ވޮޝިންޓަން، އެމެރިކާ (ޖުލައި 13) - ޖޯންސަން އެންޑް ޖޯންސަންގެ ކޮވިޑް ވެކްސިން ޖަހާތާ ހަ ހަފްތާ ތެރޭގައި ނިޔުރޮލޮޖިކަލް ނުވަތަ ނާރުގެ މައްސަލައެއް ދިމާވުމުގެ ފުރުސަތު އޮންނަ ކަމަށް އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަނުން ބުނެފި އެވެ.
އެފްޑީއޭއިން ބުނީ ތަފާސްހިސާބަށް ބަލާއިރު، ވަރަށް މަދުން ނޫނީ ނުފެންނަ ނާރުގެ މައްސަލައެއް ދިމާވުމުގެ ފުރުސަތު ބޮޑު ކަމަށް ދައްކާތީ، ޖޯންސަން އެންޑް ޖޯންސަން ވެކްސިން ޖަހާ މީހުން އެކަމަށް ސަމާލުވާން ޖެހޭނެ ކަމަށެވެ.
ޖޯންސަން އެންޑް ޖޯންސަން ކުންފުންޏަށް ފޮނުވި ސިޓީއެއްގައި އެފްޑީއޭއިން ބުނީ ވެކްސިން ޖެހުމަށް ފަހު ގީޔާން ބަރޭ ސިންޑްރޯމް (ޖީބީއެސް) ކުރިމަތިވުމުގެ ފުރުސަތު "ވަރަށް ކުޑަ މިންވަރަކަށް" އެބަ އޮތް ކަމަށެވެ. އެހެންވެ މި ވެކްސިން ޖަހާ މީހުން ވަރުބަލިވެ، އައްސިވެ، ހިނގަން އަދި މޫނު ހަރަކާތް ކުރަން އުނދަގޫވާ ނަމަ ސިއްހީ އެހީތެރިކަން ހޯދަން ލަފާ ދިނެވެ.
އެމެރިކާގައި 12.8 މިލިއަން މީހުން ވަނީ މި ވެކްސިންގެ އެއް ޑޯޒް ޖަހާފަ އެވެ. އެފްޑީއޭއިން ބުނީ މި ވެކްސިނަށް ފަހު ޖީބީއެސް ދިމާވި 100 މީހެއްގެ ތެރެއިން 95 މީހަކު ހާލު ސީރިއަސްވެ އެޑްމިޓު ކުރަން ޖެހުނު ކަމަށާއި އަދި އެކަކު މަރުވި ކަމަށެވެ.
ޖޯންސަން އެންޑް ޖޯންސަންއިން ނެރުނު ބަޔާނެއްގައި ބުނީ ރެގިއުލޭޓަރުންނާ އެކު މި މައްސަލާގައި މަޝްވަރާ ކުރަމުންދާ ކަމަށެވެ.
ޖީބީއެސްއަކީ ވަރަށް މަދުން ދިމާވާ ނާރުގެ މައްސަލަ އެކެވެ. މި މައްސަލަ ދިމާވުމުން ހަށިގަނޑުގެ ދިފާއީ ނިޒާމް ނުވަތަ އިމުއިން ސިސްޓަމުން ނާރުގެ ފައިބާގައިވަ ރައްކާތެރިކަމުގެ ފަށަލައަށް ހަމަލާ ދޭން ފަށަ އެވެ. އެހެންވާން ފަށަނީ ބެކްޓީރިއަލް ނުވަތަ ވައިރަލް އިންފެކްޝަނަކަށް ފަހު އެވެ. ނަމަވެސް މި މައްސަލަ ދިމާވާ ގިނަ މީހުން އެއްކޮށް ރަނގަޅުވެ އެވެ.
މީގެ ކުރިން ވެސް ވެކްސިން ދިނުމުން މި މައްސަލަ ދިމާވެފައި ވެ އެވެ. އެގޮތުން 1976 ގައި އެމެރިކާގައި ސްވައިން ފްލޫ ފެތުރެން ފެށުމުން ދިން ވެކްސިނަށް ފަހު އަދި 2009 ގައި އެޗް1އެން1 އާ ދެކޮޅަށް ދިން ވެކްސިނަށް ފަހު ވެސް ޖީބީއެސްގެ ކޭސްތައް ފާހަގަވި އެވެ.
އެމެރިކާގެ ސެންޓާޒް ފޯ ޑިޒީޒް ކޮންޓްރޯލް އެންޑް ޕްރިވެންޝަނުން ބުނީ ޖީބީއެސްގެ ގިނަ ކޭސްތަކުގައި ހިމެނެނީ އުމުރުން 50 އަހަރުން މަތީގެ ފިރިހެން ކަމަށެވެ. އެމްއާރްއެންއޭ ޓެކްނޮލިޖީގައި އުފެއްދު ފައިޒާ އަދި މޮޑާނާ ވެކްސިން ދީގެން ޖީބީއެސްގެ އެއްވެސް މައްސަލައެއް ފާހަގަވެފައެއް ނުވެ އެވެ.
މިދިޔަ ހަފްތާގައި ޔޫރަޕްގެ ރެގިއުލޭޓަރުން ބުނީ އެސްޓްރަޒެނެކާ ވެކްސިނަށް ފަހު ވެސް ޖީބީއެސް ދިމާވުމުގެ ފުރުސަތު އޮތް ކަމަށް ބުނެފަ އެވެ. އެސްޓްރަޒެނެކަ އާއި ޖޯންސަން ވެކްސިން އުފައްދާފައި ވަނީ އެއް ގޮތް ޓެކްނޮލޮޖީއެއް ބޭނުންކޮށްގެންނެވެ.
ޖޯންސަން އެންޑް ޖޯންސަން ވެކްސިން ޖެހުމުން ފުރާނައަށް ނުރައްކާވާ ލޭ ގަނޑުވުމުގެ މައްސަލަ ވަރަށް މަދުން ދިމާވާކަން ވެސް މީގެ ކުރިން ފާހަގަވެފައި ވެ އެވެ. އޭގެ ސަބަބުން އެންމެ ޑޯޒެއް ޖަހަން ޖެހޭ މި ވެކްސިނަށް އޮތް ޑިމާންޑް ވަނީ ވެއްޓިފަ އެވެ.
ނަމަވެސް މިދިޔަ އޭޕްރިލް މަހު އެމެރިކާގެ ރެގިއުލޭޓަރުން ބުނީ ވެކްސިނުގެ ސަބަބުން ލިބިދާނެ ގެއްލުމަކަށް ވުރެ ލިބޭނެ ފައިދާ ބޮޑު ކަމަށެވެ.
