ހދ. ހަނިމާދޫ އިންޓަނޭޝަނަލް އެއާޕޯޓު ތަރައްގީކުރަން ސަރުކާރުން ބޭނުންވި ވަރުގެ ބޮޑު ބިމެއް ދޭން ރައްޔިތުންގެ ހުރި ކަންބޮޑުވުންތަކަށް ބަލައި, ކުޑަ ބިމަކަށް ސަރުކާރުން އެންމެ ފަހުން މިއަދު އެއްބަސްވެއްޖެ އެވެ.
މިދިޔަ މާޗް މަހު ޕްލޭނިން މިނިސްޓްރީން އެ ރަށު ކައުންސިލަށް ފޮނުވި ސިޓީއެއްގައި އެދިފައިވަނީ އެއާޕޯޓަށް އިތުރު ކުރާ ބިމުގައި ސިފައިންގެ ނޯދާން އޭރިޔާ ހެޑްކުއާޓާސް ވެސް އަޅަން ހަމަޖައްސާފައިވާތީ އެރަށުން 853،937 އަކަފޫޓުގެ ބިމެއް ހަމަޖައްސައި ދިނުމަށެވެ. އެއާއެކު ގިނަ ރައްޔިތުން ކަންބޮޑުވުން ފާޅުކޮށް ސަރުކާރަށް ޕެޓިޝަންތައް ހުށަހެޅި އެވެ.
އެހާ ބޮޑު ބިމެއް އެއާޕޯޓް ތަރައްގީކުރަން ދޫކޮށްލާކަށް ރައްޔިތުންނާއި ކައުންސިލުން ބޭނުމެއް ނުވެ އެވެ. މި މައްސަލައިގައި, ކައުންސިލާއި ޕްލޭނިން މިނިސްޓްރީއާ ދެމެދު މަޝްވަރާތަކެއް ކުރެވުނު ނަމަވެސް އޮތީ އެކަށީގެންވާ ހައްލަކާ ހަމައަށް ނާދެވި އެވެ.
އެކަމަކު, ހަނިމާދޫގެ ރައްޔިތުންނާ އެކު ރައީސް އިބްރާހިމް މުހައްމަދު ސޯލިހް މިއަދު އެ ރަށުގައި ބޭއްވެވި ބައްދަލުވުމުގައި, އެމަނިކުފާނު އެއްބަސްވެވަޑައިގަތީ ރައްޔިތުން އެދޭ މިންވަރުގެ ބިމެއް ސަރުކާރުން ނެގުމަށެވެ. އެއާޕޯޓު ސަރަހައްދުން އެހާ ބޮޑު ބިމެއް ދޭން ބޭނުން ނުވުމުގައި ރައްޔިތުންގެ ހުރި ކަންބޮޑުވުންތައް މިއަދު ވެސް އެމަނިކުފާނަށް ހުށަހެޅި އެވެ.
ހަނިމާދޫ ރައްޔިތުންގެ ނުތަނަވަސްކަން ހުރި ބިމުގެ މައްސަލަ ރައީސް މި ހައްލުކޮށްދެއްވީ, ހދ.ގެ ތިން ރަށަކަށް ކުރެއްވި ދަތުރުފުޅުގައި އެންމެ ފަހު މަންޒިލެއްގެ ގޮތުގައި މިއަދު ހަނިމާދު އަށް ވަޑައިގެން ބޭއްވެވި ބައްދަލުވުމުގަ އެވެ.
ރައީސް އޮފީހުގެ ތަރުޖަމާން މަބްރޫކް އަޒީޒް ވިދާޅުވީ ހަނިމާދޫ އެއާޕޯޓް ތަރައްގީކުރުމުގެ މަޝްރޫއަށް ބޭނުންވާ ބިން ކަނޑައެޅުމުގައި ހުރި ކަންބޮޑުވުންތަކާ މެދު މަޝްވަރާކޮށް، މިހާރު ވަނީ ރައްޔިތުން އެދޭ ފަދަ ހައްލެއް ހޯދިފައި ކަމަށެވެ.
އެކަމުގެ ތަފްސީލް "އަދަދު" އަށް ދެއްވަމުން ހަނިމާދޫ ކައުންސިލްގެ ރައީސް އަބްދުލް ސައްތާރު ހަސަން ވިދާޅުވީ ސަރުކާރުން އެދުނީ ސިފައިންގެ މައި މަރުކަޒު އެޅުމަށާއި ސިޓީ ހޮޓަލެއް އެޅުމަށް އެއާޕޯޓާ ދިމާލުން އެރަށު އިރުމަތި ފަރާތު ގޮނޑުދޮށް ހިމެނޭގޮތަށް 853،937 އަކަފޫޓުގެ ބިމެއް ހަމަޖައްސައި ދިނުމަށް ކަމަށާއި ނަމަވެސް މިއަދު ރައީސްއާއެކު އެއްބަސްވީ އެ ރަށު އެއާޕޯޓް ސަރަހައްދުން ކަސްޓަމްސްއާ ޖެހިގެން 420،316 އަކަފޫޓުގެ ބިމެއް ރަށު ތެރެއިން ދިނުމަށް ކަމަށެވެ.
"ސިފައިންގެ މަރުކަޒު އަޅަން ބިން މިދިނީ އެއީ ވެސް މުހިންމު ކަމަކަށް ވާތީ. ރަށު ތެރޭން މިދިނީ. މި ދުވަސްވަރަށް ސިޓީ ހޮޓާ ނާޅާގޮތަށް ހަމަޖައްސައިފައި،" ސައްތާރު ވިދާޅުވި އެވެ.
ހަނިމާދޫ ރައްޔިތުންނާއެކު ރައީސް ބޭއްވި ބައްދަލުވުމުގެ ތެރެއިން: ރައްޔިތުން އެދުނުގޮތަށް ބިން ވަނީ ހަމަޖައްސައިފައި-- ފޮޓޯ: ރައީސް އޮފީސް
ސަރުކާރު އެދުނު ބިން ނުދޭން ރައްޔިތުން ނިންމީ އެއީ ގޮނޑުދޮށް ކަމަށް ވެފައި ޓޫރިޒަމަށް ބޭނުން ކުރެވޭނެތީ ކަމަށް ސައްތާރު ވިދާޅުވި އެވެ. މިހާރު ރަށު ތެރޭން ބިން ދިނުމާއެކު ރައްޔިތުންގެ އެ ކަންބޮޑުވުންތަކަށް ހައްލު ލިބިފައިވާ ކަމަށް ސައްތާރު ވިދާޅުވި އެވެ.
ސައްތާރު ވިދާޅުވީ އެއާޕޯޓް އިތުރަށް ފުޅާ ކުރުމަށް އެއާޕޯޓް ސަރަހައްދުން ދޭ ބިން ދިނުމަށް ރައްޔިތުންގެ އެއްވެސް ކަންބޮޑުވުމެއް ނެތް ކަމަށެވެ. އެއީ 11.7 ހެކްޓަރުގެ ބިމެކެވެ.
ހަނިމާދޫ އިންޓަނޭޝަނަލް އެއާޕޯޓް އަޕްގްރޭޑް މަސައްކަތް ނިމުމުން އުތުރުގެ ފަތުރުވެރިކަމަށް ބޮޑު ކުރިއެރުމެއް އަންނާނެ ކަމަށް ސަރުކާރުން އަންދާޒާ ކުރެ އެވެ.
މި މަޝްރޫއަކީ މިހާތަނަށް އުތުރުގެ އަތޮޅެއްގައި އެންމެ ބޮޑު ހޭދައެއް ކޮށްގެން ހިންގާ މަޝްރޫއެވެ. އަދި މި އެއާޕޯޓް ތަރައްގީ ކުރެވުމުން ދިވެހިރާއްޖޭގެ އުތުރުގެ އަތޮޅުތަކުގެ ކުރިމަގު އާރާސްތުކޮށް، ފަތުރުވެރިކަމާއި އިގްތިސާދުގެ މައިދޮރަށް ހަނިމާދު ވެެގެން ދާނެ ކަމަށް ސަރުކާރުން އުއްމީދު ކުރެ އެވެ.
