ޓޯކިޔޯ (ޖުލައި 26) - އޮލިމްޕިކްސް އިން މި ފަހަރު އަލަށް ހިމެނި އިވެންޓެއް ކަމަށްވާ ސްޓްރީޓް ސްކޭޓްބޯޑިންގެ އަންހެން ބައިން ރަން މެޑަލް ހޯދައި ޖަޕާނުގެ އުމުރުން 13 އަހަރުގެ މޮމީޖީ ނިޝީޔާ ތާރީހީ ކާމިޔާބީއެއް ހާސިލްކޮށްފި އެވެ.
މޮމީޖީ އަކީ އޮލިމްޕިކްސްގެ ދިގު ތާރީހުގައި އިވެންޓަކުން ރަން މެޑަލް ހޯދި ދެ ވަނަ އަށް އެންމެ ހަގު އެތުލީޓެވެ. އޭނާ ރަން މެޑަލް ހޯދިއިރު އުމުރަކީ 13 އަހަރާއި 330 ދުވަހެވެ. އެންމެ ޅަ އުމުރުގައި އޮލިމްޕިކްގެ ރަން މެޑަލް ހޯދީ 1936 ވަނަ އަހަރު ބާލިންގައި ބޭއްވި އޮލިމްޕިކްސްގެ ސްޕްރިންގްބޯޑު އިވެންޓުން ރަން މެޑަލް ހާސިލްކުރި މާޖޯރީ ގެސްޓްރިން އެވެ. ރަން މެޑަލް ހޯދިިއިރު، އޭނާގެ އުމުރަކީ 13 އަހަރާއި 267 ދުވަހެވެ.
ވިމެންސް ސްޓްރީޓް ސްކޭޓްބޯޑިން އަކީ މި ފަހަރުގެ އޮލިމްޕިކްސްގައި އަލަށް ފެށި އިވެންޓެކެވެ. މި އިވެންޓްގެ ގަދަ ތިނެއްގައި ވެސް ހިމެނެނީ އެވްރެޖް އުމުރު 14 އަހަރުގެ އެތުލީޓުންނެވެ. މިއީ އޮލިމްޕިކްގެ ދިގު ތާރީހުގައި ވެސް އިވެންޓެއްގެ ގަދަ ތިނެއްގެ އެންމެ ހަގު އެވްރެޖް އުމުރެވެ.
ތިން ވަނަ ހޯދި ޖަޕާނުގެ ފޫނާ (ކ)، އެއް ވަނަ ހޯދި މޮމީޖީ (މ) އަދި ދެ ވަަނަ އަށް ދިޔަ ބްރެޒިލްގެ ރޭއިސާ މެޑަލް ކަރުގައި އަޅުވައިގެން ޕޯޑިއަމްގައި.-- ފޮޓޯ: އޭއެފްޕީ
އިވެންޓުގެ ދެ ވަނަ އަށް ދިޔައީ އުމުރުން 13 އަހަރުގެ ބްރެޒިލް އެތުލީޓް ރޭއިސާ ލީލް އެވެ. ލީލް އެއް ވަނަ އަށް ދިޔަ ނަމަ އޭނާ ވެގެންދާނީ އޮލިމްޕިކްސް އިވެންޓަކުން ރަން މެޑަލް ހޯދި އެންމެ ޒުވާން އެތުލީޓަށެވެ. އެކަމަކު ރިހި މެޑަލް އިން ފުއްދާލަން ޖެހުނީ އެެވެ. އެ އިވެންޓުގެ ތިން ވަނަ ހާސިލްކުރީ އުމުރުން 16 އަހަރުގެ ޖަޕާނުގެ ފޫނާ ނަކަޔާމާ އެވެ.
ފިރިހެނުންގެ ސްޓްރީޓް ސްކޭޓްބޯޑިން އިވެންޓުން ރަން މެޑަލް ހޯދީ ވެސް ޖަޕާނުގެ އެތުލީޓެކެވެ. އެއީ ޔޫޓޯ ހޮރިގޯމޭ އެވެ. ސްޓްރީޓް ސްކޭޓްބޯޑިންގެ އަންހެން އަދި ފިރިހެން ކެޓަގަރީގައި ވެސް ގިނައިން ވާދަކޮށްފައިވަނީ ޒުވާން އެތުލީޓުންނެވެ.
ސްޓްރީޓް ސްކޭޓްބޯޑިންގެ އިތުރުން މި ފަހަރުގެ އޮލިމްޕިކްސް އަށް އާ ހަަތަރު އިވެންޓެއް ވަނީ އިތުރުކޮށްފަ އެވެ. ދެން ހިމެނެނީ ސޮފްޓްބޯލް، ކަރާޓޭ، ސްޕޯޓްސް ކްލައިމްބިން އަދި ސާފިން އެވެ. މީގެ އިން ކޮންމެ އިވެންޓެއްގައި ވެސް ގިނަ އަދަދެއްގެ އެތުލީޓުން ވަނީ ބައިވެރިވެފަ އެވެ. އެންމެ ބޮޑު ސަބަބަކީ މީގެ އިން ކޮންމެ އިވެންޓެއް ވެސް ކާމިޔާބުކުރެވޭ އެތުލީޓަކަށް ތާރީހީ ކާމިޔާބެއް ހާސިލްކުރެވޭނެތީ އެވެ.
