ލަންޑަން (ޖުލައި 28) - ސެވިއްޔާގެ ފްރާންސް ޑިފެންޑަރު ޖޫލްސް ކޫންޑޭ ހޯދަން ޔޫރަޕްގެ ޗެމްޕިއަން ޗެލްސީން މަޝްވަރާތައް ފަށައިފި އެވެ.
މި ފަހަރުގެ ޓްރާންސްފާ މާކެޓްގައި ކޫންޑޭ ހޯދަން އެންމެ ފުރަތަމަ ޝައުގުވެރިކަން ފާޅުކުރީ ޓޮޓެންހަމް އިންނެވެ. ޓޮޓެންހަމް އިން އޮތީ ކޫންޑޭ ގެންނަން 25 މިލިއަން ޕައުންޑާއި ޑަވިންސަން ސަންޗޭޒް ދޭން ތައްޔާރަށެވެ. އެ ޑީލަށް ސެވިއްޔާ އިން އެއްބަސްވި ނަމަވެސް ކޫންޑޭ ދެކޮޅު ހެދި އެވެ. އެއީ ޓޮޓެންހަމް ޗެމްޕިއަންސް ލީގުގައި ނެތުމުންނެވެ.
އަންނަ އަހަރުގެ ފީފާ ވޯލްޑް ކަޕްގައި ވާދަކުރާ ފްރާންސް ސްކޮޑުން ޖާގަ ކަށަވަރު ކުރަން ރަނގަޅު ކްލަބަކަށް ދާން އުމުރުން 22 އަހަރުގެ ކޫންޑޭ ބޭނުން ވެ އެވެ. ޑިފެންސްގެ އެކި މަގާމުތަކަށް ކުޅެވޭ ކޫންޑޭ ވަނީ މި ފަހަރުގެ ޔޫރޯގައި ވާދަކުރި ފްރާންސް ޓީމުގައި ހިމެނި މެޗުތަކުގައި ކުޅެފަ އެވެ.
ކޫންޑޭގެ ސޮއި ހޯދަން ބޭނުންނަމަ ޗެލްސީން މަދުވެގެން 30 މިލިއަން ޕައުންޑް ދައްކަން ޖެހޭނެ ކަމަށް ސްޕެއިންގެ މީޑިއާ ރިޕޯޓްތައް ބުނެ އެވެ.
ފްރާންސްގެ ބޯޑޯ ބީ ޓީމުން ކެރިއަރު ފަށައި ފަހުން ސީނިއާ ޓީމަށް ވެސް ކުޅުނު ކޫންޑޭ ސެވިއްޔާ އަށް ބަދަލުވީ 2019 ވަނަ އަހަރު އެވެ. ސެވިއްޔާ އިން ވަނީ ކޫންޑޭގެ ސޮއި ހޯދަން 22 މިލިއަން ޕައުންޑްގެ ފީ އެއް ދައްކައިފަ އެވެ.
މިދިޔަ ސީޒަނުގައި މެންޗެސްޓާ ސިޓީން 20 މިލިއަން ޕައުންޑަށް ކޫންޑޭ ގަންނަން ސެވިއްޔާއާ ވާހަކަ ދެއްކި ނަމަވެސް އެ ޓީމުން އެ ގޮތަށް އެއްބަހެއް ނުވި އެވެ.
މި ފަހަރުގެ ޓްރާންސްފާ މާކެޓްގައި ޗެލްސީން ދާދި ފަހުން ވަނީ ފުލަމް އިން ދޫކޮށްލި ގޯލްކީޕަރު މާކަސް ބެޓިނެލީ ސޮއިކޮށްފަ އެވެ. އޭނާ ގެނައީ ޗެލްސީން ދޫކޮށްލި އާޖެންޓީނާގެ ގޯލްކީޕަރު ވިލީ ކަބަލޭރޯގެ ބަދަލުގަ އެވެ.
ޗެލްސީން މި ފަހަރުގެ ޓްރާންސްފާ މާކެޓްގައި ހަރަދުކުރަން ނިންމާފައިވަނީ ކުޅުންތެރިން ވިއްކައިގެން ލިބޭނެ ފައިސާ އަށް ބެލުމަށް ފަހު އެވެ. ޗެލްސީން ވިއްކާލަން މަސައްކަތްކުރާ ކުޅުންތެރިންގެ ތެރޭގައި ޓެމީ އަބްރަހަމް، ރޮސް ބާކްލޭ، ޑެނީ ޑްރިންކްވޯޓާ އަދި ރުބެން ލޮފްޓަސް-ޗީކް ހިމެނެ އެވެ.
