ޕަބްލިކް ސާވިސް މީޑިއާ (ޕީއެސްއެމް) ގައި މަސައްކަތް ކުރާ މުވައްޒަފުންގެ އަދަދު މަދު ކުރުމުގެ މަސައްކަތް ކުރަމުންދާ ކަމަށް އެ ކުންފުނިން ބުނެފި އެވެ.
ދައުލަތުގެ ބަޖެޓުން ހަރަދުކޮށްގެން ހިންގާ ޕީއެސްއެމްގައި މިހާރު އުޅެނީ 400 މުވައްޒަފުންނެވެ. މީގެ ތިން އަހަރު ކުރިން އިބްރާހިމް މުހައްމަދު ސޯލިހު ވެރިކަމަށް ވަޑައިގެންނެވިއިރު އެތަނުގައި ގާތްގަނޑަކަށް 521 އަށް ވުރެ ގިނަ މުވައްޒަފުން އުޅުނެވެ.
"އަދަދު" އާ ވާހަކަ ދައްކަވަމުން ޕީއެސްއެމްގެ މެނޭޖިން ޑައިރެކްޓަރު އަލީ ހާލިދު ވިދާޅުވީ މުވައްޒަފުން މަދު ކުރަނީ ހަރަދު ކުޑަ ކުރުމުގެ ގޮތުން ކަމަށެވެ.
"އަޅުގަނޑުމެން މިހާރު ތިން ފަހަރެއްގެ މަތިން [ޕީއެސްއެމް ހިންގުމުގެ] ސްޓްރަކްޗާއެއް ކުރަހައިފިން. ގާތްގަނޑަކަށް 360 މުވައްޒަފުންނަށް އަދަދު މަދު ކުރަން މި މަސައްކަތް ކުރަނީ،" ހާލިދު ވިދާޅުވި އެވެ.
އޭގެ އިތުރުން ވެސް ހަރަދު ކުޑަ ކުރުމުގެ ގޮތުން ވަރަށް ގިނަ މަސައްކަތްތައް ކުރަމުންދާ ކަމަށް ހާލިދު ވިދާޅުވި އެވެ. އެގޮތުން މިހާރު ޕީއެސްއެމް ހިންގަމުންދާ އިމާރާތުގެ ގޯތި ތެރޭގައި އިތުރު އިމާރާތެއް އަޅައި ހުރިހާ މުވައްޒަފުން އެއް އިމާރާތަކަށް ބަދަލު ކުރުމުގެ މަސައްކަތް ކުރަން ނިންމާފައިވާ ކަމަށް އޭނާ ވިދާޅުވި އެވެ.
"މުވައްޒަފުން އެއް އިމާރާތަކަށް ބަދަލު ކުރީމަ ވެސް (ހަރަދު) ކުޑަ ކުރެވޭނެ ބައިވަރު ކަންކަން ހުންނާނެ،" ހާލިދު ވިދާޅުވި އެވެ.
ޕީއެސްއެމްގެ ކުޑައިގެ ދަށުން ހިންގާ މީޑިއާތަކަކީ ޓީވީއެމް، ދިވެހިރާއްޖޭގެ އަޑު، ދިވެހި އެފްއެމް، ޔެސް ޓީވީ، މަލްދީބް މަޖައްލާ، ދީނުގެ އަޑު، މަޖްލިސް ޓީވީ، މުންނާރު އަދި މޯލްޑިވްސް ޓީވީ އެވެ. މީގެ ތެރެއިން ޓީވީއެމް އާއި ދިވެހިރާއްޖޭގެ އަޑަކީ ރާއްޖޭގެ އެންމެ ދުވަސްވީ ބްރޯޑްކާސްޓިން ޗެނަލްތަކެވެ.
