އަވަށްޓެރި ސްރީލަންކާގެ މަސްބޯޓެއްގައި ރާއްޖޭން އެ ގައުމަށް މުދާ ވަގަށް އެތެރެކުރާ ނެޓްވާކެއް އަތުލައިގެންފައިވާކަމަށް ލަންކާ ފުލުހުން ބުނެފި އެވެ.
ލަންކާ ކޯސްޓްގާޑުން އަތުލައިގެންފައިވަނީ ރާއްޖޭން ވަގަށް މުދާ ހިފައިގެން ބޭރުވަލަ ހާބަރަށް އައި ލަންކާގެ މަސްބޯޓެއް ކަމަށް ފުލުހުންނާ ހަވާލާދީ ލަންކާގެ ބައެއް މީޑިއާތަކުން ވަނީ ރިޕޯޓުކޮށްފަ އެވެ.
ބޭރުވަލަ ހާބަރަށް މިދިޔަ ހުކުރު ދުވަހުގެ ރޭ އެ މުދާތައް ބާލަނިކޮށް ހައްޔަރުކޮށްފައިވަނީ ލަންކާގެ ހަ މަސްވެރިން ކަމަށް ވެސް ބުނެފައި ވެ އެވެ.
ލަންކާ ފުލުހުން އަތުލައިގަތް ތަކެތީގެ ތެރޭގައި، މަސްދަޅާއި، އަންނައުނާއި، އިލެކްޓްރޯނިކް ސާމާނުގެ އިތުރުން ސެންޓު ހިމެނޭކަމަށް ބުންޏެވެ.
ރިޕޯޓުތައް ބުނާ ގޮތުން، ބޭރުވަލައިން ނައްޓާލައިގެން އެ މަސްބޯޓު ރާއްޖޭގެ ކަނޑުގެ ސަރަހައްދަށް ވަދެ އުޅެނިކޮށް ހިފަހައްޓާފައިވަނީ މިދިޔަ މަހުގެ ތެރޭގަ އެވެ.
އޭގެ ފަހުން އެ މީހުންނަށް އެހީވެ، އެ މުދާތައް ލަންކާއަށް ގެންދަން ހަވާލުކުރީ ރައީސް އޮފީހުގެ މީހެއް ކަމަށް އެ މަސްވެރިން ފުލުހުން ގާތު ބުނެފައި ވެ އެވެ.
އެކަމާ ގުޅޭގޮތުން ރާއްޖޭގެ ފޮރިން މިނިސްޓްރީން ބުނީ އެފަދަ މައުލޫމާތެއް އަދި ލިބިފައިނުވާ ކަމަށާއި އެފަދަ މައްސަލަތަކުގައި ލަންކާ ފުލުހުން އާންމުކޮށް މުއާމަލާތް ކުރާނީ ސީދާ ދިވެހި ފުލުހުންނާ ކަމަށެވެ.
ނަމަވެސް، ދިވެހި ފުލުހުންނާ އެ މައްސަލަ ގުޅޭގޮތެއް ނޭނގޭކަމަށް ފުލުހުންގެ މީޑިޔާ އޮފިޝަލު ވިދާޅުވި އެވެ.
