އައްމާން، އުރުދުން (ޖުލައި 8) - އުރުދުންއަށް ދިމާވެފައިވާ ފެނުގެ ދަތިކަން ހައްލު ކުރުމަށް އިޒްރޭލުން ފެން ގަންނަން ބޮޑު އެއްބަސްވުމެއްގައި ސޮއިކޮށްފި އެވެ.
އެއްބަސްވުމުުގެ ދަށުން އުރުދުންއަށް ބޭނުންވާ ފެން އިޒްރޭލުން ގަންނަން ނިންމާފައި ވާއިރު، އުރުދުންގެ ގިނަ މުދާ ފަލަސްތީނުގެ ހުޅަނގު އައްސޭރިއަށް އެތެރެ ކުރުމުގެ ހުއްދަ ލިބޭނެ އެވެ.
އިޒްރޭލާއި އުރުދުންއާ ދެމެދު 1994 ގައި ސުލްހައިގެ އެއްބަސްވުމެއް އެކުލަވާލުމަށް ފަހު ފެނުގެ ވަސީލަތްތަކުގެ ކަންކަމުގައި ދެ ގައުމުން ގުޅިގެން މަސައްކަތް ކޮށްފައި ވެ އެވެ. ނަމަވެސް ފަހަކަށް އައިސް ދެ ގައުމުގެ ގުޅުން އޮތީ ގޯސްވެފަ އެވެ.
އުރުދުންގެ ބޯޑަރު ސަރަހައްދުގައި ބޭއްވި ބައްދަލުވުމެއްގައި ފެނުގެ ވިޔަފާރިއާ ގުޅޭ އެއްބަސްވުމުގައި ސޮއިކުރެއްވީ އިޒްރޭލުގެ ފޮރިން މިނިސްޓަރު ޔެއާ ލަޕިދް އަދި އުރުދުްގެ ފޮރިން މިނިސްޓަރު އައިމަން ސަފާދީ އެވެ.
އެއްބަސްވުމުގެ ދަށުން އިޒްރޭލުން އުރުދުންއަށް 50 މިލިއަން ކިއުބިކް މީޓަރުގެ ސާފު ބޯފެން ފޯރުކޮށްދޭނެ އެވެ. ދެ ގައުމުން ވެސް ބުނީ އެއްބަސްވުމާ ގުޅޭ ތަފްސީލް ފަހުން ހާމަކުރާނެ ކަމަށެވެ.
ލަޕިދް އުރުދުން ސިފަކުރެއްވީ އިޒްރޭލަށް "މުހިންމު ބައިވެރިއެއް"ގެ ގޮތުގަ އެވެ. އަދި ގުޅުން ވަރުގަދަ ކުރަން އިސްކަން ދެއްވާނެ ކަމަށް ވިދާޅުވި އެވެ.
އިކޯ ޕީސް މިޑްލް އީސްޓް ޖަމިއްޔާގެ އިޒްރޭލުގެ ޑިރެކްޓަރު ގިޑޯން ބްރޮމްބާގް އޭއެފްޕީއަށް ވިދާޅުވީ މިއީ އިޒްރޭލާއި އުރުދުންއާ ދެމެދު މިހާތަނަށް "އެންމެ ގިނަ އަދަދަކަށް ފެން ވިއްކަން އެއްބަސްވި" ފަހަރު ކަމަށެވެ.
އުރުދުންއަކީ ދުނިޔޭގައި ފެނުގެ ދަތިކަން އެންމެ ބޮޑަށް ދިމާވާ އެއް ގައުމެވެ. ތަޖުރިބާކާރުން ބުނާ ގޮތުގައި 10 މިލިއަން މީހުން ދިރިއުޅޭ އުރުދުންއަށް މިހާރު ދިމާވެފައި ވަނީ އެ ގައުމުގެ ތާރީހުގައި ކުރިން ނުފެންނަ ފަދަ ހަނަފަސް ދުވަސްތަކެކެވެ.
އިޒްރޭލަކީ ވެސް ފެނުގެ ދަތިކަން ދިމާވާ ގައުމެއް ނަމަވެސް، އެ ގައުމަކީ ޑީސެލިނޭޝަން ނުވަތަ ލޮނު ފެން ސާފުކުރުމުގެ ދާއިރާއިން ދުނިޔޭގެ އެންމެ ކުރީގައިވާ ގައުމެވެ.
އެއްބަސްވުމުގެ ދަށުން އުރުދުންގެ މުދާ ހުޅަނގު އައްސޭރިއަށް ވިއްކުމާ ގުޅޭ ގޮތުން ދެ ގައުމުން ބުނީ އަހަރަކު 160 މިލިއަން ޑޮލަރު 700 މިލިއަން ޑޮލަރަށް ޖުމްލަ އެކްސްޕޯޓްގެ އަގު މަތިވާނެ ކަމަށެވެ.
ހުޅަނގު އައްސޭރިއަކީ 1967 ވަނަ އަހަރުން ފެށިގެން އިޒްރޭލުން ގާނޫނާ ހިލާފަށް ވެރިވެގަނެގެން އުޅޭ ފަލަސްތީނުގެ ބިމެކެވެ.
ވިޔަފާރީގެ ގުޅުމުގެ އިތުރުން ދެ ގައުމުގެ ފޮރިން މިނިސްޓަރުންގެ މެދުގައި ވަނީ އިޒްރޭލާއި ފަލަސްތީނާ ދެމެދު ސުލްހަ ގާއިމް ކުރުމާ ގުޅޭ މަޝްވަރާ ވެސް ކޮށްފަ އެވެ.
