ލަންޑަން (ޖުލައި 8) - ސާޖިއޯ އަގުއޭރޯގެ ބަދަލުގައި ފެންވަރު ރަނގަޅު ފޯވާޑެއް ގެންނަން ބަލާއިރު، ފޯވާޑުންގެ އަގު ހުރީ މެންޗެސްޓާ ސިޓީގެ އަތްނުފޯރާ ހިސާބުގައި ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފި އެވެ.
ދިހަ އަހަރަށް ފަހު އަގުއޭރޯ ވަނީ މި ފަހަރުގެ ޓްރާންސްފާ މާކެޓްގައި ސިޓީ ދޫކޮށް ބާސެލޯނާ އަށް ބަދަލުވެފަ އެވެ. އަގުއޭރޯ ނެތްތަނަށް ސިޓީން އެންމެ ބޭނުންވަނީ ޓޮޓެންހަމް ހޮޓްސްޕާސްގެ ހެރީ ކޭން ނޫނީ ބޮރޫޝިއާ ޑޯޓްމަންޑްގެ އާލިން ބްރައުޓް ހާލަންޑް އެވެ. މި ދެ ކުޅުންތެރިން ވިއްކާލަން މަދުވެގެން 170 މިިލިއަން ޑޮލަރުގެ ޓްރާންސްފާ ފީ އަކަށް އެ ކުޅުންތެރިން ތިބި ކްލަބްތަކުން ޑިމާންޑްކުރެ އެވެ.
"މިހާރު ޓްރާންސްފާ ބާޒާރުގައި އެ ހުރި އަގުތަކަށް ބަލާއިރު އަހަރެމެން ފޯވާޑެއް ގަންނާނެ ކަމަށް ނުބެލެވޭ. އެއީ އަހަރެމެންގެ އަތްފޯރާނެ އަގުތަކެއް ނޫން. އަހަރެމެން ވެސް ނުވާވަރަކުން ހަރަދެއް ނުކުރާނަން،" ކަޓަލޫނިއާގެ ޓީވީ3 އަށް ދިން އިންޓަވިއުއެއްގައި ގާޑިއޯލާ ބުންޏެވެ.
އޭނާ ބުނީ ކޮވިޑް-19ގެ ސަބަބުން މާލީ ގޮތުން ގިނަ ކްލަބްތަކަށް އެތައް ގޮތަކުން ދަތިވެފައިވާ ކަމަށާއި އެހެންވެ، މުސްތަގުބަލުގައި ވާނެ ގޮތެއް ނޭނގި ބޮޑު ހަރަދެއް އެއް ކުޅުންތެރިއަކަށް ނުކުރެވޭނެ ކަމަށެވެ. އާ ފޯވާޑެއް ނުލިބުނު ކަމުގައި ވިޔަސް ސިޓީގައި ތިބި ސްޕެއިންގެ ފެރާން ޓޮރޭޒާއި ބްރެޒިލްގެ ގަބްރިއެލް ޖީސޫސް އަށް ފުރިހަމަ އިތުބާރު އެބައޮތް ކަމަށް ގާޑިއޯލާ ވަނީ ބުނެފަ އެވެ.
އުމުރުން 27 އަހަރުގެ ކޭން ޓޮޓެންހަމް ދޫކޮށްލަން ބޭނުންވާކަން އެ ކްލަބަށް އެންގި ނަމަވެސް ޓޮޓެންހަމް އަދި އޮތީ ކޭން ވިއްކާލާ ގޮތަކަށް ނޫނެވެ. ސްކައިސްޕޯޓްސް އިން ރިޕޯޓްކުރާގޮތުގައި ސިޓީން ވަނީ ކޭން ގަންނަން ދާދި ފަހުން 100 މިލިއަން ޕައުންޑު (140 މިލިއަން ޑޮލަރު)ގެ ބިޑެއް ހުށަހަޅައިފަ އެވެ. އެއީ ތިން ކުޅުންތެރިން ވެސް ހިމެނޭ ގޮތަށެވެ.
އިނގިރޭސި އެހެން މީޑިއާ ރިޕޯޓްތައް ބުނާގޮތުން ކޭން ގަންނަން ހުށަހެޅި އެ ތިން ކުޅުންތެރިންނަކީ ޖީސޫސް، އިނގިރޭސި ވިންގް ރަހީމް ސްޓާލިން އަދި ސްޕެއިންގެ ޑިފެންޑަރު އައިމެރިކް ލަޕޯޓް އެވެ. މި ތިން ކުޅުންތެރިންގެ ތެރެއިން ދެ ކުޅުންތެރިން ދޭނީ އެއް ސީޒަނުގެ ލޯން އެއްބަސްވުމަކަށެވެ. އަދި އެ އެއްބަސްވުމުގެ ތެރެއިން އެ ދެ ކުޅުންތެރިންނަށް ވަކި ޓްރާންސްފާ ފީއެއް ދައްކައިގެން ކޮންޓްރެކްޓް ދާއިމީ ކުރެވޭ ގޮތަށް ވަކި މާއްދާއެއް ހިމަނަން ވެސް ސިޓީ އޮތީ ތައްޔާރަށެވެ.
ޑޯޓްމަންޑުން އެ ޓީމުގެ އިނގިރޭސި ވިންގް ޖޭޑަން ސަންޗޯ މެންޗެސްޓާ ޔުނައިޓެޑަށް ވިއްކާލަން ނިންމާފައިވާއިރު، މި ފަހަރުގެ ޓްރާންސްފާ މާކެޓްގައި އެ ޓީމުގެ އިތުރު ތަރިއެއް ގެއްލެން ބޭނުމެއް ނުވެ އެވެ. އެހެންވެ، އެ ޓީމުން އަންނަނީ އިތުރު އެއް އަހަރަށް ނަމަވެސް ހާލަންޑް ކްލަބްގައި މަޑުކުރެވޭތޯ މަސައްކަތް ކުރަމުންނެވެ.
