ބަގްދާދް، އިރާގް (ޖުލައި 8) - އިރާގުގައި ހުންނަ އެމެރިކާ އެމްބަސީއަށް އަމާޒުކޮށް ރޭ ދަންވަރު ތިން ރޮކެޓު ހަމަލާދީފައިވާ ކަމަށް އިރާގު ސިފައިން ބުނެފި އެވެ.
އެމްބަސީއަށް ހަމަލާތަކެއް ދިނުމުގެ ކުރިން ވަނީ އިރާގާއި ސީރިއާގައި އެމެރިކާ ސިފައިން މަޑުކޮށްގެން ތިބޭ މަރުކަޒުތަކަށް ވެސް ރޮކެޓް އަދި ޑްރޯން ހަމަލާތަކެއް ދީފަ އެވެ.
އިރާގު ސިފައިން ބުނީ އެމްބަސީއަށް ސީދާ ގެއްލުމެއް ނުވި ނަމަވެސް ބަގްދާދުގެ ސެކުއިރިޓީ އެންމެ ވަރުގަދަ ގްރީން ޒޯންގައި ހިމެނޭ ތިން ތަނަކަށް ގެއްލުން ލިބުނު ކަމަށެވެ.
ފަހަކަށް އައިސް އިރާގާއި ސީރިއާގައި އެމެރިކާ ސިފައިންނާއި ޑިޕްލޮމެޓުންނަށް އަމާޒުކޮށް ދޭ ހަމަލާތައް ވަނީ އިތުރުވެފަ އެވެ. އެމެރިކާއިން ތުހުމަތު ކުރަނީ އޭގެ ފަހަތުގައި ވަނީ އިރާނުން އެހީވާ ހަނގުރާމަވެރިން ކަމަށެވެ.
އިރާގުގައި އެމެރިކާގެ 2،500 ސިފައިން ތިބީ އިސްލާމިކް ސްޓޭޓް (އައިއެސް) އާ ދެކޮޅަށް ހަނގުރާމަ ކުރުމަށެވެ. މި އަހަރު އެމެރިކާ ސިފައިންނަށް އަމާޒުކޮށް 50 އަށް ވުރެ ގިނަ ހަމަލާ އިރާގުގައި ދީފައި ވެ އެވެ. ނަމަވެސް ފާއިތުވި މަދު ދުވަސްކޮޅެއްގެ ތެރޭގައި ހަމަލާތައް ވަނީ އިތުރުވެ، ވަރުގަދަ ވެފަ އެވެ.
އެގޮތުން މިދިޔަ ބުދަ ދުވަހު ހުޅަނގު އަންބަރް ޕްރޮވިންސްގައި ސިފައިން ތިބޭ ވައިގެ މަރުކަޒަކަށް 14 ރޮކެޓް ހަމަލާ ފޮނުވި އެވެ. އެ ހަމަލާތަކުގައި ދެ މީހަކަށް އަނިޔާވި އެވެ.
އެ ހަމަލާގެ ޒިންމާ އުފުލީ ޝިއައީންގެ އަސްކަރީ ގްރޫޕް "ރިވެންޖް އޮފް އަލް މުހަންދިސް ބްރިގޭޑް" އިންނެވެ. އެ ގްރޫޕުން ވަނީ އެމެރިކާ ސިފައިން އިރާގުން ބޭރު ކުރާނެ ކަމަށް ބުނެފަ އެވެ.
މިދިޔަ ހޯމަ ދުވަހު ވެސް އެމްބަސީ ސަރަހައްދުގައި ހަތިޔާރާއެކު އުޅުނު ޑްރޯންއަކަށް ހަމަލާދީ ވައްޓާލާފައި ވެ އެވެ. އޭއެފްޕީން ރިޕޯޓު ކުރި ގޮތުގައި ޑްރޯން ވައްޓާލީ އެމެރިކާގެ ޑިފެންސް ސިސްޓަމުން ވައިގެ ތެރެއަށް ފޮނުވި ރޮކެޓުތަކެއްގެ އެހީގަ އެވެ.
މި އަހަރު އިރާގުގައި އެމެރިކާއަށް އަމާޒުކޮށް ހަ ޑްރޯން ހަމަލާދީފައި ވެ އެވެ. ޑްރޯންއަކީ ވައިގެ ޑިފެންސް ސިސްޓަމްތަކަށް ނުފެނި ހަމަލާ ދިނުމުގެ ބާރު ލިބިފައިވާ ޓެކްނޮލޮޖީއަކަށް ވާތީ، އެމެރިކާއިން އެކަމާ ވަރަށް ކަންބޮޑުވެ އެވެ.
އެމެރިކާއިން ދާދި ފަހުން ވަނީ އިރާގުގައި އެ ގައުމާ ދެކޮޅަށް ރާވާ ހަމަލާތަކުގެ މައުލޫމާތު ދޭ ފަރާތްތަކަށް ތިން މިލިއަން ޑޮލަރު ދޭނެ ކަމަށް ބުނެފަ އެވެ.
