ނުރަސްމީ ދަތުރުފުޅެއްގައި ރައީސް އިބްރާހިމް މުހައްމަދު ސޯލިހު މިއަދު ޔުނައިޓެޑް އެރަބް އެމިރޭޓްސް (ޔޫއޭއީ) އަށް ވަޑައިގަތުމަށް ހަމަޖެހިފައިވާ ކަމަށް އެމަނިކުފާނުގެ އޮފީހުން ބުނެފި އެވެ.
ރައީސް ސޯލިހުގެ ތަރުޖަމާނު މަބްރޫކް އަޒީޒް ވިދާޅުވީ ރައީސް ޔޫއޭއީގެ ދުބާއީ އަށް މިއަދު ކުރައްވާ ދަތުރުފުޅު ނިންމާލެއްވުމަށްފަހު އެނބުރި ގައުމަށް ވަޑައިގަންނަވާނީ އަންނަ ހޮނިހިރު ދުވަހު ކަމަށެވެ. މި ދަތުރުފުޅުގައި ރަސްމީ އެއްވެސް މަސައްކަތްޕުޅެއް ކުރެއްވުމަށް ހަމަޖެހިފައިވާކަމެއް އެމަނިކުފާނުގެ އޮފީހުން ހާމައެއް ނުކުރެ އެވެ.
ރައީސް ވަނީ މިދިޔަ ހަފްތާގައި ތިން ދުވަހުގެ ނުރަސްމީ ދަތުރުފުޅެއްގައި ސްރީ ލަންކާ އަށް ވެސް ކުރައްވައިފަ އެވެ. އެ ދަތުރުފުޅުގައި ވަޑައިގެންނެވީ އަނބިކަނބަލުން ފަޒްނާ އަހުމަދާއެކު އެވެ.
ލަންކާއަށް ކުރެއްވި ދަތުރުފުޅުގައި އެ ގައުމުގެ ރައީސް ގޮތާބަޔަ ރާޖަޕަކްސަޔާ ވަނީ ބައްދަލު ކުރައްވައިފަ އެވެ.
