ތެލް އަވީވް، އިޒްރޭލް (ޖުލައި 14) - އިޒްރޭލާއި ޔުނައިޓެޑް އަރަބް އެމިރޭޓްސް (ޔޫއޭއީ) އާ ދެމެދު ގުޅުން ރަނގަޅު ކުރުން މިދިޔަ އަހަރު އެމެރިކާ މެދުވެރިވެގެން ސޮއިކުރި އެއްބަސްވުމުގެ ދަށުން އިޒްރޭލުގައި ޔޫއޭއީގެ އެމްބަސީއެއް ހުޅުވައިފި އެވެ.
އެމްބަސީ ގާއިމްކޮށްފައި ވަނީ އިޒްރޭލުގެ ފައިނޭންޝަލް ޑިސްޓްރިކްޓުގައި އަލަށް ހުޅުވި ސްޓޮކް އެކްސްޗޭންޖު އިމާރާތު ގަ އެވެ. އެކަމުން ރަމްޒުކޮށްދެނީ އިޒްރޭލާއި ޔޫއޭއީގެ ގުޅުން ރަނގަޅު ކުރަން އިގްތިސާދީ އަދި މާލީ ކަންކަން އަދާ ކުރާ ދައުރެވެ.
ޔޫއޭއީއަކީ އިޒްރޭލުގެ ޔަހޫދީ ދައުލަތް ބަލައިގަތް ތިން ވަނަ އަރަބި މެޖޯރިޓީ ގައުމެވެ.
އެމްބަސީ ހުޅުވީ އިޒްރޭލުގެ އާ ރައީސް އިސްހާގް ހެރްޒޮގް ބައިވެރިވެ ވަޑައިގެންނެވި ރަސްމިއްޔާތެއް ގަ އެވެ. ޔޫއޭއީގެ ސަފީރު މުހައްމަދު އަލް ހާޖާ ވިދާޅުވީ މިއީ "ތަރައްގީވަމުންދާ ދެ ގައުމުގެ ގުޅުމުގައި މުހިއްމު ކާމިޔާބެއް" ކަމަށެވެ.
"ޔޫއޭއީ އާއި އިޒްރޭލަކީ ވެސް އާ އީޖާދުތަކަށް އިސްކަންދޭ ދެ ގައުމު. އެކަން ކުރިއަށް ނެރިގެން ދެ ގައުމާއި، މި ސަރަހައްދަށް ދެމެހެއްޓެނިވި އަދި ފާގަތި ކުރިމަގެއް ގެނައުމަށް އެކުގައި މަސައްކަތް ކުރެވޭނެ،" އޭނާ ވިދާޅުވި އެވެ.
ހެރްޒޮގް ވިދާޅުވީ ޔޫއޭއީއާ އެކު ވެފައިވާ "ތާރީހީ އެއްބަސްވުމުގައި" ހިމެނޭ ކަންކަން "އިޒްރޭލާއެކު ސުލްހަވެރި ގުޅުމެއް ބާއްވަން ބޭނުންވާ އެހެން ގައުމުތަކަށް ވެސް" ފުޅާކުރަން ވިސްނަމުންދާ ކަމަށެވެ.
ދާދި ފަހުން އިޒްރޭލާއި ޔޫއޭއީން ވަނީ ގިނަ އަދަދެއްގެ އެއްބަސްވުންތަކުގައި ސޮއިކޮށްފަ އެވެ. އޭގެ ތެރޭގައި ފަތުރުވެރިކަމާއި ވައިގެ ދަތުރުފަތުރާއި މާލީ ކަންކަމާ ގުޅޭ އެއްބަސްވުންތައް ހިމެނެ އެވެ. އެ ހުރިހާ އެއްބަސްވުމެއްގައި ވެސް ސޮއިކުރީ އެމެރިކާގެ ކުރީގެ ރައީސް ޑޮނަލްޑް ޓްރަމްޕް އިސްވެ ހުންނަވާ އުފެއްދެވި "އަބްރަހަމް އެކޯޑްސް" ގެ ދަށުންނެވެ.
މިދިޔަ މަހު އިޒްރޭލުގެ ފޮރިން މިނިސްޓަރު ޔެއާ ލަޕިދް ވަނީ ޔޫއޭއީއަށް ވަޑައިގެން އަބޫ ދާބީގައި އިޒްރޭލުގެ ކޮންޒިއުލޭޓު ހުޅުއްވާފަ އެވެ. އޭނާއަކީ ޔޫއޭއީއަށް މިހާތަނަށް ވަޑައިގެންނެވި އިޒްރޭލުގެ އެންމެ އިސް އޮފިޝަލެވެ.
އިޒްރޭލާއެކު ގުޅުން ގާއިމް ކުރަން ޔޫއޭއީއިން ނިންމުމުން ފަލަސްތީނުން ހިތްހަމަނުޖެހުން ފާޅުކުރި އެވެ. އެއީ އިޒްރޭލާ ފަލަސްތީނާ ދެމެދު ސުލްހައި ގާއިމް ކުރުމުގެ ކުރިން އިޒްރޭލާއެކު އަރަބި އެއްވެސް ގައުމަކުން ގުޅުން ނުބާއްވަން ތާރީހީ ގޮތުން ނިންމާފައި އޮންނާތީ އެވެ.
ޔޫއޭއީއަށް ފަހު އިޒްރޭލުން ވަނީ އިތުރު އިސްލާމީ ގައުމުތަކާއެކު ޑިޕްލޮމެޓިކް ގުޅުން ގާއިމްކޮށްފަ އެވެ. އެގޮތުން ބަހްރެއިން، މޮރޮކޯ އަދި ސޫދާން ފާހަގަކުރެވެ އެވެ. އެކަމާ މެދު ހިތްހަމަނުޖެހި ފަލަސްތީނު ރައްޔިތުން މުޒާހަރާ ވެސް ކުރި އެވެ.
