ގުދުސް (ޖުލައި 24) - ދެހާސް ފަންސާސް ވަނަ އަހަރު އައުމުގެ ކުރިން އިޒްރޭލުން ބޭރު ކުރާ ކާބަންގެ މިންވަރު 85 ޕަސެންޓު މަދު ކުރަން ކަނޑައަޅައިފި އެވެ.
ބޮޑު ވަޒީރު ނަފްތާލީ ބެނެޓް އާއި ގިނަ މިނިސްޓަރުން ތާއީދު ކުރައްވާ އެ ނިންމުމާ ގުޅޭ ގޮތުން ޕާލިމެންޓުގައި އާދީއްތަ ދުވަހު ވޯޓަކަށް އަހާނެ އެވެ.
"އިޒްރޭލު ސަރުކާރުން ބޭނުން ވަނީ 2050 ވަނަ އަހަރުގެ ކުރިން އިޒްރޭލަކީ ލޯ ކާބަން އިގްތިސާދަކަށް ހަދަން،" އެ ގައުމުގެ ފޮރިން މިނިސްޓްރީން ނެރުނު ބަޔާނެއްގައި ބުންޏެވެ.
"ޕެރިސް އެގްރީމެންޓުގައިވާ ކަންކަމަށް ބަލައި އަދި މޫސުމީ ބަދަލު ކުޑަ ކުރަން އިޒްރޭލުގެ ދައުރު އަދާ ކުރުމުގެ ގޮތުން 2050 ގެ ކުރިން ޒީރޯ ކާބަން އަމާޒަށް ވާސިލްވާން ބޭނުންވޭ."
ބެނެޓްގެ އިތުރުން ތިމާވެށީގެ މިނިސްޓަރާއި، ފޮރިން މިނިސްޓަރު އަދި މާލީ ކަންކަމާއި، ހަކަތަ އަދި ދަތުރުފަތުރާއި އިގްތިސާދު އަދި ދާހިލީ މިނިސްޓަރު ވެސް އެ ނިންމުމަށް ތާއީދު ކުރައްވަ އެވެ.
އެ ނިންމުމުގެ ދަށުން 2015 ވަނަ އަހަރު ކާބަން ބޭރު ކުރަމުން ދިޔަ މިންވަރާ އަޅާ ބަލާއިރު، 2050 ވަނަ އަހަރާ ހަމައަށް ދާން ވާ އިރަށް މަދުވެގެން 85 ޕަސެންޓު ކުޑަ ކުރަން ޖެހެ އެވެ.
"ކާބަން ބޭރު ކުރުން މަދު ކުރަން ގައުމީ ލަނޑުދަނޑިއެއް އިޒްރޭލުން މީގެ ކުރިން ދުވަހަކު ވެސް ކަނޑައަޅާފައެއް ނުވޭ. މިއީ ތިމާވެއްޓާއި ރައްޓެހި އަދި ދެމެހެއްޓެނިވި ގައުމަކާއި އިގްތިސާދެއް ބިނާކުރެވޭނެ ސްޓްރެޓެޖީއެއް އިޒްލޭރުން އިއުލާނު ކުރި ފުރަތަމަ ފަހަރު،" ފޮރިން މިނިސްޓްރީގެ ބަޔާނުގައި ވެ އެވެ.
އިޒްރޭލުން މީގެ ކުރިން ވަނީ 2015 ވަނަ އަހަރު ގާއިމްކުރި ޕެރިސް އެގްރީމެންޓުގައި ސޮއިކޮށް، 2030 އާ ހަމައަށް ކާބަން ބޭރު ކުރާ މިންވަރު އިތުރުވިޔަ ނުދީ އެއް ވަރެއްގައި ހިފެހެއްޓުމަށް އެއްބަސްވެފަ އެވެ.
ދެހާސް ފަންސާސް ވަނަ އަހަރުގެ ކުރިން ހާސިލްކުރަން ކަނޑައެޅި ޓާގެޓުތަކުގެ ދަށުން ދަތުރުފަތުރުގެ ދާއިރާއިން ގްރީންހައުސް ގޭސް ބޭރު ކުރުން 96 ޕަސެންޓު، ކަރަންޓާ ގުޅޭ ދާއިރާއިން 85 ޕަސެންޓު އަދި ކުންޏާ ގުޅޭ ދާއިރާއިން 92 ޕަސެންޓު ކުޑަ ކުރާނެ އެވެ.
