ލަންޑަން (ޖުލައި 17) - ބްރައިޓަންގެ އިނގިރޭސި ޑިފެންޑަރު ބެން ވައިޓް ގާތްގަނޑަކަށް 60 މިލިއަން ޑޮލަރަށް ގަތުމަށް އާސެނަލުން ބްރައިޓަންއާ އެކު އެއްބަސްވެއްޖެ ކަމަށް ސްކައި ސްޕޯޓްސް އިން ރިޕޯޓްކޮށްފި އެވެ.
މި ފަހަރުގެ ޓްރާންސްފާ މާކެޓް ފެށި ފަހުން އާސެނަލުން މީގެ ކުރިން ވަނީ އުމުރުން 23 އަހަރުގެ ވައިޓް ގަންނަން ދެ ފަހަރު ބިޑް ކޮށްފަ އެވެ. ބްރައިޓަން އިން ބޭނުންވާ އަގު ނުލިބޭތީ އެ ދެ ބިޑް ވެސް ވަނީ އަނބުރާ ފޮނުވާލައިފަ އެވެ. އާސެނަލުން ފުރަތަމަ ކުރީ 48 މިލިއަން ޑޮލަރުގެ ބިޑެކެވެ. ދެ ވަނަ ފަހަރަށް ހުށަހެޅީ 54 މިލިއަން ޑޮލަރުގެ ބިޑެކެވެ.
އިންގްލެންޑުން މި ފަހަރު ޔޫރޯގައި ވާދަކުރި ސްކޮޑުގައި އެންމެ ފަހު ވަގުތު ހިމެނުނު ވައިޓް މި ވަގުތު ހުރީ ޗުއްޓީގަ އެވެ. އާސެނަލްގެ މެޑިކަލް ޓެސްޓްތަކުގައި ވައިޓް ބައިވެރިވާނީ މި މަހުގެ 26 ގައި ކަމަށް ސްކައި ސްޕޯޓްސް އިން ވަނީ ރިޕޯޓްކޮށްފަ އެވެ.
ސައުތެމްޓަން އެކެޑަމީން ފާހަގަވި ވައިޓަށް އެ ޓީމުން ފުރުސަތެއް ނުލިބުމުން އޭނާ ނިންމީ ބްރައިޓަންއާ ގުޅޭށެވެ.
ބްރައިޓަން އަށް ކުޅުނުއިރު، ލޯން އެއްބަސްވުމެއްގެ ދަށުން ވަނީ ނިއުޕޯޓް ކައުންޓީ އާއި ޕީޓަބޮރޯ ޔުނައިޓެޑް އަދި ލީޑްސް ޔުނައިޓެޑަށް ކުޅެފަ އެވެ. ވައިޓް ބޮޑަށް ވިދާލީ 2019/2020 ވަނަ އަހަރުގެ ސީޒަނުގައި މާސެލޯ ބިއެލްސާގެ ކޯޗުކަމުގައި ލީޑްސް ޔުނައިޓެޑްގައި ދެއްކި މޮޅު ކުޅުމުގެ ސަބަބުންނެވެ. މިދިޔަ ސީޒަން ފެއްޓުމުގެ ކުރިން ލީޑްސް އިން ވައިޓް ގަންނަން ބޭނުންވެ ގިނަ އޮފާތަކެއް ހުށަހެޅި ނަމަވެސް ބްރައިޓަން އިން ވައިޓް ދޫކުރަން އެއްބަހެއްނުވި އެވެ.
މި ފަހަރުގެ ޓްރާންސްފާ މާކެޓްގައި އާސެނަލުން ވަނީ ޕޯޗުގަލްގެ 21 އަހަރުން ދަށުގެ ޓީމުގެ ޑިފެންޑަރު ނޫނޯ ޓަވަރޭސް ގެނެސްފަ އެވެ. އާސެނަލުން އޭނާގެ ސޮއި ހޯދީ ބެންފީކާ އަށް 10 މިލިއަން ޑޮލަރު ދައްކައިފަ އެވެ. މީގެ އިތުރުން އާސެނަލް ވަނީ ބެލްޖިއަމްގެ އެންޑަލެކްޓަށް ކުޅޭ އަލްބާޓް ސަމްބީ ލޮކޮންގާ ގެންނަން އެއްބަސްވުމަކަށް އަތުވެފަ އެެވެ. އޭނާ ހޯދަން 18 މިލިއަން ޑޮލަރު ޖުމްލަ އެއްކޮށް ދައްކާނެ އެވެ.
އާސެނަލުން ދެން ގެންނަން މަސައްކަތް ކުރަމުން އަންނަނީ މިޑްފީލްޑަރެކެވެ. އެ ގޮތުން އެ ޓީމުން ފާރަލަމުން އަންނަނީ އިޓަލީ ގައުމީ ޓީމުން ވިދާލި މެނުއަލް ލޮކަޓެއްލީ އާއި ލިޔޯންގެ ފްރާންސް މިޑްފީލްޑަރު އޮސާމް އޯއާ އެވެ. މިދިޔަ އަހަރު ވެސް އާސެނަލުން އޯއާ ގެންނަން މަސައްކަތްކުރި ނަމަވެސް އޭރު ލިޔޯނުން އޭނާ ވިއްކާލަން ބޭނުމެއްނުވި އެވެ.
