އައްމާން، އުރުދުން (ޖުލައި 11) - އުރުދުންގެ ރަސްގެފާނު އަބްދުﷲ ދެ ވަނަ އާއި އިޒްރޭލުގެ އާ ރައީސް އިސްހާގް ހެރްޒޮގް ހޮނިހިރު ދުވަހު ފޯނުން ގުޅުއްވާ މަޝްވަރާ ކުރައްވައިފި އެވެ.
އުރުދުންގެ ޕެޓްރާ ނިއުސް އެޖެންސީން ބުނީ މެދުއިރުމަތީގައި "ހަމަހަމަ އަދި ފުރިހަމަ ސުލްހަ ގާއިމް ކުރުމުގެ މުހިއްމުކަން" ރަސްގެފާނު އަބްދުﷲ ފާހަގަކުރެއްވި ކަމަށެވެ.
އުރުދުންގެ 10 މިލިއަން މީހުންގެ ތެރެއިން 50 ޕަސެންޓު މީހުންނަކީ ފަލަސްތީނު ނަސްލަށް ނިސްބަތްވާ މީހުންނެވެ. ރަސްގެފާނު އަބްދުﷲ ވިދާޅުވީ މެދުއިރުމަތީގައި ސުލްހަ ދެމެހެއްޓެން އޮތީ ފަލަސްތީނުގެ މިނިވަން ދައުލަތެއް ގާއިމްކޮށްގެން ކަމަށެވެ.
އިޒްރޭލުގެ ރައީސްކަމާ ހެރްޒޮގް ހަވާލުވެވަޑައިގެންނެވީ މިދިޔަ ބުދަ ދުވަހު އެވެ. މަޝްވަރާއަށް ފަހު ކުރެއްވި ޓްވީޓެއްގައި ހެރްޒޮގް ވިދާޅުވީ "ދެ ގައުމުގެ މެދުގައި އޮތް ސްޓްރެޓެޖިކް ގުޅުމުގެ މުހިއްމުކަން" ފާހަގަކުރެއްވި ކަމަށެވެ.
އިޒްރޭލުގެ ރައީސް އާއި އުރުދުންގެ ރަސްގެފާން މަޝްވަރާ ކުރައްވާފައި މި ވަނީ އުރުދުންއަށް ފެން ވިއްކުމަށް އިޒްރޭލުން އެއްބަސްވިތާ ދެ ދުވަސް ފަހުންނެވެ.
ފަންސާސް މިލިއަން ކިއުބިކް މީޓަރުގެ ފެން ވިއްކަން އިޒްރޭލުން އެއްބަސްވެފައި ވާއިރު، ފަލަސްތީނުގެ ހުޅަނގު އައްސޭރިއަށް އެކްސްޕޯޓް ކުރާ އުރުދުންގެ މުދާ އިތުރު ކުރުމުގެ ފުރުސަތު ވެސް އެއްބަސްވުމުން ލިއްބައިދެ އެވެ.
އިޒްރޭލާއި އުރުދުންއާ ދެމެދު 1994 ގައި ސުލްހައިގެ އެއްބަސްވުމެއްގައި ސޮއިކޮށްފައި ވެ އެވެ. ނަމަވެސް އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫގެ ވެރިކަމުގައި ދެ ގައުމުން ގުޅުން އޮތީ ހީނަރުވެފަ އެވެ.
މިދިޔަ މަހު ނަތަންޔާހޫ މަގާމުން ވަކިވެ، އާ ބޮޑު ވަޒީރު ނަފްތާލީ ބެނެޓްގެ ސަރުކާރު މަސައްކަތް ފަށާފައި ވާއިރު، އެ ސަރުކާރުގެ ވިސްނުމަކީ އުރުދުންއާއެކު އޮތް ގުޅުން ރަނގަޅު ކުރުމެވެ.
