ވޮޝިންޓަން، އެމެރިކާ (ޖުލައި 9) - ކޮވިޑާ ދެކޮޅަށް ފައިޒާ އަދި ބަޔޯއެންޓެކުން އުފެއްދި ވެކްސިންގެ ތިން ވަނަ ޑޯޒަކަށް ހުއްދަ ހޯދަން އެދިއްޖެ އެވެ.
އިންޑިއާއިން އެންމެ ފުރަތަމަ ފެނުނު ޑެލްޓާ ވޭރިއެންޓު ގިނަ ގައުމުތަކަށް ފެތުރިފައި ވާއިރު، ވެކްސިންގެ ތިން ވަނަ ޑޯޒަކުން ލިބޭ ރައްކާތެރިކަން އިތުރުކޮށްދޭނެ އެވެ.
ކޮވިޑް ފަތުރާ ވައިރަހުގެ ތަފާތު އެކި ސްޓްރެއިންތައް އުފެދިފައި ވާއިރު، އޭގެ ތެރެއިން މިހާތަނަށް އެންމެ ހަލުވިކަމާއެކު ފެތުރޭ އަދި އެންމެ ބޮޑަށް ބަލިވަނީ ޑެލްޓާ ވޭރިއެންޓުންނެވެ.
ފައިޒާ އާއި ބަޔޯއެންޓެކުން ބުނީ ތިން ވަނަ ޑޯޒަކުން ޑެލްޓާ ވޭރިއެންޓާ ދެކޮޅަށް ރަނގަޅަށް މަސައްކަތް ކުރާނެ ކަމުގެ ޔަގީންކަން އެބަ އޮތް ކަމަށެވެ.
މިހާރު ކުރިއަށްދާ ޓެސްޓުތަކުގެ ނަތީޖާއިން ދައްކާ ގޮތުގައި ތިން ވަނަ ޑޯޒެއް ޖެހުމުން ހަށިގަނޑުގައި ވައިރަހާ ދެކޮޅަށް މަސައްކަތް ކުރަން އުފެދޭ އެންޓިބޮޑީގެ އަދަދު ގާތްގަނޑަކަށް 10 ގުނަ އިތުރުވެ އެވެ.
އެ ޓެސްޓު ކުރަމުން ދަނީ އޮރިޖިނަލް ވައިރަހާއި، ދެކުނު އެފްރިކާ އަދި އިނގިރޭސި ވިލާތުން ފެނުނު ވޭރިއެންޓާ ދެކޮޅަށް ނަމަވެސް ޑެލްޓާއާ ދެކޮޅަށް ވެސް ރަނގަޅު ނަތީޖާއެއް ލިބޭނެ ކަމަށް ބެލެވެ އެވެ.
އޭގެ އިތުރުން ފައިޒާ އަދި ބަޔޯއެންޓެކުން ދަނީ ޑެލްޓާ ވޭރިއެންޓަށް ހާއްސަ ވަކި ވެކްސިނެއް އުފެއްދުމުގެ މަސައްކަތް ވެސް ކުރަމުންނެވެ.
އެމެރިކާގެ ރެގިއުލޭޓަރުން ބުނީ އިތުރު ޑޯޒްތައް ދިނުމާ މެދު ގޮތެއް ނުނިންމާ ކަމަށާއި އެކަމާ ގުޅޭ ދިރާސާތައް ކުރުމުގެ މަރުހަލާ ކުރިއަށްދާ ކަމަށެވެ.
"ވެކްސިން ފުރިހަމަކޮށްފައިވާ އެމެރިކާ ރައްޔިތުން މި ވަގުތު އިތުރު ބޫސްޓާ ޝޮޓެއް ޖަހާކަށް ނުޖެހޭނެ،" ފުޑް އެންޑް ޑްރަގް އެޑްމިނިސްޓްރޭޝަނާއި ސެންޓާޒް ފޯ ޑިޒީޒް ކޮންޓްރޯލުން ގުޅިގެން ނެރުނު ބަޔާނެއްގައި ބުންޏެވެ.
"ސައިންސްގެ އަލީގައި ބޫސްޓާ ޝޮޓު ޖެހުން މުހިއްމު ކަމަށް ދައްކައިފި ނަމަ، އެކަމަށް އަޅުގަނޑުމެން މި ތިބީ ތައްޔާރަށް".
