ބޮޑު އީދު ޗުއްޓީ އަށް މާލެއިން ބޭރަށް ނުދެވި ވައި ވެފައި ހުންނަން ޖެހުމުން މި ފަހަރުގެ އީދު އުފާ ހޯދީ ޗުއްޓީ ގައި އެކި ތަންތަނަށް ގޮސް މަޖާ ނަގާފައި ރައްޓެހިން ސޯޝަލް މީޑިއާ ސްޓޯރީ ތަކަށް ލީ ފޮޓޯ ތަކުންނެވެ. ދިގު ޕެންޑެމިކްގެ މެދުން ލިބުނު އެއްވެ އުޅުމުގެ ލުއި ތަކާއެކު މިފަހަރު ގިނަ ރަށްރަށުގައި އެ ރަށެއްގެ ފެންވަރުން ބޮޑު އީދުގެ ހަރަކާތްތައް ބޭއްވި އެވެ. އީދު ފާހަގަކުރި އެވެ.
މި ހިމަނާލަނީ ބޮޑު އީދު ބަންދާއި ދިމާކޮށް ލ. ކުނަހަންދޫގެ ހިތްގައިމުކަމުގައި ޗުއްޓީ ހޭދަކުރި ރައްޓެއްސެއްގެ ކެމެރާ އިން ދަތުރުގެ އެންމެ ހިތްގައިމު މަންޒަރުތައް ކުލަކޮށެވެ.
ކުނަހަންދޫގެ ބަނދަރު މަތި: ކުނަހަންދޫ އަކީ ލ އަތޮޅުގެ އެންމެ މީސް މަދު، ރީތި ރަށްތަކުގެ ތެރެެއިން އެއް ރަށް
އާބާދީގައި 900 އެއް ހާ މީހުން ދިރިއުޅޭ ކުނަހަންދޫ އަކީ އާންމުކޮށް ކުލަ ގަދަކޮށް އީދު ފާހަގަކުރާ ރައްޔިތެއް ދިރިއުޅޭ ރަށެކެވެ.
މީހަކު ގެއެއްގެ ގޯތިތެރޭގައި ކުނިކަހަނީ: އާދައިގެ މަތިން ބޮޑު އީދަށް ތައްޔާރުވުމާއި ކާއެއްޗެހި ހެދުން އީދަށް ދުވަސްކޮޅެއް އޮއްވައި ކުނަހަންދޫގައި ފަށާ
އީދު އަންނަން ވާއިރަށް ތަފާތު ވައްތަރުގެ ކާއެއްޗެހި ތައްޔާރުކުރުމަކީ އާދަކާދައިގެ ތެރޭގައި ޒަމާނުއްސުރެ ރަށުގައި ކުރާ ކަމެކެވެ. އީދު ކާއެއްޗެހީގެ ތެރޭގައި ކުދި ގުޅައާއި އެކި ވައްތަރުގެ ފޮނި ކާއެއްޗެހި ގިނައިން ތައްޔާރުކުރެ އެވެ.
މި ހުރިހާ އެއްޗެއް ރައްޓެހިންނަށް ބެހުމާއި ކެއުން އޮންނާނީ އީދު ތެރޭގަ އެވެ.
އީދު ނަމާދުން ފައިބައިގެން އައިސް އެންމެން އެކުގައި އީދުގެ ސައިގައި ބައިވެރިވެލުމަކީ ރަށުގައި އަދިވެސް އޮންނަ ރީތި ސަގާފަތެކެވެ.
އީދު ހީނާފަތް އަޅައިގެން އަންހެންކުދިންތަކެއް
އީދު ހީނާފަތް އެޅުމަކީ މިއަދާ ހަމައަށް ވެސް ރަށްރަށުގައި ކޮށްއުޅޭ ކަމެކެވެ. އީދު ހީނާފަތް އަޅައި އުޅެނީ އާންމުކޮށް ހައްޖުދުވަހުގެ ރޭ ނުވަތަ އީދު ވިލޭރޭގަ އެވެ. ހީނާފަތް އަޅާނަމަ ހައްޖު ދުވަހު ހީނާފަތް ފުނޑައި ފަތް ހޯދައި ތައްޔާރުކުރާނެ އެވެ.
ކުޑަކުއްޖަކު ފަންވަތް ދުންމާރިއެއް ގފުމެނީ: އީދު ކުޅިވަރު ފެށޭ ވަގުތަކީ ރަށުތެރެއަށް އާދަޔާ ހިލާފު ދިރުމެއް އަންނަ ވަގުތެއް
އީދު ދުވަހުގެ އީދު ނަމާދުން ފައިބައިގެން ފުރަތަމަ އިދު ހަރަކާތަކަށް އޮންނާނީ އީދު ކޯޑި ހެދުމެވެ. ކޯޑި ހަދައި ނިމިގެން ހަވީރު ވުމުން ރަށު ތެރޭގައި ކޯޑި ދުއްވާނެ އެވެ. ކޯޑި ދުއްވައި ނިމުމަށްފަހު އިޝާ ނިމިގެން ކޯޑި އުލަށް ޖަހާނެ އެވެ. އެއާ އެކު ދެން އޮންނާނީ ކޯޑި ކެނޑުމުގެ ފޯރި އެވެ.
ކުނަހަންދޫގެ ބޮޑު އީދު ކޯޑި
އީދުގެ ދެ ވަނަ ދުވަހު އޮންނަ އެންމެ މަޖާ އެއް ހަރަކާތަކީ އީދު ކެނޑި މީހުން ހޯދައިގެން ގޮސް އެމީހުން މޫދަށް ލުމާއި އެމީހުންގެ ގައިގައި ކުރަހައިގެން އެމީހުން މާއްޔަށް ހެދުމެވެ.
ކުނަހަންދޫގެ އީދު ފޯރީގެ ތެރެއަށް މި ފަހުން ތައާރަފްވި އެންމެ ފޯރިގަދަ އެއް ހަރަކާތަކީ ރަށުގެ އަންހެންވެރިންގެ ޕެރޭޑެވެ. މި ޕެރޭޑު ވެސް މި ފަހަރު އީދުގައި އެރަށުގައި ބޭއްވި އެވެ. އަންހެން ވެރިންގެ ޕެރޭޑުގައި ހުރިހާ ކުޅިވަރުތަކަކާއި ހަރަކާތްތަކެއްގައި ބައިވެރިވާނީ އަންހެނުންނެވެ. ބެރުޖަހައި، ލަވަކިޔައި، ނަށާނީ ވެސް އެވެރިންނެވެ.
މި ހުރިހައި ފޯރިއަކާ އެކު ކުނަހަންދޫގެ މި ދަތުރެއްގެ އެންމެ ސަޅި ހައިލައިޓް އަކީ އެރަށުގެ ވަޅާތެރެ އެވެ. ކުނަހަންދޫ ވަޅާތެރެ އަކީ މޫދުން ރަށު ތެރެއަށް 700 އެއްހައި މީޓަރަށް ދެމިފައި އޮންނަ ފެންގަނޑެކެވެ. މިތަނުގައި ކެނޯ ދުއްވުމާއި ޑިންގީ ދުއްވުމަކީ ރަށަށް ދަތުރު ދާ މީހުންގެ އެންމެ ފޭވަރިޓް އެއް ކަންތަކެވެ.
ކުނަހަންދޫ ވަޅާތެރެ: މިއީ މޫދުން ރަށުތެރެއަށް 700 އެއްހައި މީޓަރަށް ދެމިފައި އޮންނަ ފެންގަނޑެއް.
ފޮޓޯ: އައިމިނަތު އަމީނާ (އަނާ)
