ޖެނީވާ، ސްވިޓްޒަލޭންޑް (ޖުލައި 9) - އިޒްރޭލުން ވެރިވެގަނެފައިވާ ފަލަސްތީނުގެ ހުޅަނގު އައްސޭރީގައި ޔަހޫދީން އާބާދު ކުރުމަކީ ހަނގުރާމައިގެ ޖަރީމާއަކާ އެއް ފަދަ ކަމެއްގެ ގޮތުގައި އދ. ގެ އިންސާނީ ހައްގުތައް ތަހުގީގު ކުރާ ތަޖުރިބާކާރަކު ވިދާޅުވެއްޖެ އެވެ.
އިޒްރޭލުން ވެރިވެގަނެފައިވާ ފަލަސްތީނުގެ ބިންތަކުގައި އިންސާނީ ހައްގުތަކުގެ ކަންކަން މޮނީޓާ ކުރާ އދ. ގެ ހާއްސަ ރެޕަޓުއާ، މައިކަލް ލިންކް ހުކުރު ދުވަހު ވިދާޅުވީ ޔަހޫދީން އާބާދު ކުރުމަކީ ހަނގުރާމައިގެ ޖަރީމާއަކާ އެއް ފަދަ ކަމެއް ކަމަށެވެ.
އިޒްރޭލުން "ގާނޫނާ ހިލާފަށް ފަލަސްތީން ހިފައިގެން އުޅުމަކީ" އެކަމަށް ޖަވާބުދާރީވެ، އެކަމުގެ އުގޫބާތާ ކުރިމަތިލާން ޖެހޭނެ ކަމެއްކަން ބައިނަލްއަގްވާމީ މުޖުތަމައިން އިޒްރޭލަށް ހަނދާންކޮށްދިނުމަށް އޭނާ ގޮވާލެއްވި އެވެ.
ލިންކް އެގޮތަށް ވިދާޅުވީ ހުކުރު ދުވަހު ޖެނީވާގައި ކުރިއަށް ދިޔަ އދ. ގެ އިންސާނީ ހައްގުތަކާ ބެހޭ ކައުންސިލްގެ ހާއްސަ ސެޝަނެއްގަ އެވެ. ލިންކްގެ މަސައްކަތް ބަލައިނުގަންނަ ކަމަށް ކުރިން ބުނެފައިވާ އިޒްރޭލުން ވަނީ އެ ސެޝަން ބޮއިކޮޓްކޮށްފަ އެވެ.
"އަޅުގަނޑު ނިންމާ ގޮތުގައި އިޒްރޭލުން ޔަހޫދީން އާބާދު ކުރުމަކީ ހަނގުރާމައިގެ ޖަރީމާއަކާ އެއް ފަދަ ކަމެއް. އަޅުގަނޑު މި ހުށަހަޅަނީ، މި ހޯދުންތަކުގެ އަލީގައި، އިޒްރޭލުން ގާނޫނާ ހިލާފަށް ބިންތައް ހިފައިގެން އުޅުމާއި، ބައިނަލްއަގްވާމީ ގާނޫނާއި ހިޔާލަށް ގޮންޖަހަމުން ދިޔުން ހުއްޓުވުމަކީ ބައިނަލްއަގްވާމީ މުޖުތަމައުގެ މައްޗަށް ލާޒިމްވެފައިވާ ޒިންމާއެއް ކަމަށް،" ލިންކް ވިދާޅުވި އެވެ.
ދުނިޔޭގެ ގިނަ ގައުމުތަކުން ގަބޫލުކުރާ ގޮތުގައި އިޒްރޭލުން ޔަހޫދީން އާބާދު ކުރަނީ ބައިނަލްއަގްވާމީ ގާނޫނާ ހިލާފަށެވެ. ނަމަވެސް އިޒްރޭލުން އެކަން ދޮގުކޮށް ބުނަނީ، އެ ބިމަކީ ތާރީހީ އަދި ދީނީ ގޮތުން ޔަހޫދީންނާ ގުޅިފައިވާ ބިމެއް ކަމަށާއި ސަލާމަތީ ސަބަބުތަކަށްޓަކައި ޔަހޫދީން އާބާދު ކުރަން ޖެހޭ ކަމަށެވެ.
ލިންކްގެ ރިޕޯޓާ ގުޅޭ ގޮތުން އިޒްރޭލުން ބުނީ "އެއީ އެއް ފަރާތަށް ޖެހިފައިވާ އިޒްރޭލާ ދެކޮޅު" ރިޕޯޓެއް ކަމަށެވެ. އޭގެ އިތުރުން ލިންކް ހިންގެވި ތަހުގީގުގައި ފަލަސްތީނުގެ ސަރުކާރާއި ގާޒާގައި ވެރިކަން ކުރާ ހަމާސް ޖަމާއަތުގެ އަމަލުތައް ނުފެންނަ ކަމަށް ހެދި ކަމުގެ ތުހުމަތު ކުރި އެވެ.
ފަލަސްތީނުގެ ރައްޔިތުން ބޭނުންވަނީ ހުޅަނގު އައްސޭރި އާއި ގާޒާ ހިމެނޭ ގޮތަށް އިރުމަތީ ގުދުސްއަކީ ވެރިރަށުގެ ގޮތުގައި ކަނޑައަޅައިގެން ފަލަސްތީނުގެ މިނިވަން ދައުލަތެއް ގާއިމް ކުރުމަށެވެ. ނަމަވެސް އެއީ 1967 ގެ ހަނގުރާމައިގައި އިޒްރޭލުން ހިފާފައިވާ ހިސާބުތަކެވެ.
އިޒްރޭލުން ދަނީ އެ ބިންތަކުގައި ޔަހޫދީން އާބާދު ކުރުމުގެ މަސައްކަތް ހުއްޓުމެއް ނެތި ކުރަމުންނެވެ. އޭގެ ސަބަބުން ފަލަސްތީނުގެ މިނިވަން ދައުލަތެއް ގާއިމް ކުރުމުގެ މަސައްކަތަށް ހުރަސް އެޅި، 2014 ވަނަ އަހަރުން ފެށިގެން އެކަމާ ގުޅޭ މަޝްވަރާތައް ވެސް ވަނީ ހުއްޓިފަ އެވެ.
