ތެލް އަވީވް، އިޒްރޭލް (ޖުލައި 12) - ކޮވިޑު ބަލީގެ ހައި ރިސްކު މީހުންނަށް އިޒްރޭލުގައި ފައިޒާ ވެކްސިނުގެ ތިން ވަނަ ޑޯޒެއް ދޭން ފަށައިފި އެވެ.
އެގޮތުން އެންމެ ފުރަތަމަ ތިން ވަނަ ޑޯޒް ދެމުންދާ މީހުންގެ ތެރޭގައި ހިމެނެނީ ހިތާއި ފުއްޕާމޭ އަދި ކިޑްނީ ޓްރާންސްޕްލާންޓު ހަދާފައިވާ މީހުންނާއި ބައެއް ކެންސަރު ބަލީގެ މީހުންނެވެ.
"ހަށިގަނޑުގެ ދިފާއީ ނިޒާމު ބަލިކަށިވެފައިވާ މީހުން ދެ ޑޯޒް ފަހުން އެކަށީގެންވާ ވަރަށް އެންޓިބޮޑީ ނުއުފެދޭ ކަމަށް ދިރާސާއިން ދައްކާ،" އިޒްރޭލުގެ ހެލްތު މިނިސްޓްރީގެ ބަޔާނެއްގައި ބުންޏެވެ.
ހެލްތު މިނިސްޓްރީން އިތުރަށް ބުނީ ތިން ވަނަ ޑޯޒެއް ދޭން ނިންމީ ކޭސްތައް އިތުރުވަމުން ދާތީ ރައްކާތެރިކަމުގެ ގޮތުން ކަމަށެވެ.
ފައިޒާ ވެކްސިން ބޭނުންކޮށްގެން މިހާތަނަށް އެންމެ ކާމިޔާބުކަމާ އެކު އެންމެ އަވަހަށް ވެކްސިންދީ، ކޭސްތައް ތިރިކޮށްފައިވަނީ އިޒްރޭލު ގަ އެވެ.
އާބާދީގެ 85 ޕަސެންޓަށް ވުރެ ބޮޑު ބަޔެއް ވެކްސިންގެ ދެ ޑޯޒް ފުރިހަމަކޮށްފައި ވާއިރު، އިޒްރޭލުގައި ވަނީ އެޅި ހުރިހާ ފިޔަވަޅެއް އުވާލަފަ އެވެ.
ނަމަވެސް އިންޑިއާއިން އެންމެ ފުރަތަމަ ފެނުނު ޑެލްޓާ ވޭރިއެންޓުގެ ސަބަބުން އިޒްރޭލުގައި އަނެއްކާވެސް މިހާރު ކޮންމެ ދުވަހަކު 100 އެއްހާ އާ ކޭސް ފެންނަމުން ދެ އެވެ.
ތަޖުރިބާކާރުން ބުނެފައިވާ ގޮތުގައި ޑެލްޓާ ވޭރިއެންޓު ޖެހުމުން ވެކްސިނުން ލިބޭ ރައްކާތެރިކަން ކުޑަ އެވެ.
