ބާސެލޯނާ (ޖުލައި 10) - ބާސެލޯނާގެ ކެޕްޓަން ލިއޮނަލް މެސީގެ ކޮންޓްރެކްޓް ހަމަވެފައި އޮތުމުން ކަންބޮޑުވާ ކަމަށާއި ޒުވާން މިޑްފީލްޑަރު ޕެޑްރީ ގޮންޒާލޭޒް ލައްވައި ސްޕެއިނުން އޮލިމްޕިކްސްގައި ކުޅުވުމަކީ އެންމެ ރަނގަޅު ކަމެއްގެ ގޮތުގައި ނުދެކޭ ކަމަށް ބާސެލޯނާގެ ކޯޗު ރޮނާލްޑް ކޫމަން ބުނެފި އެވެ.
މިދިޔަ މަހުގެ ނިޔަލަށް މެސީ ބާސެލޯނާއާ އެކު ހަދާފައިވާ ކޮންޓްރެކްޓް ވަނީ ހަމަވެފަ އެވެ. މެސީ ލައްވައި އިތުރު ދެ އަހަރުގެ ކޮންޓްރެކްޓެއްގައި ސޮއިކުރަން ބާސެލޯނާ އިން ހުރިހާ ކަމެއް ނިންމާފައިވީ ނަމަވެސް އެކަމަށް އޮތް ހުރަހަކީ ބާސެލޯނާގެ ޖުމްލަ މުސާރަތައް އިންތިހާ އަށް ބޮޑުވެފައި އޮތުމެވެ. މެސީ ލައްވައި އާ ކޮންޓްރެކްޓެއްގައި ސޮއިކުރެވޭނީ ބާސެލޯނާ އިން ބޮޑު މުސާރަ ދޭ ބައެއް ކުޅުންތެރިން ދޫކޮށްލައިގެންނެވެ.
"އެންމެ މޮޅު ކުޅުންތެރިއާގެ (މެސީގެ) މުސްތަގުބަލާ ގުޅޭ ކަންތައްތައް ނުނިމި އޮތީމަ ކޮންމެ މީހެއް ވެސް ކަންބޮޑުވާނެ. މިއީ ހައްލެއް އަންނަން ޖެހޭ ކަމެއް. އަހަރެން ގާތުގައި ރައީސް (ލަޕޯޓާ) ވަނީ ބުނެފައި ވަނީ ކަންކަން ވަރަށް އަވަހަށް ހަމަޖެހިގެންދާނެ ކަމަށް. މެސީ އަދި އަހަރުތަކެއް މި ޓީމުގައި މަޑުކުރާނެ،" ކޫމަން ބުންޏެވެ.
"އެކަަމަކު އަހަންނަށް ހިތްހަމަޖެހުމެއް ލިބޭނީ މެސީ ކޮންޓްރެކްޓްގައި ސޮއިކުރުމުން،"
އުމުރުން 18 އަހަރުގެ ޕެޑްރީ ވަނީ މިދިޔަ ސީޒަނުގައި ބާސެލޯނާ އަށް ލީގުގެ 37 މެޗުގެ އިތުރުން އެހެން މުބާރާތްތައް ހިމަނައިގެން ޖުމްލަ 50 އަށް ވުރެ ގިނަ މެޗު ކުޅެދީފަ އެވެ. އަދި މި ފަހަރުގެ ޔޫރޯ ފުޓްބޯޅަ މުބާރާތުގައި ސްޕެއިނުން ކުޅުނު ހުރިހާ މެޗުތަކެއްގައި ވެސް ޕެޑްރީ ވަނީ ފުރަތަމަ އެގާރައިގައި ހިމެނިގެން ކުޅެފަ އެވެ. ސްޕެއިން ނޮކައުޓް ބުރުގައި ކުޅުނު ތިން މެޗުގައި ވެސް ވަނީ އިތުރު ވަގުތުގެ ދެ ހާފް ކުޅެފަ އެވެ.
މި މަހު ޖަޕާނުގައި ފަށާ އޮލިމްޕިކްސްގައި ވާދަކުރާ ސްޕެއިންގެ ޓީމުގައި ވެސް ޕެޑްރީ ހިމެނެ އެވެ. އެ މުބާރާތުގެ ހުރިހާ މެޗެއްގައި ޕެޑްރީ ކުޅެގެން ސްޕެއިން ފައިނަލަށް ގޮސްފިނަމަ އަހަރެއްގެ މައްޗަށް ބަލާއިރު ޕެޑްރީ ކުޅޭ މެޗުތައް 60 އަށް ވުރެ މަތިވާނެ އެވެ.
ކޫމަން ބުނީ މަޝްހޫރު ގިނަ ކޯޗުން ތަކެއް ބައިވެރިވި ސެޝަނެއްގައި މެންޗެސްޓާ ސިޓީގެ ކޯޗު ޕެޕް ގާޑިއޯލާ ވަނީ ވަރަށް ރަނގަޅު ވާހަކައެއް ފާހަގަކޮށްފައި ކަމަށެވެ. އެއީ ސީޒަން ނިންމާފައި އޮންނަ އެއް ބްރޭކެއްގެ ތެރޭގައި ބައިނަލްއަގުވާމީ ދެ މުބާރާތް އެއް ކުޅުންތެރިއަކު ލައްވައި ނުކުޅުވުމަށެވެ.
"ޒުވާން ކުޅުންތެރިއަކަށް ވިޔަސް ނޫނީ ދުވަސްވީ ތަޖުރިބާކާރު ކުޅުންތެރިއަކަށް ވިޔަސް މީގެ ޖެހޭނެ ވިސްނަން. އެއް ބްރޭކެއް (ސީޒަން ނިންމާފައި ލިބޭ ދެ މަހެއްހާ ދުވަސް) ތެރޭގައި ބައިނަލްއަގުވާމީ ދެ މުބާރާތް ކުޅުން ރަނގަޅެއް ނުވާނެ،" ކޫމަން ބުންޏެވެ.
"ޕެޑްރީ ލައްވައި ދެ މުބާރާތް ކުޅުވުން ރަނގަޅެއް ނޫން. އޭނަ މި ސީޒަނުގައި ވަރަށް ބައިވަރު މެޗު ކުޅެފި. ސިއްހަތަށް ވިސްނަން ޖެހޭ،"
ކޫމަން ބުނީ އޭނާގެ ނަޒަރުގައި އޮލިމްޕިކްސް އަކީ ފުޓްބޯޅަ ކަހަލަ ކޮންޓެކްޓް ޓީމު ސްޕޯޓްސް އަށް ވުރެ ބޮޑަށް އެތުލެޓިކްސް ކަަހަލަ ކުޅިވަރުތަކަށް ހާއްސަ އިވެންޓެއް ކަމަށެވެ. ފީފާ އިން ވެސް އެންމެ ރަސްމީ މުބާރާތެއްގެ ގޮތުގައި އޮލިމްޕިކްސް ނުބަލަނީ އެ ފަދަ ސަބަބުތަކާ ހުރެ ކަމަށް ކޫމަން ވަނީ ބުނެފަ އެވެ.
ޕެޑްރީ ވަނީ އޭނާ އޮލިމްޕިކްސްގައި ކުޅޭތީ ބާސެލޯނާގެ ކަންބޮޑުވުންތަކެއް ހުރި ނަމަވެސް އެ މުބާރާތުގައި ކުޅެން ބޭނުންވާ ކަމަށާއި އެނބުރި ބާސެލޯނާ ޓީމާ ގުޅޭނީ ފުރިހަމަ އަށް އަރާމުކުރުމަށް ފަހު ކަމަށް ބުނެފަ އެވެ.
