ޑާބަން، ދެކުނު އެފްރިކާ (ޖުލައި 18) - ދެކުނު އެފްރިކާގެ ގޮނޑުދޮށްތަކަށް މަރުވެފައިވާ މަސް ލައްގަމުން ދާތީ، އެ ތަންތަން ބަންދުކޮށް، މައްސަލަ ބަލަން ފަށައިފި އެވެ.
ކަމާ ބެހޭ ފަތާތްތަކުން ބުނީ ބެލެވޭ ގޮތުގައި މަސް މަރުވެ، ލައްގަމުން ދަނީ މިދިޔަ ހަފްތާގައި ހިންގި ހަމަނުޖެހުންތަކުގައި ކެމިކަލް ޕްލާންޓަކަށް ދިން ހަމަލާއާ ގުޅިގެން ކަމަށެވެ.
އިރުމަތީ ޑާބަން ސިޓީގެ އެގްރޯކެމިކަލް ގުދަނެއްގައި ރޯކޮށްލުމުން ކެމިކަލް ލީކުވިކަން އެނގުނީ މިދިޔަ ބުރާސްފަތި ދުވަހު އެވެ. އެހެންވެ އެ ސަރަހައްދުގެ ހުރިހާ ގޮނޑުދޮށެއް ވަނީ ބަންދުކޮށްފަ އެވެ.
އެގޮތުން މަސް ބޭނުމާއި، ސާފް ކުރުމާއި، މަރުވެގެން ގޮނޑުދޮށަށް ލައްގާފައިވާ އެއްވެސް ކަނޑުގެ ދިރުމެއް ނެގުން ވަނީ އާއްމުންނަށް މަނާކޮށްފަ އެވެ.
މިދިޔަ ހަފްތާގައި ދެކުނު އެފްރިކާގެ އެކި ހިސާބުތަކުގައި ބޮޑެތި ހަމަނުޖެހުންތައް ހިންގި އެވެ. ޑާބަން ސިޓީގައި ވެސް އިމާރާތްތަކުގައި ހުޅު ޖަހައި، ލޫޓުވާ ހެދި އެވެ.
ކަމާ ބެހޭ ފަރާތްތަކުން ބުނީ ކެމިކަލް ހުރި ގުދަނުގައި ރޯކުރުމުން އަލިފާންގަނޑު ނިއްވާލަން ވަރަށް ގިނައިން ފެން ބޭނުން ކުރަން ޖެހުނު ކަމަށާއި "ތަގައްޔަރުވެފައި ހުރި ފެން" ކައިރީގައިވާ ކޯރުން ފެށިގެން ގޮސް މޫދާ ހަމަޔަށް ގޮސްފައިވާ ކަމަށެވެ.
"މީގެ އަސަރު ކަނޑުގެ ދިރުންތަކަށް ވަނީ ކޮށްފައި،" އެ ސަރަހައްދުގެ އެންވާރަމަންޓަލް ޑިޕާޓްމަންޓުން ނެރުނު ބަޔާނެއްގައި ބުންޏެވެ.
ދެކުނު ހަފްތާގައި މިދިޔަ ހަފްތާގައި ހަމަނުޖެހުން ހިނގަން ފެށީ ކުރީގެ ރައީސް ޖޭކޮބް ޒޫމާގެ ކޮރަޕްޝަން ތަހުގީގަށް އެއްބާރުލުން ނުދިނުމުން އިއްވި 15 އަހަރުގެ ޖަލު ހުކުމް ތަންފީޒު ކުރަން ފެށުމުންނެވެ.
ޒޫމާއަށް ތާއީދު ކުރާ މީހުން ފެށި ހަމަނުޖެހުމުގައި އާއްމުންގެ ގިނަ ބަޔަކު ބައިވެރިވެ ފިހާރަތައް ލޫޓުވާ ތަންތަނުގައި ހުޅު ޖަހާފައި ވާއިރު، ހަމަނުޖެހުންތަކުގައި 212 މީހުން މަރުވި އެވެ.
