ރާއްޖޭގެ ސިޔާސީ މަޝްރަހު ހޫނުވެ، އާ ކޯލިޝަންތަކާއި ނިޒާމްތަކުގެ ވާހަކަ އަންނަނީ ދެކެވެމުންނެވެ. ނަމަވެސް، އެ ވާހަކަތަކާ ގުޅޭ ގޮތުން ކުރީގެ ރައީސް މައުމޫން އަބްދުލްގައްޔޫމް ދައްކަވާނެ ގިނަ ވާހަކަތަކެއް ނެތެވެ. ރާއްޖޭގައި މިހާރު ހުންނެވި އެންމެ ތަޖުރިބާކާރު ޕޮލިޓީޝަން މިއަދު ރާއްޖެ ޓީވީ އަށް ދެއްވި އިންޓިވިއުގައި ވިދާޅުވި ގޮތުގައި، ސިޔާސީ "ސްޕެއުލޭޝަން"ތައް ކުރުމަކީ އެމަނިކުފާނު ކުރައްވާ ކަމެއް ނޫނެވެ.
ސަރުކާރު ހިންގާ ކޯލިޝަންގެ ތެރޭ މައްސަލަ ބޮޑުވެ، އެމްޑީޕީގެ ރައީސް މުހައްމަދު ނަޝީދު ވަނީ އިދިކޮޅު ލީޑަރު އަބްދުﷲ ޔާމީންއާއެކު މަސައްކަތް ކުރައްވައި، ޕީޕީއެމްއާއެކު ކޯލިޝަން ހެދުމުގެ ވިސްނުންފުޅުތަކެއް ތިލަކުރައްވައިފަ އެވެ.
މައުމޫންއާއެކު ކޯލިޝަނުން ބޭރުވެ ޔާމީންއާއެކު މަސައްކަތް ކުރެއްވުމުގެ ޝައުގުވެރިކަން ނަޝީދު ފާޅުކުރެއްވިއިރު، މައުމޫން ވިދާޅުވީ އެކަމާ މެދު އެއްޗެއް ވިދާޅުވާން ބޭނުންފުޅު ނުވާ ކަމަށެވެ.
ނަމަވެސް، މައުމޫން ވިދާޅުވި ގޮތުގައި ސަލާމަތުން ތިބި ދިވެހި ރައްޔިތުން އެއް ބަޔަކު އަނެއް ބަޔަކާއެކު މަސައްކަތް ކުރުން އެއީ އެންމެ ރަނގަޅު ކަމެކެވެ. އެކަމަކު އެމަނިކުފާނުގެ އެއްބަފާ ކޮއްކޯފުޅު ޔާމީނަކީ ސަލާމަތުން ހުންނެވި ބޭފުޅެއް ނޫން ކަމާއި ޖަލުގައި ހުންނެވުމުން ސިޔާސީ މަސައްކަތްތަކެއް ނުކުރެއްވޭނެ ކަމަށް މައުމޫން ވިދާޅުވި އެވެ.
"އެ ނޫން އެހެން މީހުން ކޮޅު ކޮޅަށް ޖެހި ބައިބައިވެ، އެއްގޮތަކަށް ހިޔާލު ހުރި ބަޔަކު ޕާޓީތައް ހެދުމަކީ އޮތް ގޮތް، އެ ހަމަ ރަނގަޅު ގޮތް،" މިނިވަން ދުވަހުގެ މުނާސަބަތުގައި ވާހަކަފުޅުދައްކަވަމުން މައުމޫން ވިދާޅުވި އެވެ.
ޔާމީންއާ ގުޅޭ ގޮތުން މައުމޫން ވިދާޅުވީ ކުށެއް ކޮށްފިނަމަ، އެމީހަކަށް އެ ކުށެއްގެ އަދަބު ލިބުމަކީ ގާނޫނީ ގޮތުން އެންމެ ރަނގަޅު ކަމެއް ކަމަށެވެ. އަދި، އެ އަދަބު އެހެން އޮތްވައި، ޔާމީނަށް ސިޔާސީ މަސައްކަތް ކުރެވިގެން ނުވާނެ ކަމަށް ގަބޫލު ކުރައްވާ ކަމަށް ވިދާޅުވި އެވެ.
ނަމަވެސް، ހުކުމުން މިނިވަންވެ ނުވަތަ ޝަރީއަތް ބާތިލް ކަމަށް މަތީ ކޯޓުން އަމުރުކޮށްފި ހާލަތެއްގައި އެމީހުންނެކޭ ވެސް އެއްފަދައިން ޔާމީންއަށް ވެސް ސިޔާސީ މަސައްކަތް ކުރުމުގެ ފުރުސަތު އޮންނަންވާނެ ކަމަށް ގަބޫލު ކުރައްވާ ކަމަށް ވެސް މައުމޫން ވިދާޅުވި އެވެ.
ޔާމީންއާއެކު ނަޝީދު މަސައްކަތް ކުރެއްވުމުގެ ޝައުގުވެރިކަން ފާޅު ކުރެއްވީ ވެރިކަމުގެ ނިޒާމު، ބަރުލަމާނީ ނިޒާމަކަށް ބަދަލު ކުރުމުގެ ހުވަފެންފުޅާއެކު އެވެ. ނަޝީދު ގަބޫލު ކުރައްވާ ގޮތުގައި 2023 ގައި ރިޔާސީ އިންތިހާބެއް ނޯންނާނެ އެވެ. ނަމަވެސް، އަންނަ އަހަރު ނިޒާމުގެ ވޯޓެއް ނަގައި، ދެން ވެރިކަން ހަވާލުވާނީ ބޮޑުވަޒީރަކާއެކު އެވެ. އެކަމަށް ޔާމީން ތާއިދު ކުރައްވާނެ ކަމަށް ވެސް ނަޝީދު ގަބޫލު ކުރައްވަ އެވެ.
އެ ވާހަކަތަކަށް މައުމޫން ވިދާޅުވީ އެއީ ޕޮލިޓިކަލް ސްޕެކިއުލޭޝަންތަކެއް ކަމަށެވެ.
"މާނައަކީ ހިތަށް ފެންނަ ހިޔާލުތައް ބުނަނީ ދެއްތޯ. އަޅުގަނޑު މިއީ ސްޕެކިއުލޭޓް ކުރާ މީހެއް ނޫން، އެއްވެސް އިރެއްގަ މިހެންނޭ ވާނީ، މިހެންނޭ ވާން ޖެހޭނީ ބުނާ މީހެއް ނޫން. އެކަމެއް ވީމަ އެއީ ރަނގަޅު (ކަމެއް)ތޯ (ގޯސްކަމެއްތޯ) އެ ވާހަކަ ދައްކަފާނެ،" މައުމޫން ވިދާޅުވި އެވެ.
"އެހެންވީމަ އަޅުގަނޑަށް މިހާރު ދަންނަވާކަށް ނޭނގޭނެ މީގެ އެއް އަހަރު ފަހުން އޮންނާނީ މިވެނި ނިޒާމެކޭ ބުނާކަށް، އެއްވެސް މީހަކަށް ނޭނގޭނެ ހަގީގަތުގައި."
އެ ވާހަކަ އެހެން ދެއްކުމަކީ މައުމޫން ދެކެވަޑައިގަންނަވާ ގޮތުގައި ބޭކާރު ކަމެކެވެ. އޭގެ ބަދަލުގައި ރާއްޖެއަށް ރަނގަޅީ ރިޔާސީ ނިޒާމު ކަމަށްވާނަމަ، އެކަން ދިފާއު ކުރަންވީ ކަމަށް މައުމޫން ވިދާޅުވި އެވެ.
މައުމޫން އިތުރަށް ވިދާޅުވި ގޮތުގައި، ރާއްޖެއަށް ބޮޑުވަޒީރެއް ބޭނުންވާ ކަމަކަށް އެމަނިކުފާނު ގަބޫލު ނުކުރައްވާ ކަމަށާއި އަދި، ރައްޔިތުންގެ ވޯޓު އޮތްހައި ހިނދަކު ރާއްޖޭގެ ނިޒާމު ބަދަލުވާނެ ކަމަކަށް ވެސް ގަބޫލު ނުކުރައްވަ އެވެ.
ނަޝީދާއި ރައީސް އިބްރާހިމް މުހައްމަދު ސޯލިހާ ދެމެދު ހިޔާލު ތަފާތުވެ، ސަރުކާރަށް ފާޑުކިޔުންތައް އަމާޒުކުރައްވާފައިވާއިރު، މައުމޫން ވަނީ އެކަމުން ސަރުކާރާއި ރައީސް ދިފާއު ވެސް ކުރައްވާފަ އެވެ.
އެގޮތުން މައުމޫން ވިދާޅުވި ގޮތުގައި، ސިޔާސީ ވާދަވެރިކަން އޮންނަ ގޮތުން ވެރިކަމަށް އަންނަން ބޭނުން ވެގެން އުޅޭ ބަޔަކު އެކި ގޮތްގޮތަށް ކަންކަން މާނަކޮށްގެން ސަރުކާރަށް ފާޑުކިޔާނެ ކަމަށެވެ. އެގޮތުން ސަރުކާރު އޮތީ ހަރުކަށި ފިކުރުގެ މީހުންގެ ވަކިތަކެއްގައި ތާށިވެފައިވާ ކަމަށް ބުނާ ބުނުމަކީ ވެސް އެފަދަ ވާހަކައެެއް ކަމަށެވެ.
"ސަރުކާރު މިއޮތީ ވަކިތަކެއްގަ ތާށިވެފައެއް ނޫން،" މައުމޫން ވިދާޅުވި އެވެ.
ރައީސް ސޯލިހަށް ތައުރީފު ކުރައްވަމުން މައުމޫން ވިދާޅުވީ، އެމަނިކުފާނަކީ ވަރަށް އަހުލާގު ރަނގަޅު، ހަރުދަނާ، މާތް ބޭފުޅެއް ކަމަށެވެ. އަދި، ރައްޔިތުންނަށް ކަންކަން ކޮށްދެއްވޭތޯ ބައްލަވާ ބޭފުޅެއް ކަމަށް ވިދާޅުވި އެވެ.
