އަންނަ މަހު ކުޅޭ އޭއެފްސީ ކަޕްގެ މެޗުތަކަށް ތައްޔާރުވުމުގެ ގޮތުން ރާއްޖޭގެ ޗެމްޕިއަން މާޒިޔާ އިން ސައުދީ އަރަބިއްޔާގައި ޓްރެއިނިން ކޭމްޕެއް ފުރިހަމަަ ކުރާގޮތަށް ހަމަޖެހިއްޖެ އެވެ.
އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ)، "އަދަދު" އަށް ވިދާޅުވީ އެފްއޭއެމުން ކުރެވުނު މަޝްވަރާތަކަށް ފަހު ސައުދީ އަރަބިއްޔާ އިން ދޭ ފުރުސަތެއްގައި މާޒިޔާ އިން ޓްރެއިނިން ކޭމްޕެއް ފުރިހަމަކުރާ ގޮތަށް ހަމަޖެހިފައިވާ ކަމަށެވެ.
މާޒިޔާ ޓްރެއިނިން ކޭމްޕަށް ފުރާނީ އަންނަ ހޮނިހިރު ދުވަހު އެވެ. ރާއްޖެ އެނބުރި އަންނަ ގޮތަށް ހަމަޖެހިފައިވަނީ އަންނަ މަހުގެ 14 ވަނަ ދުވަހު އެވެ.
އޭއެފްސީ ކަޕަށް ތައްޔާރުވާން މާޒިޔާ އިން ޕްރެކްޓިސް ފެށީ މި މަހުގެ 10 ވަނަ ދުވަހު އެވެ. ސައުދީ އަރަބިއްޔާގައި މާޒިޔާ އަށް ފެންވަރު ރަނގަޅު ވަސީލަތްތަކުގައި ދެ ހަފްތާ އަށް ވުރެ ގިނަ ދުވަހު ފަރިތަކުރުންތައް ކުރިއަށްގެންދެވޭނެ އެވެ.
އަންނަ މަހު އޭއެފްސީ ކަޕްގެ ދެކުނު އޭޝިއާގެ ގްރޫޕްގެ މެޗުތައް ބާއްވަން އޭއެފްސީން މިހާރު ފުރުސަތު ދީފައިވަނީ ރާއްޖެ އަށެވެ.
މި ވަގުތަށް ބަލާއިރު، އޭއެފްސީ ކަޕްގެ ގްރޫޕް ސްޓޭޖުގައި ރާއްޖެ ތަމްސީލްކުރުމުގެ ފުރުސަތު ލިބިފައި އޮތީ މާޒިޔާ އަށެވެ. ރާއްޖޭގެ އަނެއް ކްލަބް، އީގަލްސް އިން ކޮލިފައިން ޕްލޭއޮފްގައި ކުޅޭނީ އިންޑިއާގެ ބެންގަލޫރާ ދެކޮޅަށެވެ. އެ މެޗުން މޮޅުވެގެން އީގަލްސް އަށް ވެސް ގްރޫޕް ސްޓޭޖުން ފުރުސަތު ލިބޭނެ އެވެ.
މިހާރު އޮތްގޮތުން އޭއެފްސީ ކަޕްގައި މާޒިޔާ ކުޅޭ ފުރަތަމަ މެޗުގައި އަންނަ މަހުގެ 18 ވަނަ ދުވަހު ކުޅޭނީ ބަންގްލަދޭޝްގެ ޗެމްޕިއަން ބަޝުންދުރާ ކިންގްސްއާ އެވެ. ދެ ވަނަ މެޗުގައި އަންނަ މަހުގެ 21 ވަނަ ދުވަހު އިންޑިއާގެ އޭޓީކޭ މޯހަން ބަގާންއާ ބައްދަލުކުރުމަށް ފަހު އޭގެ ތިން ދުވަސް ފަހުން އަންނަ މަހުގެ 24 ވަނަ ދުވަހު ކުޅޭނީ ޕްލޭއޮފްގައި އީގަލްސް އާއި ބެންގަލޫރު ކުޅެގެން މޮޅުވާ ޓީމަކާ އެވެ.
އީގަލްސް އާއި ބެންގަލޫރު ކުޅޭ ޕްލޭއޮފް މެޗު އޮންނާނީ އަންނަ މަހުގެ 15 ވަނަ ދުވަހު އެވެ.
ވަރުގަދަ މެޗުތަކަކަށް ތައްޔާރުވުމުގެ ކުރިން މާޒިޔާ އިން ސައުދީގައި ކޭމްޕް ޖަހާއިރު، މިއީ ފާއިތުވި ދެ އަހަރެއްހާ ދުވަހަށް ބަލާއިރު މާޒިޔާ އިން ސައުދީގައި ޓްރެއިނިން ކޭމްޕެއް ފުރިހަަމަކުރާނެ ދެ ވަނަ ފަހަރެވެ. އެ ޓީމުން ވަނީ 2019 ވަނަ އަހަރުގެ މެއި މަހުގެ ތެރޭގައި ވެސް އެފްއޭއެމުން ހޯދައިދިން ފުރުސަތެއްގައި ސައުދީ އަރަބިއްޔާގައި ޓްރެއިނިން ކޭމްޕެއް ފުރިހަަމަކޮށްފަ އެވެ.
މާޒިޔާ އަށް އެ ފަހަރު ޓްރެއިނިން ކޭމްޕް ދިނީ އެ އަހަރު ކްލަބް ލައިސަންސް މައްސަލަ ޖެހިގެން އޭއެފްސީ ކަޕުގައި ވާދަކުރުމުގެ ފުރުސަތު ގެއްލުނު ދިވެހި ދެ ކްލަބް ތެރޭގައި މާޒިޔާ ހިމެނޭތީ އެވެ. މާޒިޔާގެ އިތުރުން އެ ފަހަރު ޓްރެއިނިން ކޭމްޕް ދިނީ 2018 ވަނަ އަހަރުގެ ލީގު ޗެމްޕިއަން ޓީސީ އަށެވެ.
