ލަންޑަން (ޖުލައި 23) - މި ފަހަރުގެ ޓްރާންސްފާ މާކެޓްގެ ތެރޭގައި ހެރީ ކޭން މެންޗެސްޓާ ސިޓީ އަށް ވިއްކާލަން ޓޮޓެންހަމް ހޮޓްސްޕާސް އިން ތައްޔާރުވަމުން އަންނަ ކަމަށް އިނގިރޭސި މީޑިއާތަކުން ރިޕޯޓްކޮށްފި އެވެ.
މިދިޔަ ސީޒަނުގެ ފަހުކޮޅުގައި ކޭން ވަނީ ޓޮޓެންހަމް ދޫކޮށްލަން ބޭނުންވާކަން އެ ކްލަބަށް އަންގައިފަ އެވެ. އެކަމަކު، ޓޮޓެންހަމް އޭރު އޮތީ ކޭން ވިއްކާލާ ގޮތަކަށް ނޫނެވެ.
ސްކައިސްޕޯޓްސް އިން ރިޕޯޓްކުރި ގޮތުގައި ސިޓީން ވަނީ މިދިޔަ މަހު ކޭން ގަންނަން 100 މިލިއަން ޕައުންޑު (140 މިލިއަން ޑޮލަރު)ގެ ބިޑެއް ހުށަހަޅައިފަ އެވެ. އެއީ ކުޅުންތެރިންތަކެއް ވެސް ހިމެނޭ ގޮތަށް ހުށަހެޅި ޑީލެކެވެ. ޓޮޓެންހަމް އިން އެ ގޮތަށް އެއްބަސްނުވުމުން ކޭންގެ ޓްރާންސްފާ ވާހަކަތައް ދާދި ފަހަކާ ޖެހެންދެން އޮތީ މަޑުޖެހިފަ އެވެ.
އެކަމަކު މިދިޔަ ހަފްތާގައި ބޭއްވި މަޝްވަރާތަކުގައި ޓޮޓެންހަމްގެ ޗެއާމަން ޑެނިއަލް ލިވީ ވަނީ ކޭން އެދޭ ގޮތަށް އޭނާ ދޫކޮށްލަން އަނގަބަހުން އެއްބަސްވެފައި ކަމަށް އިނގިރޭސި މީޑިއާތަކުން ވަނީ ރިޕޯޓްކޮށްފަ އެވެ. އެކަމަކު، ލިވީގެ ޝަރުތަކީ ކޭން އަށް ޓޮޓެންހަމް އިން ޑިމާންޑްކުރާ ފީ ދެވޭނެ ގޮތެއް ސިޓީން ކަނޑައެޅުމެވެ. ކޭން ދޫކޮށްލަން ޓޮޓެންހަމް އިން ކިޔާ އަގަކީ 150 މިލިއަން ޕައުންޑް (200 މިލިއަން ޑޮލަރު) އެވެ. ސިޓީން ބޭނުންނަމަ ބަހާލައިގެން ވެސް މި ފީ ދެއްކިދާނެ އެވެ.
ޓޯކްސްޕޯޓްސް އިން ރިޕޯޓްކުރާގޮތުގައި ސިޓީން ކޭންގެ ޓްރާންސްފާ ފީ ދަށް ކުރަން އެ ޓީމުގެ ރަހީމް ސްޓާލިން ނޫނީ ގަބްރިއެލް ޖީސޫސް ޓޮޓެންހަމަށް ދޫކޮށްލުމުގެ ފުރުސަތު އެބައޮތެވެ.
ކޭން މި ވަގުތު ޓޮޓެންހަމްގައި ހުރި ކޮންޓްރެކްޓްގައިވާ ގޮތުން ސީޒަނަކަށް އޭނާ އަށް ލިބެނީ 10 މިލިއަން ޕައުންޑެވެ. ސިޓީން ވަނީ އޭނާ އަށް ސީޒަނަކަށް 16 މިލިއަން ޕައުންޑް ދޭން ނިންމައިފަ އެވެ.
ޓޮޓެންހަމްގެ ކޯޗު ނޫނޯ އެސްޕިރީޓޯ ސަންޓޯ ވަނީ ކޭން އަކީ އެ ޓީމުގެ މުހިއްމު ކުުޅުންތެރިއެއް ކަމަށާއި އޭނާގެ ޓްރާންސްފާ ވާހަކަތަކާ ބެހޭގޮތުން ވާހަކަ ދައްކަން ބޭނުންނުވާ ކަމަށް ބުނެފަ އެވެ. އެއީ ޓްރާންސްފާ ވާހަކަތަކާ ބެހޭގޮތުން ވާހަކަ ދައްކާނީ ކްލަބްގެ ވެރިން ކަމަށްވާތީ އެވެ.
ސިޓީގެ ކޯޗު ޕެޕް ގާޑިއޯލާ ވަނީ ސިޓީން ގަންނަން ޝައުގުވެރިވާ ފޯވާޑުންގެ އަގު ހުރީ އަތްނުފޯރާ ފަށުގައި ކަމަށް ބުނެފަ އެވެ. ސިޓީން މަސައްކަތް ކުރަނީ ކޭން ނުލިބިއްޖެނަމަ ބޮރޫޝިއާ ޑޯޓްމަންޑްގެ އާލިން ބްރައުޓް ހާލަންޑް ގަންނާށެވެ. ދެ ކުޅުންތެރިންގެ އަގު ވެސް އުޅެނީ 150 މިލިއަން ޕައުންޑްގަ އެވެ.
