ބޮޑު އީދު ދުވަހު ހަވީރު 4:00 އިން ފެށިގެން ރޭގަނޑު 8:00 އަށް މާލޭގެ މަގުތަކުގައި ވެހިކަލް ދުއްވުންް މަނާ ވާނެ ކަމަށް މާލެ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެ އެވެ.
މާލެ ސިޓީ ކައުންސިލުން ބޭއްވި ނޫސްވެރިންގެ ބައްދަލުވުމެއްގައި މުއިއްޒު ވިދާޅުވީ މިއީ މާލޭ ރައްޔިތުން ބޭނުންވާ ގޮތެއް ބަލާފައި ކަނޑައެޅި ވަގުތެއް ކަމަށެވެ. އެގޮތުން ސޯޝަލް މީޑިއާ ޕޯލްތަކާއި ކްލަބްހައުސް ބައްދަލުވުންތަކުގެ ޒަރިއްޔާއިން މިކަމުގެ ރައްޔިތުންގެ ހިޔާލާއި މަޝްވަރާ ހޯދާފައިި ވާނެ ކަމަށް ވިދާޅުވި އެވެ.
އީދު ދުވަހު ހިނގާފައި އުޅޭ ގޮތަށް ހަމަޖައްސަން ނިންމުމާ ގުޅިގެން މުއިއްޒު ވިދާޅުވި، ގިނަ ދުވަސްތަކެއް ވަންދެން ލޮކްޑައުންގައި ތިބުމަށް ފަހު ކޭސްތައް މަދު ދަނޑިވަޅެއްގައި އައި އީދަކަށް ވާތީ، ޓްރެފިކްގެ ނުރައްކަލެއް ނެތި އާއިލާއާއެކު މަގުމައްޗަށް ނުކުންނަށް ރައްޔިތުން ބޭނުންވާ ކަމަށެވެ. އަދި މިކަމާއި ގުޅިގެން ހިޔާލު ހޯދި އިރު ގިނަ ރައްޔިތުން ބޭނުންވީ ވެހިކަލް މަނާ ވަގުތުތަކެއް ހަމަޖައްސަން ކަމަށް އޭނާ ވިދާޅުވި އެވެ.
މި އަހަރުގެ ބޮޑު އީދު ދުވަަހަކީ އަންނަ ހޯމަ ދުވަހެވެ. އެ ދުވަހު މި ވަގުތުތަކުގައި މާލެ، ހުޅުމާލެ އަދި ވިލިމާލޭގެ ހުރިހާ މަގެއްގައި އުޅެން ޖެހޭނީ ފައިމަގުގަ އެވެ. ނަމަވެސް އިމަޖެންސީ ވެހިކަލްތަކާއި ސަލާމާތީ ބާރުތަކުގެ ވެހިކަލްތަކަށް ދުއްވަން ހުއްދަ ދޭނެ އެވެ. އަދި ހާއްސަ އެހީއަށް ބޭނުންވާ މީހުން ދުއްވާ ސައިކަލާއި ޕަބްލިކް ޓްރާންސްޕޯޓް ހިދުމަތްދޭ ބަސް އަދި އެ ވަގުތު ދުއްވަން ހުއްދަ ދެވޭ ހާއްސަ ވެހިކަލްތަކަށް ވެސް މަގުމަތީގައި ދުއްވޭނެ އެވެ.
