ވޮޝިންޓަން، އެމެރިކާ (ޖުލައި 8) - އިންޑިއާއިން އެންމެ ފުރަތަމަ ފެނުނު ޑެލްޓާ ވޭރިއެންޓު ހަލުވިކަމާއެކު އެމެރިކާގައި ފެތުރި ކުއްލިއަކަށް ކޮވިޑް ކޭސްތައް އިތުރުވާން ފަށައިފި އެވެ.
ޖުލައި ހަ ވަނަ ދުވަހާ ބަލާއިރު، ކޮންމެ ދުވަހަކު ވެސް 13،859 އާ ކޭސް ދަނީ ފެންނަމުންނެވެ. މިއީ އޭގެ ދެ ހަފްތާ ކުރިއާ އަޅާ ބަލާއިރު 21 ޕަސެންޓުގެ އުފުލުމެކެވެ.
ކުއްލިއަކަށް ކޭސްތައް އިތުރުވާން ފަށާފައި މި ވަނީ ހަލުވިކަމާއެކު ފެތުރޭ ޑެލްޓާ ވޭރިއެންޓުގެ ސަބަބުންނެވެ. އެމެރިކާއިން މިދިޔަ ދެ ހަފްތާގައި ފެނުނު ކޭސްތަކުގެ 52 ޕަސެންޓަކީ ޑެލްޓާ ވޭރިއެންޓާ ގުޅުން ހުރި ކޭސްތަކެވެ.
ދުނިޔޭގެ ގައުމުތަކުގެ ތެރެއިން އެންމެ ފަސޭހައިން ކޮވިޑް ވެކްސިން ލިބެން ހުރި ގައުމަކީ އެމެރިކާ ނަމަވެސް، އޭޕްރިލް މަހުން ފެށިގެން ވެކްސިން ޖަހާ މިންވަރު ވަނީ މަދުވެފަ އެވެ.
ރައީސް ޖޯ ބައިޑެން މަސައްކަތް ކުރެއްވީ އެމެރިކާގެ މިނިވަން ދުވަސް ކަމުގައިވާ ޖުލައި 4 ގެ ކުރިން ބޮޑެތި މީހުންގެ އާބާދީގެ 70 ޕަސެންޓަށް ވެކްސިން ދިނުމަށެވެ.
ނަމަވެސް އެ ލަނޑުދަނޑިއަށް ވާސިލްވެވިފައެއް ނުވެ އެވެ. މިހާތަނަށް ވެކްސިން ޖަހާފައިވަނީ ބޮޑެތި މީހުންގެ އާބާދީގެ 67 ޕަސެންޓެވެ.
ޑެލްޓާ ވޭރިއެންތު ފެތުރި މިހާރު އެންމެ ގިނައިން ކޭސްތައް ފެންނަމުން ދަނީ ވެކްސިން ޖެހުން މަދު ސަރަހައްދުތަކުންނެވެ. އެގޮތުން މިޒޫރީގެ ސްޕްރިންގްފީލްޑްގެ ހޮސްޕިޓަލަކުން މި ހަފްތާ ބަންދުގައި ވަނީ ވެންޓިލޭޓަރު ހުސްވެފަ އެވެ.
ގާތްގަނޑަކަށް 160،000 މީހުން ދިރިއުޅޭ އެ ސިޓީގެ ދެ ހޮސްޕިޓަލުން މިދިޔަ ހޯމަ ދުވަހާ ހަމަށް ދިޔެއީ ކޮވިޑް ޖެހިގެން 213 މީހުންނަށް ފަރުވާ ކުރަމުންނެވެ.
