ގްލާސްގޯ (ޖުލައި 29) - ލިވަޕޫލްގެ ކޯޗުކަމުން ޔާގެން ކްލޮޕް ވަކިވުމުން ދެން އެ މަގާމާ ހަވާލުވާނީ އެ ޓީމުގެ ކުރީގެ ކެޕްޓަން އަދި މިހާރު ރޭންޖާސްގެ ކޯޗު ސްޓީވެން ޖެރާޑް ކަމަށް ބުނެ، މީޑިއާގައި ދެކެވޭ ވާހަކަތަކާ މެދު އެހާ ބޮޑަށް ނުވިސްނާ ކަމަށް އޭނާ ބުނެފި އެވެ.
ޖެރާޑް، 41، ކޯޗިން ކެރިއަރު ފެށީ ލިވަޕޫލް ޔޫތު ޓީމުންނެވެ. ޖެރާޑް، ރޭންޖާސްގެ ކޯޗުކަމާ ހަވާލުވީ 2018 ވަނަ އަހަރުގެ ޖޫން މަހުގަ އެވެ. ޖެރާޑް އެ ޓީމާ ހަވާލުވީ ހަތަރު އަހަރުގެ ކޮންޓްރެކްޓެއްގަ އެވެ. ޖެރާޑް ވަނީ މެޗަކުން ބަލިނުވެ، މިދިޔަ ސީޒަނުގައި ރޭންޖާސް އަށް ސްކޮޓްލެންޑްގެ ޗެމްޕިއަންކަން ހޯދައިދީފަ އެވެ.
ލިވަޕޫލްގެ ކޯޗު ކްލޮޕްގެ ކޮންޓްރެކްޓް ހަމަވާނީ 2024 ވަނަ އަހަރު އެވެ. ކްލޮޕްގެ އެއްބަސްވުން ހަމަވުމުން ލިވަޕޫލާ ދެން ހަވާލުވާނީ ޖެރާޑް ކަމަށް އިނގިރޭސި މީޑިއާ ތަކުން އަންނަނާނީ ތަކުރާރުކޮށް ރިޕޯޓްކުރަމުންނެވެ.
ޖެރާޑް ވަނީ މީގެ ކުރިން ވެސް ލިވަޕޫލާ ހަވާލުވާން އުޅޭ ކަމަށް ދެކެވޭ ވާހަކަތަކާ ގުޅޭ ސުވާލުތަކަށް ޖަވާބު ދީފަ އެވެ. ދާދި ފަހުން ނޫސްވެރިއަކު ކުރި އޭގެ ސުވާލަކަށް ދިން ޖަވާބުގައި ޖެރާޑް ބުނީ އެއް ވާހަކައެއް ތަކުރާރުކުރުމަކީ ރަނގަޅު ގޮތެއް ނޫން ކަމަށެވެ.
"އަހަރެން ހަވާލުވެ ހުރި ޓީމަކާ ބެހޭގޮތުންނާއި އަހަރެން ދެން ހަވާލުވާނެ ކްލަބެއް ކަމަށް މީޑިއާގައި ވާހަކަ ދެކެވޭއިރު އެއީ އަހަރެންގެ ކޮންޓްރޯލުން ބޭރުގައި ހުރި ކަންކަން. އެކަމަކު އަހަރެން ބުނަން ބޭނުން ވާހަކަ އަކީ މިއީ އަހަރެން މަރުހަބާ ކިޔާ ކަންކަމެއް ނޫން. އަހަރެން އަދި މާ ދުރަށް ނުވިސްނަން. އަހަރެން މި ވަގުތު ރޭންޖާސްގައި މި ހުރީ އުފަލުން،" ޖެރާޑް ބުންޏެވެ.
އޭނާ ބުނީ ކޮންމެ ވެސް ދުވަހަކުން އެހެން ޓީމަކުން ފެނިދާނެ ކަމަށާއި މި ވަގުތު ފޯކަސް އަކީ ރޭންޖާސްގައި ކުރަމުން އަންނަ މަސައްކަތް ރަނގަޅަށް ކުރިއަށް ގެންދިއުން ކަމަށެވެ. މީގެ ކުރިން ފޯފޯޓޫ މެގަޒިން އަށް ދިން އިންޓަވިއުއެއްގައި ކްލޮޕް ވަނީ މުސްތަގުބަލުގައި ޖެރާޑް ލިވަޕޫލަށް ކޯޗުކޮށްދޭތަން ދެކެން ބޭނުންވާ ކަމަށް ބުނެފަ އެވެ.
މި ފަހަރުގެ ޕްރީ ސީޒަން މެޗެއްގައި ޖެރާޑްގެ ރޭންޖާސް ވަނީ ރެއާލް މެޑްރިޑް ބަލިކޮށްފަ އެވެ. ޖެރާޑް ބުނީ ކުރިއަށް އޮތް ސީޒަނަކީ ވެސް ރޭންޖާސް އަށް ކާމިޔާބު އަހަރަކަށް ހެދިދާނެ ކަމަށެވެ.
"އަހަރެން ހަވާލުވި ފަހުން ސީޒަނަކަށް ފަހު ސީޒަނެއް ރަނގަޅަށް މިދަނީ. އެހެންވީމަ ކުރިއަށް އޮތް ސީޒަނުގައި ވެސް ގިނަ ކަންތައްތަކެއް ރަނގަޅަށް ކުރެވޭނެ ކަމުގެ އިތުބާރު އެބައޮތް. އެ އުއްމީދުގައި މި ހުރީ،" ޖެރާޑް ބުންޏެވެ.
ޒުވާން އުމުރުގައި ލިވަޕޫލަށް ކުޅެން ފަށައި އެ ޓީމަށް 17 އަހަރު ކުޅެދިން ޖެރާޑް އެ ކްލަބް ދޫކޮށް އެމެރިކާގެ އެލްއޭ ގެލެކްސީ އަށް ބަދަލުވީ 2015 ވަނަ އަހަރު އެވެ. ޖެރާޑް ވަނީ ލިވަޕޫލަށް 710 މެޗު ކުޅެދީފަ އެވެ. އަދި އޭނާ އަކީ އެ ކްލަބްގެ ތާރީހުގައި އެންމެ ގިނަ ދުވަހު ކެޕްޓަންކަން ކުރި ކުޅުންތެރިޔާ އެވެ.
ލިވަޕޫލާ އެކު ޖެރާޑަށް ނުލިބޭ ހަމައެކަނި ކާމިޔާބީ އަކީ އިނގިރޭސި ޕްރިމިއާ ލީގެވެ. އޭނާ ވަނީ ލިވަޕޫލާ އެކު 2005 ވަނަ އަހަރުގެ ޗެމްޕިއަންސް ލީގާއި، އެފްއޭ ކަޕް ދެ ފަހަރު، ލީގު ކަޕް ތިން ފަހަރު އަދި ޔޫއޭފާ ކަޕް އަދި ޔޫއޭފާ ސުޕަ ކަޕް އެއް ފަހަރު ކާމިޔާބު ކޮށްފަ އެވެ.
