ގުދުސް (ޖުލައި 11) - އިޒްރޭލުގެ ކުރީގެ ބޮޑު ވަޒީރު ބެންޖަމިން ނަތަންޔާހޫއަށް މަގާމު ގެއްލުނުތާ ގާތްގަނޑަކަށް އެއް މަސް ފަހުން ރަސްމީ ގެކޮޅު ދޫކޮށް ވަޑައިގެންފި އެވެ.
އިޒްރޭލުގެ އާ ބޮޑު ވަޒީރަކަށް ނަފްތާލީ ބެނެޓް ހަމަޖެހުނީ މިދިޔަ މަހު އެވެ. ނަމަވެސް މިއަދާ ހަމައަށް ވެސް ނަތަންޔާހޫ ގެންދެވީ ރަސްމީ ގެކޮޅުގައި ހުންނަވައިގެން އެކި ހަރަކާތްތައް ހިންގަވަމުންނެވެ.
"ރޭ ދަންވަރުގެ ވަގުތެއްގައި ނަތަންޔާހޫ އާއިލާއިން ވަނީ ބަލްފޫރްގައި ހުންނަ ގެކޮޅު ދޫކޮށް ވަޑައިގެންފައި،" އާއިލާގެ ތަރުޖަމާނަކު ނެރުނު ބަޔާނެއްގައި ބުންޏެވެ.
ބާރަ އަހަރު ބޮޑު ވަޒީރުކަން ކުރެއްވި ނަތަންޔާހޫއަކީ އިޒްރޭލުގެ ތާރީހުގައި އެންމެ ގިނަ ދުވަހު އެ މަގާމު ފުރުއްވި ލީޑަރެވެ. މަކަރާއި ހީލަތް ހެދުން އަދި ކޮރަޕްޝަންގެ މައްސަލަތައް ކޯޓުގައ އޮތް ނަމަވެސް، އޭނާ އިސްތިއުފާ ދެއްވާފައެއް ނުވެ އެވެ.
ނަތަންޔާހޫ ތުހުމަތު ކުރާ ގޮތުގައި ކޯޓުގައި ކުރިއަށްދާ މައްސަލަތަކަކީ އޭނާ މަގާމުން ދުރު ކުރަން ވައަތު ފިޔައިގެ ޕާޓީތަކުން ރޭވި ރޭވުމެކެވެ.
ފާއިތުވި އަހަރުތަކުގައި ނަތަންޔާހޫގެ ޕާޓީއަށް އޮތް އިތުބާރު ގެއްލި، ސަރުކާރެއް އުފެއްދޭ ވަރަށް ވޯޓު ލިބިފައެއް ނުވެ އެވެ. އަދި އެންމެ ފަހުން އެއްވެސް ޕާޓީއަކުން ކޯލިޝަން ހަދަން ވެސް އެއްބަސް ނުވި އެވެ.
އެއާއެކު ނަފްތާލީ ބެނެޓްގެ ކޯލިޝަން ސަރުކާރު އުފެދުމުން ވެސް ނަތަންޔާހޫ ބޮޑު ވަޒީރުގެ ގެކޮޅުން ނިނުންނެވުމުގެ ބަދަލުގައި ތަފާތު އެކި ރަސްމީ ބައްދަލުވުންތައް އެ ތަނުގައި ބާއްވަމުން ދިޔަ އެވެ.
ބެނެޓް އާއި ނަތަންޔާހޫގެ އޮފީހުން ފަހުން ނިންމީ ޖުލައި 10 ވަނަ ދުވަހަކީ ނަތަންޔާހޫގެ އާއިލާއިން އެ ގެކޮޅުން ނުކުންނަވާނެ ސުންގަޑި ކަމަށެވެ.
ރިޕޯޓުތައް ބުނާ ގޮތުން ބެނެޓް މިއަދުގެ ވަގުތެއްގައި އެ ގެކޮޅަށް ބަދަލުވެ ވަޑައިގަންނަވާނެ އެވެ.
