މެޑްރިޑް (ޖުލައި 14) - ރެއާލް މެޑްރިޑްގެ ރައީސް ފްލޮރެންޓީނޯ ޕެރޭޒް އެ ކްލަބްގެ ދެ ލެޖެންޑުން ކަމަށްވާ އިކާ ކަސިއަސް އާއި ރައުލް ގޮންޒާލޭޒާ ބެހޭގޮތުން އަގުވައްޓާލާ ގޮތަށް ދެއްކެވި ވާހަކަތަކެއްގެ މައްސަލަ ހޫނުވެއްޖެ އެވެ.
ރެއާލްގެ ރައީސްކަން ފުރަތަމަ ދައުރުގައި ކުރެއްވުމަށް ފަހު ބްރޭކެއްގައި ހުންނަވައި ޕެރޭޒް 2006 ވަނަ އަހަރު ދެއްކެވި ވާހަކަތަކެއްގެ ތެރެއިން ލީކުވި އޯޑިއޯގައި، އޭނާ ވަނީ ރައުލް އާއި ކަސިއަސް އަކީ ރެއާލަށް ކުޅޭ ފެންވަރަށް ވުރެ ދަށް ކުޅުންތެރިން ކަމަށް ވިދާޅުވެފަ އެވެ. އަދި ކަސިއަސް އާއި ރައުލް އަކީ އޮޅުވާލައިގެން ރެއާލަށް ކުޅުނު ދެ ކުޅުންތެރިން ކަމަށް ވިދާޅުވެ، އެ މީހުންގެ އަގުވެއްޓޭގޮތަށް ޕެރޭޒް ދެއްކެވި ވާހަކަތައް ފުރަތަމަ ލިޔުނީ ސްޕެއިނުގެ "އެލް ކޮންފިޑެންޝިއަލް" ނޫހުންނެވެ.
ކަސިއަސް އާއި ރައުލް އަށް ރެއާލްގައި ހުރެ ރިޓަޔާކުރުމުގެ ފުރުސަތު ނުދިނީ ޕެރޭޒް ކަމަށް ބުނެ، މީގެ ކުރިން ވެސް ސްޕެއިނުގެ ނޫސްތަކުން ވަނީ ރިޕޯޓްކޮށްފަ އެވެ. ކަސިއަސް ރެއާލް ދޫކޮށް ކުޅުނީ ޕޯޗުގަލްގެ ޕޯޓޯ އަށެވެ. އަދި ރައުލް އެންމެ ފުރަތަމަ ރެއާލް ދޫކޮށް ޖަރުމަނުގެ ޝާލްކާ އަށް ކުޅުނު ނަމަވެސް ފަހުން އެހެން ޓީމުތަކުން ވެސް ފެނުނެވެ. ރައުލް، މި ވަގުތު ރެއާލް ބީ ޓީމުގެ ކޯޗަކަށް ހުރިއިރު، ކަސިއަސް އަކީ ކްލަބްގެ އެމްބަސަޑަރެކެވެ.
ޕެރޭޒް ދެއްކެވި ކަމަށް ވިދާޅުވެ، ސްޕެއިނުގެ ނޫސްތަކުގައި އެ ވާހަކަތައް ޝާއިއު ކުރުމާ އެކު ގިނަ ބަޔެއްގެ ފާޑުކިޔުން އޭނާ އަށް އަމާޒުވި އެވެ. އެއާ އެކު ރެއާލުން ވަނީ ނޫސްބަޔާނެއް ނެރެފަ އެވެ.
އެ ބަޔާނުގައި ބުނެފައިވަނީ ދައުރުވަމުންދާ އޯޑިއޯ އަކީ މީގެ އަހަރުތަކެއް ކުރިން ޕެރޭޒާއި ހޯސޭ އަލްބާޓޯ އަބޭލާންއާ ދެެކެވުނު ވާހަކަތަކެއްގެ ތެރެއިން ރެކޯޑްކޮށްފައިވާ އޯޑިއޯއެއް ކަމަށެވެ. އެކަމަކު މި އޯޑިއޯ ލީކުކޮށްލާފައިވަނީ ވަކި ބައިތަކެއް އުނިކޮށް ވަކި މަގުސަދެއް ހާސިލްކުރުމުގެ ގޮތުން ކަމަށް ރެއާލްގެ ބަޔާނުގައިވެ އެވެ.
މި އޯޑިއޯ ލީކުކޮށްލުމުގެ ކުރިން އެންމެ ފުރަތަމަ މަސައްކަތްކުރީ ވިއްކާލުމަށް ކަމަށާއި އެކަމަކު އެ ގޮތަށް އެހެން ނުވުމުން ދެން "އެލް ކޮންފިޑެންޝަލް" އަށް ދީގެން މީޑިއާ އަށް ގެނައީ ކަމަށެވެ.
"މިއީ އަހަރެމެން ސުޕަ ލީގުގެ މަސައްކަތުގައި އުޅޭތީ އެކަން ހުއްޓުވައި އެހެން މަންފާއެއް ހޯދަން ކުރި ކަމެއް،" ރެއާލްގެ ބަޔާނުގައިވެ އެވެ.
ޕެރޭޒް ވަނީ މި މައްސަލަ އޭނާގެ ގާނޫނީ ޓީމާ ހަވާލުކޮށްފަ އެވެ. އަދި މި މައްސަލައިގައި ރެއާލްގެ ގާނޫނީ ޓީމުން ވެސް ބައިވެރިވާނެ އެވެ.
ޔުއެފާ އާއި ފީފާއާ ދެކޮޅަށް ރެއާލްގެ ރައީސް ޕެރޭޒް އިސްވެ، ވުޖޫދަށް ގެންނަން މަސައްކަތްކުރަމުން އަންނަ ސުޕަ ލީގާ ދެކޮޅަށް ގިނަ އިންޒާރުތަކެއް އަންނަނީ ލިބެމުންނެވެ.
