ގުދުސް (ޖުލައި 11) - ފަލަސްތީނުން ޓެރަރިސްޓުންނަށް ހޭދަ ކުރާ ކަމަށް ބުނެ، ފަލަސްތީނު ރައްޔިތުންގެ އަތުން އިޒްރޭލުން ނަގާ ޓެކްސް ފައިސާގެ ބަޔެއް ފަލަސްތީނު ސަރުކާރަށް ނުދޭން އިޒްރޭލުން ނިންމައިފި އެވެ.
އިޒްރޭލުން ބުނީ ޓެކްސް ފައިސާގެ ތެރެއިން ފަލަސްތީނު ސަރުކާރަށް ނުދީ ހިފަހައްޓާނީ ފަލަސްތީނުގެ ހަނގުރާމަވެރިންނާއި އެ މީހުންގެ އާއިލާތަކަށް ހޭދަކުރާ ކަމަށް ބެލެވޭ މިންވަރު ކަމަށެވެ.
އެގޮތަށް ފާސްކުރީ އާ ބޮޑު ވަޒީރު ނަފްތާލީ ބެނެޓްގެ ސެކިއުރިޓީ ކެބިނެޓުންނެވެ. މީގެ ކުރިން ވެސް އެފަދަ ނިންމުން އިޒްރޭލުން ނިންމުނުން ފަލަސްތީނު ސަރުކާރުން އެކަމާ ދެކޮޅަށް ފިޔަވަޅު އަޅާފައި ވެ އެވެ.
"ކެބިނެޓަށް މައުލޫމާތު ލިބިފައިވާ ގޮތުގައި ފަލަސްތީނުގެ ސަރުކާރުން "2020 ވަނަ އަހަރު ނުސީދާކޮށް ޓެރަރިޒަމަށް އެހީވުމަށް ޓެރަަރިސްޓުންނާއި އެ މީހުންގެ އާއިލާތަކަށް" 597 މިލިއަން ޝެކެލް ނުވަތަ 183 މިލިއަން ޑޮލަރު ހޭދަކުރި،" ބެނެޓްގެ އޮފީހުން ބުންޏެވެ.
"މި އަދަދު ހިފަހައްޓާނީ ކޮންމެ މަހަކު އިޒްރޭލުން ފަލަސްތީނު ސަރުކާރަށް ޓްރާންސްފާ ކުރާ ފައިސާގެ ތެރެއިން،" އެ ބަޔާނުގައި އިތުރަށް ބުންޏެވެ.
އިޒްރޭލުގެ ބަނދަރުތަކުގެ ތެރެއިން ފަލަސްތީނުގެ ސަރަހައްދަށް އެތެރެ ކުރާ މުދަލުން ކޮންމެ މަހަކު ކަސްޓަމް ޑިއުޓީގެ ގޮތުގައި 190 މިލިއަން އެމެރިކާ ޑޮލަރު ނަގަ އެވެ. އެ ފައިސާ އިޒްރޭލުން ހަވާލުކުރަނީ ފަލަސްތީނު ސަރުކާރަށެވެ.
ނަމަވެސް ފެބްރުއަރީ 2019 އިން ފެށިގެން ކޮންމެ މަހަކު 10 މިލިއަން ޑޮލަރު ނުދީ ހިފަހައްޓަން ފެށި އެވެ. އޭރު ވެސް ބުނީ އެ ފައިސާއަކީ އިޒްރޭލާ ދެކޮޅަށް ހަމަލާ ދިނުމުން ޖަލުތަކުގައި ތިބި ފަލަސްތީނު މީހުންގެ އާއިލާތަކަށް ހޭދަކުރާ ފައިސާ ކަމަށެވެ.
އެ ނިންމުމުގެ ސަބަބުން އިޒްރޭލާ ފަލަސްތީނާ ދެމެދު މައްސަލަ ހޫނުވެ، އިޒްރޭލުން ދޭ ޓެކްސް ފައިސާގެ އެއްވެސް މިންވަރެއް އަށް މަސް ވަންދެން ފަލަސްތީނު ސަރުކާރުން ނަގާފައެއް ނުވެ އެވެ.
އިޒްރޭލުން ބުނަނީ ޔަހޫދީންނަށް ހަމަލާ ދޭ މީހުންގެ އާއިލާތަކަށް ހޭދަކުރުމަކީ ޓެރަރިޒަމަށް ހިތްވަރު ދިނުން ކަމަށެވެ. ނަމަވެސް ފަލަސްތީނު ސަރުކާރުން ދެކޭ ގޮތުގައި އެ ފައިސާއަކީ އާއިލާތަކުގައި ވަޒީފާއަށް ގޮސް އާމްދަނީ ހޯދަން ހުންނަ ހަމައެކަނި މީހާ ޖަލަށް ލުމުން ފޯރުކޮށްދޭ އެހީއެއް ކަމަށެވެ.
