ފިލަޑެލްފިއާ، އެމެރިކާ (ޖުލައި 14) - ރިޕަބްލިކަން ޕާޓީ އާއި ކުރީގެ ރައީސް ޑޮނަލްޑް ޓްރަމްޕްގެ ސަބަބުން އެމެރިކާގެ ޑިމޮކްރަސީއަށް ނުރައްކާ އެބަ އޮތް ކަމަށް ރައީސް ޖޯ ބައިޑެން ވިދާޅުވެއްޖެ އެވެ.
"[ވޯޓުގެ] ހައްގު ރައްކާކުރުމުގެ ޒިންމާ އެޅިފައި އޮތީ އެންމެންގެ މައްޗަށް. މިއީ އަޅުގަނޑުމެންނަށް އޮތް އިމްތިހާނެއް،" ފިލަޑެލްފިއާގެ އެއްވުމެއްގައި ބައިޑެން ވިދާޅުވި އެވެ.
މިދިޔަ އަހަރުގެ ރިޔާސީ އިންތިހާބުގެ ނަތީޖާ ބަދަލު ކުރުމަށް ޓްރަމްޕް ކުރައްވާ މަސައްކަތަށް އިޝާރާތް ކުރައްވަމުން ބައިޑެން ވިދާޅުވީ "އެއީ ވޯޓުގެ ބާރު ކަނޑުވާލުން" ކަމަށެވެ.
"މިއީ މި ގައުމުގެ ތާރީހުގައި ވޯޓުލުމާއި މިނިވަން އަދި ހަމަހަމަ އިންތިހާބު ބޭއްވުމުގެ ހައްގަށް ކުރިމަތިވެފައިވާ އެންމެ ބޮޑު ނުރައްކާ،" ބައިޑެން ވިދާޅުވި އެވެ.
ދެހާސް ވިހި ވަނަ އަހަރުގެ އިންތިހާބުގައި މަކަރު ހެދި ކަމަށް ރިޕަބްލިކަން ޕާޓީން ބުނި ނަމަވެސް، ސުޕްރީމް ކޯޓާ ހަމައަށް، އެކި ސްޓޭޓުތަކުގެ 80 ކޯޓަކުން، އެއީ ދޮގެއް ކަމަށް ނިންމި ކަމަށެވެ.
"އެ ބޮޑު ދޮގަކީ ހަމަ ދޮގެއް. އެ ނޫން އެއްވެސް އެއްޗެއް ނޫން. އެމެރިކާގައި ބަލިވެއްޖެ ނަމަ ޖެހޭނީ ނަތީޖާ ގަބޫލު ކުރަން، ގާނޫނު އަސާސީގައި އޮތް ގޮތަށް. އަނެއްކާ އަލުން މަސައްކަތް ކުރަންވީ. ހަގީގަތަކީ ފޭކު ކަމަށް ބުނުމުގެ ޖާގައެއް ނޯންނާނެ،" ޓްރަމްޕަށް އިޝާރާތް ކުރައްވާ ބައިޑެން ވިދާޅުވި އެވެ.
ވައިޓް ހައުސްއިން ބުނެފައިވާ ގޮތުގައި ޓްރަމްޕްގެ ފިއްތުންތަކުގެ ސަބަބުން ރިޕަބްލިކަން ޕާޓީން ދަނީ ވޯޓުލުމުގެ ހައްގު ހިފެހެއްޓުމަށް މަސައްކަތްތަކެއް ކުރަމުންނެވެ.
ސެކުއިރިޓީ ވަރުގަދަ ކުރަން ކަމަށް ބުނެ، މެއިލް މެދުވެރިކޮށް ވޯޓު ލުމާއި، ވޯޓުލާ މަރުކަޒުތަކުގައި ވަގުތު ކުޑަ ކުރުމާއި، ވޯޓުލާ މަރުކަޒުތަކުގައި އުޅޭ މީހުންނަށް އޮޅިގެން ކަމެއް ކުރެވިއްޖެ ނަމަ ބޮޑެތި ޖޫރިމަނާތައް ކުރަން އެ ޕާޓީން އަންނަނީ މަސައްކަތް ކުރަމުންނެވެ.
ރިޕަބްލިކަނުން ބުނާ ގޮތުގައި މިއީ އިންތިހާބުތަކުގައި މަކަރު ހެދުމަށް އޮތް ފުރުސަތު ކުޑަވެ، އިންސާފުވެރިކަމާއެކު ނަތީޖާ ނެރެން މަގުފަހިވާނެ ކަންކަމެވެ.
ނަމަވެސް ޑިމޮކްރެޓުން ބުނެފައި ވަނީ އިންތިހާބުގައި މަކަރު ހެދުމަކީ ވަރަށް ނުވާ ކަމެއް ކަމަށާއި މި ފިޔަވަޅުތަކުން ޓާގެޓު ކުރަނީ އެ ޕާޓީއަށް ވޯޓުދޭ ކަޅު ނަސްލުގެ މީހުންނަށް ކަމަށެވެ.
