ޓޯކިޔޯ، ޖަޕާން (ޖުލައި 28) - މިހާރު ފަށައިގެން ކުރިއަށްދާ އޮލިމްޕިކް ގޭމްސް އޮންނަ ޖަޕާނުގެ އުތުރަށް ތޫފާން ނެޕަރްތަކް އަރައިފި އެވެ.
އެ ތޫފާނު އެރީ ޖަޕާނު ގަޑިން ހެނދުނު 06:00 ގައި މިޔާގީ ސަރަހައްދަށެވެ. ކަމާ ބެހޭ ފަރާތްތަކުން ވަނީ އެމެޖެންސީ ހިޔާތައް ގާއިމްކޮށްފަ އެވެ.
ޖަޕާން މިޓިއޮރޮލޮޖިކަލް އެޖެންސީން ބުނީ އިވާޓޭ ޕްރީފެކްޗާގެ މޮރިއޮކާ ސިޓީގެ ދެކުނުން ތޫފާން ދަތުރު ކުރަމުން ދަނީ ގަޑިއަކު 90 ކިލޯމީޓަރުގެ ގަދަ ވަޔާ އެކު ކަމަށެވެ.
ތޫފާން ދަތުރު ކުރަމުންދާ ސަރަހައްދުގައި ހިމެނޭ މިޔާގީގައި ބުދަ ދުވަހު އޮލިމްޕިކް ގޭމްސްގެ ބައެއް ފުޓްބޯޅަ މެޗުތައް ކުޅުމަށް ހަމަޖެހިފައި ވެ އެވެ.
ތޫފާނުގެ ސަބަބުން މެޗުތަކަށް އަސަރު ނުކުރާނެ ކަމަށް އިންތިޒާމް ކުރާ ފަރާތުން ބުނެ އެވެ. އެ މެޗުތަކަކީ މި ފަހަރުގެ ގޭމްސްގައި ސަޕޯޓަރުންނަށް ވަނުމުގެ ހުއްދަ ލިބޭ މަދު އިވެންޓުތަކުގެ ތެރޭގައި ހިމެނޭ މެޗުތަކެކެވެ.
ބޯކޮށް ވާރޭ ވެހެމުން ދާތީ އިވާޓޭގައި ހިމެނޭ ބައެއް އަވަށްތަކުން ވަނީ ބިންގަނޑު ކަނޑައިގެން ދިޔުމުގެ ހާދިސާތައް ހިނގާފާނެ ކަމަށް ބަލައި އިންޒާރު ނެރިފަ އެވެ.
އޭގެ އިތުރުން ބައެއް ރޭލު ދަތުރުތައް ވެސް ސަސްޕެންޑު ކުރި އެވެ. ނަމަވެސް ބުލެޓް ރޭލުގެ އެއްވެސް ދަތުރަކަށް އަސަރުކޮށްފައެއް ނުވެ އެވެ.
ޖަޕާނުގެ ހުޅަނގު އުތުރަށް ދަތުރު ކުރާ ވަރަކަށް ތޫފާނުގެ ބާރު ކުޑަވަމުން ދާނެ ކަމަށް ބެލެވެ އެވެ. މިއަދު ހަވީރުގެ ވަގުތެއްގައި ޖަޕާނު ކަނޑަށް ތޫފާނު ފައިބާނެ ކަމަށް ލަފާކޮށްފައި ވެ އެވެ.
އަންގާރަ ދުވަހު މޫސުން ގޯސްވުމުގެ ސަބަބުން އޮލިމްޕިކް ގޭމްސްގެ ބައެއް އިވެންޓުތަކަށް އަސަރުކޮށްފައި ވެ އެވެ. އެގޮތުން ޖަޕާނުގެ އިރުމަތީ އައްސޭރިފަށަށް ގަދަ ވަޔާ އެކު ވާރޭ ވެހުމުން އަންހެނުންގެ ޓްރައިއެތްލޯން އިވެންޓަށް ގޮންޖެހުންތަކާ ދިމާވި އެވެ.
މުބާރާތް އިންތިޒާމް ކުރާ ފަރާތުން ވަނީ ރޯވިންގް އަދި އާޗެރީގެ ބައެއް އިވެންޓުތައް ރީޝެޑިއުލް ކޮށްފަ އެވެ. އޭގެ އިތުރުން މިހާރު އުފެދިފައިވާ ކަނޑުގެ ރާޅުތަކުގެ ފައިދާ ހިފުމުގެ ގޮތުން ސާފިން އިވެންޓުތައް ވަނީ ކުރިޔަށް ޖައްސާލާފަ އެވެ.
ޖަޕާނަށް ކޮންމެ އަހަރަކު ވެސް ތޫފާން މޫސުމާ ދިމާވަނީ މޭ މަހުން ފެށިގެން އޮކްޓޯބަރު މަހާ ހަމައަށެވެ. އެ މުއްދަތުގައި އެންމެ ބާރުގަދަ ތޫފާނުތައް އަރަނީ އޯގަސްޓް އަދި ސެޕްޓެމްބަރުގަ އެވެ.
ދެހާށް ނަވާރަ ވަނަ އަހަރު ޖަޕާނުގައި ރަގްބީ ވޯލްޑް ކަޕް ބާއްވަމުން ދިޔައިރު އެރި ތޫފާން ހަގިބިސްގެ ސަބަބުން 100 އަށް ވުރެ ގިނަ މީހުން މަރުވި އެވެ.
