ކަމަށާއި ތަހުގީގީ ރިޕޯޓު ބިނާވެފައި ވަނީ ދޮގު މައުލޫމާތުތަކާއި އަސްލެއް ނެތް ތިއަރީތަކެއްގެ މައްޗަށް ކަމަށެވެ.
އޭގެ އިތުރުން ޕެގަސޫސް ބޭނުން ކުރުމުގެ ހުއްދަ ލިބެނީ ސަރުކާރުތަކުގެ ޖާސޫސީ އިދާރަތަކާއި ގާނޫނު ތަންފީޒު ކުރާ އިދާރާތަކަށް ޓެރަރިޒަމާއި ބޮޑެތި ކުށްތައް ހުއްޓުވަން ކަމަށް އެ ކުންފުނިން ބުންޏެވެ.
ކުންފުނީގެ ކްލަޔަންޓުން ޕެގަސޫސް ސޮފްޓްވެއާ ބޭނުންކޮށްގެން ޖާސޫސް ކުރާ ވަކިވަކި ފަރާތްތަކުގެ އައިޑެންޓިޓީ ކުންފުންޏަށް ނޭނގޭ ކަމަށް އެންއެސްއޯ އިން ބުނެ އެވެ. ނަމަވެސް ޝަކުވާއެއް ލިބިއްޖެ ނަމަ، ޓާގެޓް ކުރާ މީހުންގެ ލިސްޓެއް ތައްޔާރުކޮށް، ސްޕައިވެއާގެ ބޭނުން ނަހަމަ ގޮތުގައި ކުރާ ކްލަޔަންޓުންގެ ހިދުމަތް ހުއްޓާލެވޭނެ ކަމަށް އެ ކުންފުނިން ބުންޏެވެ.
އިޒްރޭލުގެ އޮފިޝަލަކު ވިދާޅުވީ ސްޕައިވެއާ ނަހަމަ ގޮތުގައި ބޭނުން ކުރުމުން އެންއެސްއޯއިން އަޅާ ފިޔަވަޅުތަކަށް ޑިފެންސް މިނިސްޓްރީން އެއްބާރުލުން ދޭނެ ކަމަށެވެ.
