ލަންޑަން (ޖުލައި 20) - މި ފަހަރުގެ ޓްރާންސްފާ މާކެޓްގައި ޗެލްސީން ފޯވާޑެއް ހޯދަން ކުރާ މަސައްކަތުގައި ބޮރުޝީއާ ޑޯޓްމަންޑް އާލިން ބްރައުޓް ހާލަންޑް ނުލިބިއްޖެނަމަ ބަޔާން މިއުނިކްގެ ތަރި ރޮބަޓް ލެވަންޑޯސްކީ ގެންނަން މަސައްކަތް ކުރާނެ ކަމަށް މީޑިއާ ރިޕޯޓްތައް ބުނެފި އެވެ.
އުމުރުން 20 އަހަރުގެ ހާލަންޑް ހޯދަން ޗެލްސީން ކުރާ މަސައްކަތުގައި މިހާތަނަށް އެކަށީގެންވާ ކުރިއެރުމެއް ލިބިފައި ނުވެ އެވެ. ޑޯޓްމަންޑުން ހާލަންޑް ވިއްކާލަން ބޭނުމެއް ނުވެ އެވެ. އެހެންވެ، އެ ޓީމުން އަންނަނީ ހާލަންޑް ވިއްކާލަން ކިޔާ އަގު ބޮޑު ކުރަމުންނެވެ. މި ފަހަރުގެ ޓްރާންސްފާ މާކެޓްގައި ހާލަންޑް ގަންނަނަމަ އެ ޓީމެއް އަތުން މަދުވެގެން 170 މިލިއަން ޑޮލަރުގެ ފީއަކަށް ޑޯޓްމަންޑުން ޑިމާންޑް ކުރާނެ އެވެ.
ރިޕޯޓްތައް ބުނާގޮތުން މި ފަހަރުގެ ޓްރާންސްފާ މާކެޓް ނިމުމުގެ ކުރިން ހާލަންޑްގެ ސޮއި ހޯދާ ކްލަބެއްގެ އަތުން އޭނާގެ އޭޖެންޓް މިނޯ ރައިއޯލާ މަދުވެގެން 20 މިލިއަން ޑޮލަރުގެ ފީއެއް ނަގަން އޮތީ ނިންމައިފަ އެވެ. އެހެންވެ، މަޝްހޫރު އެހެން ކްލަބްތަކެކޭ އެއްގޮތަށް ޗެލްސީން ވެސް ހާލަންޑްގެ ޑީލް މި ފަހަރު ކުރިއަށް ނުގެންދިއުމުގެ ފުރުސަތު އެބައޮތެވެ.
ހާލަންޑް ހޯދުމުގެ މަސައްކަތް މަޑުޖައްސާލުމަށް ފަހު ފެންވަރު ރަނގަޅު އެހެން ފޯވާޑެއް ލިބޭނެ ގޮތެއްވޭތޯ ޗެލްސީން އަންނަނީ މަސައްކަތް ކުރަމުންނެވެ. އޭގެ ތެރެއިން ޗެލްސީން ފާރަލާ އެއް ފޯވާޑަކީ މިދިޔަ އަހަރު ދުނިޔޭގެ އެންމެ މޮޅު ކުޅުންތެރިޔާގެ މަގާމު ހޯދި ލެވަންޑޯސްކީ އެވެ. އުމުރުން 32 އަހަރުގެ ލެވަންޑޯސްކީ މި ވަގުތު ބަޔާނުގެ ކޮންޓްރެކްޓްގައި ހުރީ 2023 ވަނަ އަހަރުގެ ނިޔަލަށެވެ.
ލަނޑު ޖެހުމުގެ ގިނަ ރެކޯޑްތަކެއް މުގުރާލަމުން އަންނަ ލެވަންޑޯސްކީ ކްލަބް ބަދަލުކުރަން ބޭނުން ނަމަ ޗެލްސީން އޮތީ އޭނާ އަށް 50 މިިލިއަން ޑޮލަރު ހުށަހަޅަން ތައްޔާރަށެވެ. ލެވަންޑޯސްކީގެ އުމުރާއި ބަޔާނުގައި އޭނާގެ ކޮންޓްރެކްޓްގެ މުއްދަތަށް ބަލާއިރު، މިއީ އެކަށީގެންވާ އަގެއް ކަމަށް ފުޓްބޯޅަ ދިރާސާކުރާ ފަރާތްތަކުން ދެކެ އެވެ.
މިދިޔަ ސީޒަނުގައި ލެވަންޑޯސްކީ ވަނީ ޖަރުމަނު ލީގުގައި 49 އަހަރުވީ ރެކޯޑަކާ ހަމަކޮށްފަ އެވެ. ލީގުގެ އެއް ސީޒަނެއްގައި 40 ގޯލު ޖަަހައިގެން ކުރީގެ އެއް ވަަނަ ފޯވާޑް ގާޑް މުލާ ރެކޯޑް ހެދީ 1972 ވަނަ އަހަރު އެވެ. ލެވަންޑޯސްކީ މިދިޔަ ސީޒަނު ލީގުގައި 41 ގޯލު ޖެހީ 29 މެޗުންނެވެ. އަނިޔާގެ ސަބަބުން ލެވަންޑޯސްކީ އަށް މެޗުތަކެއް ގެއްލުނު ނަމަވެސް ބޮޑު ރެކޯޑް މުގުރާލުމުގައި އޭނާ ކާމިޔާބު ހޯދި އެވެ.
ކުޑަ އަގެއްގައި ފެންވަރު ރަނގަޅު ފޯވާޑެއް ހޯދަން ޗެލްސީން މަސައްކަތް ކުރާނަމަ ބާސެލޯނާގެ ފްރާންސް ފޯވާޑް އެންޓޮއިން ގްރީޒްމަން ލިބުމުގެ ފުރުސަތު އެބައޮތެވެ.
ބާސެލޯނާގެ ޖުމްލަ މުސާރަތައް ލަލީގާގެ ގަވާއިދަށް ފެއްތުމުގެ ގޮތުން ބޮޑު މުސާރައިގައި ތިބި ބައެއް ކުޅުންތެރިން ދޫކޮށްލާން ވަނީ ނިންމައިފަ އެވެ. އެ ގޮތަށް ދޫކޮށްލާ ކުޅުންތެރިންގެ ތެރޭގައި ގްރީޒްމަން ހިމެނެ އެވެ. ޗެލްސީން ބޭނުންނަމަ ބާސެލޯނާ އަށް 25 މިލިއަން ޑޮލަރުގެ ފީއެއް ދެއްކުމަށް ފަހު ގްރީޒްމަންގެ ސޮއި ހޯދޭނެ އެވެ.
