ތެހްރާން، އިރާން (ޖުލައި 18) - އިރާނުގެ ނިއުކްލިއާ އެއްބަސްވުމާ ގުޅޭ މަޝްވަރާތައް ދެން ކުރިއަށް ގެންދާނީ އާ ސަރުކާރުން އަންނަ އޯގަސްޓް މަހު ވެރިކަމާ ހަވާލުވުމުން ކަމަށް އެ ގައުމުން ބުނެފި އެވެ.
މިދިޔަ އޭޕްރިލް މަހުން ފެށިގެން އިރާނުން ދިޔެއީ ބޮޑެތި ގައުމުތަކާއެކު ނިއުކްލިއާ އެއްބަސްވުމާ ގުޅޭ މަޝްވަރާތައް ކުރަމުންނެވެ. ނަމަވެސް މިހާރު ވަނީ މަޝްވަރާތައް މެދުކެނޑިފަ އެވެ.
"އަޅުގަނޑުމެން މި ތިބީ އިންތިގާލީ މަރުހަލާއެއްގައި... އެހެންވީމަ އަޅުގަނޑުމެންގެ އާ ސަރުކާރު މަސައްކަތް ފަށަން ދެން ވިއެނާގައި ކުރިއަށްދާ މަޝްވަރާތައް ޖެހޭނީ މަޑުޖައްސާލަން،" އިރާނުގެ ޑެޕިއުޓީ ފޮރިން މިނިސްޓަރު އައްބާސް އަރަގްޗީ ކުރެއްވި ޓްވީޓެއްގައި ވިދާޅުވި އެވެ.
"ކޮންމެ ޑިމޮކްރެސީއަކުން ވެސް ޑިމާންޑު ކުރާނީ މިކަމަށް،" އިރާނުގެ ނިއުކްލިއާ އެއްބަސްވުމާ ގުޅޭ މަޝްވަރާ ކުރާ ޓީމުގެ އެންމެ އިސްވެރިޔާގެ ގޮތުގައި ހުންނަވާ އަރަގްޗީ ވިދާޅުވި އެވެ.
އިރާނުގެ އާ ރައީސްކަމަށް އަލްޓްރާ ކޮންޒަވޭޓިވް އިބްރާހިމް ރައިސީ އިންތިހާބުވެ ވަޑައިގެންނެވީ މިދިޔަ ޖޫން މަހު އެވެ. އޭނާ މަގާމާ ރަސްމީކޮށް ހަވާލުވެ ވަޑައިގަންނަވާނީ އޯގަސްޓް ފަސް ވަނަ ދުވަހު އެވެ.
އިރާނާއެކު ބޮޑެތި ގައުމުތަކުން 2015 ވަނަ އަހަރު އެކުލަވާލި ނިއުކްލިއާ އެއްބަސްވުން ތަންފީޒު ކުރުން ހުއްޓުނީ އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ސަބަބުން 2018 ވަނަ އަހަރު އެވެ.
ޓްރަމްޕް ވަނީ އެއްބަސްވުމުން ވަކިވެ، އިރާނާ ދެކޮޅަށް ދަތި ކުރުމުގެ ފިޔަވަޅުތައް އަޅަން އަނެއްކާ ވެސް ފައްޓަވާފަ އެވެ. އެހެންވެ، އިރާނުން ވެސް އެއްބަސްވުމަށް އަމަލު ކުރުން ހުއްޓާލީ އެވެ.
މިހާރު އަނެއްކާވެސް އެ އެއްބަސްވުން އަލުން އިއާދަ ކުރުމުގެ މަޝްވަރާތައް ކުރަނީ އެމެރިކާގެ އާ ރައީސް ޖޯ ބައިޑެން އެކަމަށް ޝައުގުވެރުކަން ފާޅުކުރެއްވުމުންނެވެ.
އެއާއެކު އެމެރިކާ އާއި އިރާނާއެކު، އިނގިރޭސި ވިލާތް، ޗައިނާ، ފްރާންސް، ޖަރުމަނު ވިލާތް އަދި ރަޝިއާއިން ވެސް ދަނީ އޮސްޓްރިއާގެ ވިއެނާގައި އޮންނަ މަޝްވަރާ ބައްދަލުވުންތަކުގައި ބައިވެރިވަމުންނެވެ.
މަޝްވަރާތަކުގެ ހަ ވަނަ ބުރު ނިމުނީ ޖޫން 20 ގަ އެވެ. ހަތް ވަނަ ބުރު ބާއްވާނެ ތާރީހު އިއުލާނުކޮށްފައެއް ނުވެ އެވެ.
