ޕެރިސް (ޖުލައި 26) - މެންޗެސްޓާ ޔުނައިޓެޑްގެ ފްރާންސްގެ މިޑްފީލްޑަރު ޕައުލް ޕޮގްބާ މި ފަހަރުގެ ޓްރާންސްފާގައި ޕީއެސްޖީ އަށް ގެންނަން މަސައްކަތް ކުރަމުން އަންނަ އަޑުތައް ގަދަވެފައި ވަނިކޮށް އެކަމާ ދެކޮޅަށް ޕީއެސްޖީގެ ސަޕޯޓަރުން ކެނޑިނޭޅި އަޑުއުފުލަން ފަށައިފި އެވެ.
އުމުރުން 28 އަހަރުގެ ޕޮގްބާ މި ފަހަރުގެ ޓްރާންސްފާ ބާޒާރު ނިމުމުގެ ކުރިން ޕީއެސްޖީ އަށް ބަދަލުވުމުގެ ފުރުސަތު އޮތް ކަމަށް މީޑިއާތަކުން ރިޕޯޓްކުރަން ފެށުމާ އެކު ޕީއެސްޖީ ސަޕޯޓަރުން އަންނަނީ ޕެރިހުގެ އެކި ސަރަހައްދުތަކުގައި އަންނަނީ ޕޮގްބާގެ ޓްރާންސްފާއާ ދެކޮޅު ބެނާތަކެއް ހަރުކުރަމުންނެވެ.
ގިނަ ބެނާތަކުގައި ޖަހާފައިވާ ލިޔުންތަކުގައި ހިމެނެނީ ދާދި އެއް ވާހަކައެކެވެ. އެއީ ޕޮގްބާގެ މަންމަ އެދެނީ ޕޮގްބާ ޕީއެސްޖީ އަށް ނުކުޅެން ކަމަށާއި ޕީއެސްޖީ ސަޕޯޓަރުން ވެސް ބޭނުންވަނީ އެ ގޮތް ކަމަށެވެ. އަދި ޕީއެސްޖީ އަށް ލޯތްބެއް ނެތް ފްރާންސްގެ ކުޅުންތެރިއަކު އެެ ޓީމަށް ކުޅެން ސަޕޯޓަރުން ނޭދޭ ކަމަށް ބެނާތަކުގައި ލިޔެފައިވެ އެވެ.
ޕޮގްބާއާ މެދުގައި ޕީއެސްޖީ ސަޕޯޓަރުން ނުރުހުންވާ އެންމެ ބޮޑު ސަބަބަކީ 2018 ވަނަ އަހަރު އޭނާ ދިން އިންޓަވިއުއެއްގައި ދެއްކި ވާހަކަތަކާ ގުޅިގެންނެވެ.
ކެނަލް ޕްލަސް އަށް ދިން އިންޓަވިއުއެއްގައި ޕޮގްބާ ބުނެފައިވަނީ ޕީއެސްޖީ އަށް އޭނާ ދުވަހަކު ވެސް ނުކުޅޭނެ ކަމަށާއި އޭގެ ސަބަބެއް ވެސް އެބައޮތް ކަމަށެވެ.
"ޕީއެސްޖީ އަށް ކުޅުމުގެ ޝައުގުވެރިކަމެއް ނެތް. އަހަރެންގެ މަންމަ އާއި ބައްޕަ އަކީ މާސޭގެ ސަޕޯޓަރުން. އެހެންވެ ޕީއެސްޖީއެއް އަހަރެންގެ ޕްލޭންތަަކަށް ފިޓެއް ނުވޭ،" ޕޮގްބާ ބުނެފައިވެ އެވެ.
ޕީއެސްޖީގެ ސަޕޯޓަރުން ވަނީ މި އިންޓަވިއުއާ ހެދި ޕޮގްބާ ފްރާންސް ގައުމީ ޓީމަށް ކުޅުނު ބައެއް މެޗުތަކުގައި ވެސް އަޑުއުފުލައިފަ އެވެ. އެކަން ހިނގަން މެދުވެރިވި އެންމެ ބޮޑު ސަބަބަކީ ޗެމްޕިއަންސް ލީގުގައި ޔުނައިޓެޑުން ޕީއެސްޖީ ދަނޑުގައި މޮޅުވާ ކޮންމެ ފަހަރަކު ސޯޝަލް މީޑިއާގައި ޕީއެސްޖީއާ ދެކޮޅަށް ޕޮގްބާ ފާޅުކުރާ ޝުއޫރުތަކުގެ ސަބަބުންނެވެ.
ޕޮގްބާ ޔުނައިޓެޑާ އެކު ހަދާފައިވާ އެއްބަސްވުން އަންނަ އަހަރުގެ ޖޫންގެ ނިޔަލަށް ހަމަވާނެ އެވެ. އަންނަ ޖެނުއަރީ މަހުގެ ކުރިން ޔުނައިޓެޑާ އެކު ޕޮގްބާ އާ އެއްބަސްވުމެއްގައި ސޮއިނުކުރާނަމަ އެ މަހުން ފެށިގެން އޭނާ ބޭނުން ކޮންމެ ކްލަބަކާ މަޝްވަރާކޮށް ހިލޭ ޓްރާންސްފާއެއްގައި ސީޒަން ނިންމާފައި އެ ޓީމަކާ ގުޅެން ޕްރީ އެގްރީމެންޓެއް ހެދޭނެ އެވެ.
ޔުނައިޓެޑުން ޕޮގްބާ ލައްވައި އާ އެގްރީމެންޓެއްގައި ސޮއިކުރުވަން މަސައްކަތް ކުރަމުން އަންނައިރު، މި ފަހަރުގެ ޓްރާންސްފާ މާކެޓްގައި އޭނާ ދޫކޮށްލާނެ ކަމަށް ބެލެވެނީ މަދުވެގެން 55 މިލިއަން ޑޮލަރުގެ ހުށަހެޅުމެއް އައިސްފިނަމަ އެވެ. އެކަމަކު، ޕޮގްބާގެ އޭޖެންޓް މިނޯ ރައިއޯލާ ވަކި ފީ އަކަށް ޑިމާންޓްކުރާތީ ޕޮގްބާގެ ޓްރާންސްފާ މި ފަހަރު ހިނގުމުގެ ފުރުސަތު ކުޑަކަމަށް ބައެއް ރިޕޯޓްތައް ބުނެ އެވެ.
ޔުނައިޓެޑުން ޕޮގްބާގެ ސޮއި ހޯދީ 2016 ވަނަ އަހަރު ޔުވެންޓަސް އަށް 116 މިލިއަން ޑޮލަރު ދައްކައިފަ އެވެ. އެއީ އޭރަށް ބަލާނަމަ ދުނިޔޭގެ ރެކޯޑް ފީ އެވެ.
