ޖޮހަނެސްބާގް، ދެކުނު އެފްރިކާ (ޖުލައި 14) - ދެކުނު އެފްރިކާގައި ހިނގަމުންދާ ހަމަނުމުގައި ފިހާރަތަކާއި ގުދަންތައް ލޫޓުވަމުންދާތާ ފަސް ވަނަ ދުވަހާ ހަމައަށް އައިއިރު މަރުވި މީހުންގެ އަދަދު 72 އަށް އަރައިފި އެވެ.
ހަމަނުޖެހުން ކޮންޓްރޯލް ކުރަން ރައީސް ސިރިލް ރަމަފޯސާ ވަނީ ސިފައިން ނެރުއްވާފަ އެވެ. ނަމަވެސް ޖޮހަނެސްބާގް އާއި ކުވާޒުލޫ-ނަތާލްގައި އަދިވެސް ސުލްހަ ގާއިމްކުރެވިފައެއް ނުވެ އެވެ. ހަމަނުޖެހުން އުފެދުނީ ސިޔާސީ ހަލަބޮލިކަމުގެ ތެރެއިންނެވެ.
ފުލުހުންނަށް އެހީވުމަށް 2500 ސިފައިންގެ މީހުން ދަނީ ހަރަކާތްތެރިވަމުންނެވެ. ހަމަނުޖެހުން އުފެދުނީ ކުރީގެ ރައީސް ޖޭކޮބް ޒޫމާއަށް ކޮރަޕްޝަނާ ގުޅިގެން އައި 15 މަހުގެ ހުކުމް މިދިޔަ ހުކުރު ދުވަހު ތަންފީޒު ކުރަން ފެއްޓެވުމުންނެވެ.
ފުލުހުން ބުނީ އެ ދުވަހުން ފެށިގެން މިހާތަނަށް 72 މީހަކު މަރުވެފައިވާ ކަމަށާއި ގިނަ މީހުން މަރުވީ ފިހާރަތައް ލޫޓުވަން އުޅުމުގެ ތެރޭގައި ފިތިބާރުވެގެން ކަމަށެވެ. އިތުރު ބައެއް މީހުން މަރުވީ ބަޑި ޖެހުމާއި އޭޓީއެމްތައް ގޮއްވާލުމުގެ ހާދިސާތަކުގަ އެވެ.
މިހާތަނަށް 1،234 މީހަކު ހައްޔަރުކޮށްފައި ވާއިރު، މި ހަމަނުޖެހުން ހިންގުމުގައި އަދިވެސް އެތައް ހާސް ބަޔަކު ދަނީ ބައިވެރިވަމުންނެވެ. އާއްމުވަމުންދާ ވީޑިއޯތަކުން ފެންނަނީ އަންހެނުންނާއި، ފިރިހެނުންނާއި ކުޑަކުދިން ވެސް ފިހާރަތަކަށް ވަދެ، ތަކެތި ހިފައިގެންދާ މަންޒަރެވެ.
ބައެއް މީހުން އޭއެފްޕީއަށް ބުނީ ހަމަނުޖެހުމުގެ ތެރެއިން ފިހާރަތަކުން ތަކެތި ނަގަން ފެށީ، މުޅި އުމުރު ފަގީރު ހާލަތުގައި އުޅެން ޖެހިފައި ވަނިކޮށް، ފެނުނު މި ފުރުސަތުގެ ބޭނުން ހިފުމުގެ ގޮތުން ކަމަށެވެ.
"އަހަރެން ޒޫމާއާ މެދު އެއްވެސް ކަންބޮޑެއް ނުވޭ. އޭނާއަކީ ޖަލުގައި އޮންނަން ޖެހޭ ކޮރަޕްޓް މީހެއް،" އުމުރުން 30 އަހަރުގެ ފިރިހެނަކު ބުންޏެވެ. އޭނާ ބުނީ ފިހާރައިން ތެލި، ތަށި ފަދަ ތަކެތި އޭނާ ލޫޓުވީ މަންމައަށް ދިނުމަށް ކަމަށެވެ.
ފިހާރަތައް ލޫޓުވުމަށް ފަހު، އެ ތަންތަނުގައި ހުޅު ޖެހުމުގެ އަމަލުތައް ވެސް ދަނީ ބައެއް މީހުން ހިންގަމުންނެވެ. އެފަދަ ހާދިސާއެއްގައި އަންހެނަކު ވަނީ ތުއްތު ދަރިފުޅު ސަލާމަތް ކުރުމަށް އެއް ވަނަ ބުރިން ތިރިއަށް ވައްޓާލާފަ އެވެ. އެ ކުއްޖާ ހިފީ ތިރީގައި ތިބި ބަޔެކެވެ.
ދެކުނު އެފްރިކާގެ އެންމެ ބޮޑު އިދިކޮޅު ޕާޓީ، ޑިމޮކްރެޓިކް އެލަޔަންސުން ބުނީ ހަމަނުޖެހުން ހިތްވަރު ދިނުމުން ޒޫމާގެ ދަރިންނާއި އިކޮނޮމިކް ފްރީޑަމް ފައިޓާޒްގެ ލީޑަރު ޖޫލިއަސް މަލޭމާއާ ދެކޮޅަށް ކޯޓަށް މައްސަލަ ހުށަހަޅާނެ ކަމަށެވެ.
