ދުނިޔޭގެ ބެޑްމިންޓަން ފެޑެރޭޝަން، ބީޑަބްލިއުއެފް، އިން ރުހުންދީފައިވާ ދެ ބައިނަލްއަގުވާމީ މުބާރާތެއް ބާއްވަން ރާއްޖޭގެ ބެޑްމިންޓަން އެސޯސިއޭޝަން މި ފަހަރުގެ ކަލަންޑަރުގައި ހިމެނި ނަމަވެސް ހާލަތުތަން ނުދޭތީ އެ ދެ މުބާރާތް މި އަހަރު ނުބާއްވަން ނިންމައިފި އެވެ.
ބެޑްމިންޓަން އެސޯސިއޭޝަންގެ ކަލަންޑަރުގައި މި އަހަރު ބާއްވަން ޝެޑިއުލްކުރީ ބައިނަލްއަގުވާމީ ދެ މުބާރާތަކީ ދުނިޔޭގެ ފެޑެރޭޝަނުން ރުހުން ދީފައިވާ މުބާރާތެއް ކަމަށްވާތީ ކަލަންޑަރު އެކުލަވާލަން ޖެހެނީ ތާރީހަކާ އެކީ އެވެ. އެ ގޮތުން ބެޑްމިންޓަން އެސޯސިއޭޝަނުން ބެލީ އޮކްޓޫބަރު 4-10 އަށް މޯލްޑިވްސް އިންޓަނޭޝަނަލް ފިއުޗާ ސީރީސް ކުރިއަށް ގެންދިއުމަށާއި އޮކްޓޫބަރު 11-17 ގައި މޯލްޑިވްސް އިންޓަނޭޝަނަލް ސީރީސް ބޭއްވުމަށެވެ. އެކަމަކު މިހާރު އެ ދެ މުބާރާތް ވެސް މި ވަނީ މި އަހަރަށް ކެންސަލްކޮށްފަ އެވެ.
ބެޑްމިންޓަން އެސޯސިއޭޝަންގެ ރައީސް މޫސާ ނާޝިދު (މޫސަ) "އަދަދު" އަށް މިއަދު ވިދާޅުވީ މުބާރާތް ކެންސަލްކުރަން ޖެހުނު އެންމެ ބޮޑު ސަބަަބަކީ ބޭއްވޭނެ ކަމުގެ ޔަގީންކަމެއް ނެތި ކުރިއަށްދާން އުނދަގޫވުމުން ކަމަށެވެ.
ބެޑްމިންޓަން އެސޯސިއޭޝަންގެ ރައީސް މޫސާ ނާޝިދު.-- ފޮޓޯ: ބެޑްމިންޓަން އެސޯސިއޭޝަން
"ރާއްޖޭގެ ހާލަތު އޭރު އޮތްގޮތުންނާއި ކުޅުންތެރިންގެ ގޮތުން ބެލިޔަސް ކޮވިޑް ސިޓުއޭޝަން (ހާލަތު) އޮތްގޮތުން މާ ބޮޑު ޔަގީންކަމެއް ނެތް އެންމެ ބޭނުންވާ ލެވަލެއްގައި ގެންދެވިދާނެ ކަމަށް. ދެން އަނެއްކޮޅުން އަޅުގަނޑުމެންގެ ސްޕޮންސަރުން ކަމަށްވާ ލިނިން އިން ވެސް އެދުނީ މި އަހަރު އުނދަގޫވާނެ ކަމަށް މި ޝެޑިއުލާ އެއްގޮތަށް ކުރިއަށް ގެންދަން. އެހެންވެ، އެ ހުރިހާ ކަމަކަށް ބަލާފައި ނިންމީ އަންނަ އަހަރަށް ފަސްކުރަން،" މޫސަ ވިދާޅުވި އެވެ.
ބެޑްމިންޓަނުގެ ދުނިޔޭގެ ފެޑެރޭޝަން ބީޑަބްލިއުއެފްގެ ކައުންސިލް މެމްބަރުކަމާއި ބެޑްމިންޓަން އޭޝިއާ އާއި ދެކުނު އޭޝިއާގެ ބެޑްމިންޓަން އެސޯސިއޭޝަންގެ ޖެނެރަލް ސެކްރެޓަރީގެ މަގާމު ފުރުއްވަމުން އަންނަ މޫސަ ވިދާޅުވީ އަންނަ އަހަރު މި މުބާރާތްތައް އަލުން ބޭއްވުމަކީ ބޮޑު އުއްމީދެއް ކަމަށެވެ.
ގާތްގަނޑަކަށް ހަޔެއްކަ އަހަރުގެ މެދުކެނޑުމަކަށް ފަހު ރާއްޖޭން ބޭއްވި ފުރަތަމަ ބައިނަލްއަގުވާމީ ބެޑްމިންޓަން މުބާރާތަކީ 2019 ވަނަ އަހަރުގެ ސެޕްޓެމްބަރުގައި މޯލްޑިވްސް ބޭއްވި ފިއުޗާ ސީރީސް އެވެ. އޭގެ ފަހުން އެ އަހަރު ބެޑްމިންޓަން ޗެލެންޖްގެ ނަމުގައި އިތުރު ބައިނަލްއަގުވާމީ މުބާރާތެއް ބޭއްވުމަށް ފަހު އައްޑޫގައި ދެކުުނު އޭޝިއާގެ 21 އަހަރުން ދަށުގެ މުބާރާތް ވެސް ހޯސްޓްކުރި އެވެ. މިއީ މާލެ އިން ބޭރުގައި ބައިނަލްއަގުވާމީ މުބާރާތެއް ހޯސްޓްކުރި ފުރަތަމަ ފަހަރެވެ.
ކޮވިޑް-19ގެ ހާލަތާ ގުޅިގެން މިދިޔަ މެއި މަހުގެ ކުރީކޮޅުގައި ހުރިހާ ކުޅިވަރެއް ހުއްޓާލިއިރު، ބެޑްމިންޓަންގެ ހަރަކާތްތައް ވެސް ވަނީ މެދުކަނޑާލައިފަ އެވެ. އިއްޔެ ދިން ލުއިތަކުގެ ތެރެއިން ކުޅިވަރުތައް ކުޅުމުގެ ހުއްދަދިންއިރު، ކުޅިވަރު އެކުވެނީ ބެޑްމިންޓަން ކޯޓާއި ވިލިމާލެ ބެޑްމިންޓަން ކޯޓު ވަނީ ބީއޭއެމްގެ އާންމު މެމްބަރުންނަށް ހުޅުވާލައިފަ އެވެ.
