ރާއްޖޭގެ ގައުމީ އަންހެން ފުޓްބޯޅަ ޓީމުން 11 އަހަރަށް ފަހު އޭއެފްސީ ވިމެންސް އޭޝިއަން ކަޕް ކޮލިފައިންގައި ކުޅެން ތައްޔާރުވުމުގެ ގޮތުން ޕްރެކްޓިސްތައް ފަށާފައިވާއިރު، ވަރަށް އަވަހަށް ޓީމާ ހަވާލުވާނެ ކޯޗެއްގެ ކަންކަން ނިމިގެންދާނެ ކަމަށް އެފްއޭއެމުން ބުނެފި އެވެ.
މީގެ އެއް ދުވަސް ކުރިން ގައުމީ އަންހެން ޓީމުން ވަނީ ޕްރެކްޓިސް ފަށައިފަ އެވެ. ގައުމީ އަންހެން ޓީމުގެ ކޯޗެއްގެ ޒިންމާ މި ވަގުތު އުފުލަނީ އެފްއޭއެމްގެ ޓެކްނިކަލް ޑިރެކްޓަރު އަހުމަދު ޝަރީފް (ޑުންގާ) އެވެ.
އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ)، "އަދަދު" އަށް ވިދާޅުވީ މި ވަގުތަށް ކޯޗެއްގެ މަސައްކަތް އެ ފުރިހަމަ ކުރަނީ ޑުންގާ ކަމަށާއި ވަރަށް އަވަހަށް ޓީމާ ހަވާލުވާނެ ކޯޗެއްގެ ކަންތައްތައް ނިމިގެންދާނެ ކަމަށެވެ.
ފާއިތުވި އަށް ވަރަކަށް އަހަރަށް ބަލާއިރު ގައުމީ އަންހެން ޓީމުގައި ގިނަ ކޯޗުންތަކެއް ވަނީ މަސައްކަތް ކޮށްފަ އެވެ. އެ ގޮތުން ޖަޕާނުގެ ކޯޗު ނައޯކޯ ކަވަމޯޓޯ އާއި ދިވެހި ކޯޗުން ކަމަށްވާ މުހައްމަދު އާތިފް (އާތީ) އާއި އިބްރާހީމް ހަލީމް (ޖަޑާ) އަދި އަހުމަދު ނާޝިދު (ނާދު) ވަނީ އަންހެން ޓީމުގައި ޖުމްލަކޮށް ބަލާއިރު ރަނގަޅު ބަދަލުތަކެއް އަންހެން ގައުމީ ޓީމަށް ގެެނެސްފަ އެވެ.
އަންހެން ފުޓްބޯޅަ ޓީމުން މިރޭ ބޭއްވި ފަރިތަކުރުންތަކުގެ ތެރެއިން.-- ފޮޓޯ: އިބްރާހިމް ފާއިދު/ އެފްއޭއެމް
ރާއްޖޭން ވަނީ މީގެ ކުރިން 2006 އާއި 2010 ވަނަ އަހަރު ވިމެންސް އޭޝިއަން ކަޕް ކޮލިފައިންގައި ކުޅެފަ އެވެ. ރާއްޖޭން އެންމެ ފަހުން 2014 އާއި 2018 ވަނަ އަހަރުގެ މުބާރާތުގެ ކޮލިފައިން ބުރުގައި ކުޅެފައެއް ނުވެ އެވެ. ދެން ރާއްޖޭން ނުކުޅެނީ 2008 ވަނަ އަހަރުގެ ކޮލިފައިންގަ އެވެ.
އަންނަ އަހަރު އިންޑިއާގައި ބާއްވާ މުބާރާތުގެ ކޮލިފައިން މެޗުތަކުގައި ރާއްޖެ ވާދަކުރަން ޖެހުނީ ކޮލިފައިން ގްރޫޕް ބީގަ އެވެ. އަންނަ ސެޕްޓެމްބަރު މަހު އެ ކޮލިފައިން ގްރޫޕްގެ މެޗުތައް ކުޅޭނީ ތަޖިކިސްތާނުގަ އެވެ. އެ ގްރޫޕްގައި ރާއްޖެ އާއި ތަޖިކިސްތާނުުގެ އިތުރުން ދެން އޮތީ ވިއެޓްނާމް އާއި އަފްގާނިސްތާން އެވެ.
އަންހެން ފުޓްބޯޅައިގައި ލޯކަލް މާ ގިނަ މުބާރާތްތަކެއް ނެތި ވެސް ގައުމީ އަންހެން ޓީމުން ވަނީ ކުރިއެރުންތަކެއް ހޯދައިފަ އެވެ. އެގޮތުން އެންމެ ފަހުން 2019 ވަނަ އަހަރު ބޭއްވި ސައުތު އޭޝިއަން ގޭމްސްގެ އަންހެނުންގެ ފުޓްބޯޅަ އިވެންޓުން ރާއްޖޭން ލޯ މެޑަލް ހޯދިއިރު، ސިންގަޕޫރުގެ މުބާރާތެއްގައި ވެސް ތިން ވަނަ ހޯދި އެވެ.
ޕްރޮފެޝަނަލް އުސޫލުތަކުގެ ތެރެއިން ފުރަތަމަ ޑިވިޝަން ކްލަބްތައް ހިންގުން ހަރުދަނާކުރުމުގެ ވިސްނުމުގައި ކުރިއަށް ދިއުމުގެ ގޮތުން އެފްއޭއެމުން ކްލަބްތަކާ އެކު ސޮއިކޮށްފައިވާ ޓުވާޑްސް ފިއުޗާ ފައިނޭންޝިއަލް އެސިސްޓަންސް ކޮންޓްރެކްޓްގައިވާގޮތުން ފުރަތަމަ ޑިވިޝަނުގެ ކޮންމެ ކްލަބެއްގައި އަންހެން ޓީމެއް އޮތުން ލާޒިމެވެ. އެފްއޭއެމުން މި އަހަރު ފުރަތަމަ ޑިވިޝަނުގެ ޓީމުތަކާ އެއްކޮށް ރާއްޖެ އަށް ހުޅުވާލައިގެން އަންހެން ފުޓްބޯޅަ މުބާރާތެއް ބޭއްވޭތޯ ބެލި ނަމަވެސް ކޮވިޑާ ހެދި ސީޒަން ކުރުކޮށްލަން ޖެހި އެކަން ނުވީ އެވެ.
