ޕެރިސް، ފްރާންސް (ޖުލައި 15) - ކޮޕް26 ސަމިޓު ބޭއްވުމުގެ ކުރިން މޫސުމީ ބަދަލާ ދެކޮޅަށް މަސައްކަތް ކުރަން ފައިސާ ދިނުމަށް ދުނިޔެ ހޫނުވުމުގެ ސަބަބުން އެންމެ ބޮޑަށް އަސަރު ކުރަމުންދާ ގައުމުތަކުން ގޮވާލައިފި އެވެ.
ގިނަ އަދަދެއްގެ ގައުމުތަކުން ބުނީ އެންމެ މުއްސަނދި ގައުމުތައް ހިމެނޭ ޖީ7 އަދި ޖީ20 ގްރޫޕުތަކުން މޫސުމީ ބަދަލުގެ މައްސަލާގައި މާ ބޮޑު ސީރިއަސްކަމެއް ނުގެންގުޅޭ ކަމަށެވެ. މޫސުމީ ބަދަލާ ގުޅޭ އދ. ގެ ސަމިޓު، ކޮޕް26 އޮންނާނީ މި އަހަރުގެ ފަހުކޮޅު އެވެ.
މޫސުމަށް އަންނަ ބަދަލުތަކާއެކު ދުނިޔެ ހޫނުވެ، އިންސާނުންނަށް ކުރާ ނޭދެވޭ އަސަރު އިތުރުވަމުން ދާތީ، ހެޔޮ ބަދަލަށް މަސައްކަތް ކުރަން ގައުމުތަކަށް އޮންނަ ޕްރެޝަރު ދަނީ އިތުރުވަމުންނެވެ. އެގޮތުން ކޮޕް26 ސަމިޓުގައި ގިނަ ކަންކަން ހާސިލްކުރަން އެއްބަސްވާން ޖެހެ އެވެ.
އެގޮތުން 2015 ގައި އެކުލަވާލި ޕެރިސް އެއްބަސްވުން ތަންފީޒު ކުރުމުގެ ގަވާއިދު ފައިނަލް ކުރުމާއި، މޫސުމީ ބަދަލުގެ އަސަރު އެންމެ ބޮޑަށް ކުރާ ގައުމުތަކަށް ކޮންމެ އަހަރަކު 100 ބިލިއަން ޑޮލަރު ހަދިޔާ ކުރަން 2009 ގައި ވީ ވައުދު ފުއްދަން ވެސް ޖެހެ އެވެ.
"2020 ގެ ކުރިން ކޮންމެ އަހަރަކު މަދުވެގެން 100 ބިލިއަން ޑޮލަރު ދޭނެ ކަމަށް ވަނީ ވައުދުވެފައި. އަދި 2025 އިން ފެށިގެން ދޭ އަދަދު އިތުރު ކުރާނެ ކަމަށް ވެސް އެއްބަސްވި،" ކޮޕް26 އަށް ދިޔުމުގެ ކުރިން ހާސިލްކުރަން ޖެހޭ ފަސް ނުކުތާ ފާހަގަކޮށް ގައުމުތަކުން ނެރުނު ލިޔުމުގައި ވެ އެވެ.
އެ ލިޔުން ނެރުނު ގައުމުތަކުގެ ތެރޭގައި ހިމެނެނީ ކެންޔާ، އިތިއޮޕިއާ، ގެބޯން، ސޯމާލިއާ، ފިލިޕީންސް، ބޫޓާން، ޓެންޒޭނިއާ އަދި ބޮލީވިއާ އެވެ.
"ނަމަވެސް މި ޓާގެޓަށް ވާސިލްވެވިފައި ނުވާއިރު، ވީ އެންމެ އަވަހަކަށް އެކަން ހައްލުކޮށް، މުއްސަނދި ގައުމުތަކަށް އިތުބާރު ކުރެވޭނެ ގޮތް ހަދައިދޭން ޖެހޭ،" އެ ލިޔުމުގައި ބުނެފައި ވެ އެވެ.
